Read Biatah Bidayuh JEREMIAH 32 Bible Online

JEREMIAH 32 - Biatah Bidayuh bible

JEREMIAH 32

¹ TUHAN minyu ngga aku darŭm sawa adi simŭng Zedekiah jadi raja Judah, pak anŭ gŭh sawa adi simŭng mai Nebuchadnezzar jadi raja di Babylonia.

²Di tika anŭ tibaran bara soldadu Raja Babylonia nyerang Jerusalem, ka aku dog bitan di badag istana raja.

³Raja Zedekiah bitan aku diginŭ ka nyarah aku amai aku piagah nang TUHAN mbŭh nang, “Aku re bada raja Babylonia sirabut kupo ati,

⁴ka Raja Zedekiah re dŭh dapŭd bu pirupas adŭp-i. Ayŭh re dog nyerah ka raja Babylonia; ayŭh re situra jawin ngga ayŭh buang re minyu ngga ayŭh.

⁵Zedekiah re dog taban ngga bu ka Babylonia, ka ayŭh re rŭŭ diginŭ ndŭg ka Aku ngukum ayŭh. Sunggu kambŭi ayŭh rawan daya Babylonia, ayŭh dŭh re manang. Aku, adi TUHAN, mbŭh minyu.”

⁶TUHAN kidaan di aku

⁷nang Hanamel, anak tua dari ku Shallum, re mandŭg ka aku ngga pimite bada aku miris tana-i di Anathoth di utung tarun tana Benjamin, sabab aku madis-i adi sindŭk ka biyŭn hak miris-i yŭn adŭp ku.

⁸Komŭnŭ, nimun adi mbŭh TUHAN nang, Hanamel sawŭ mandŭg ka yŭn ku diginŭ di badag istana ka bada aku miris tana-i. Anŭ sabab aku puan nang TUHAN sawŭ agi minyu ngga aku.

⁹Aku miris tana anŭ so Hanamel ngga rega simŭng ju kiping duit pirak.

¹⁰Aku na tandā tangan ku di surat adat-bibiris ka matis-i, di sirung jawin bara saksi. Ka aku nimbang duit anŭ adi ngga bayar-i.

¹¹Komŭnŭ aku tambit kiping kiping surat anŭ adi mbŭh dog matis adi brisi ngga atur-adat bibiris, samŭn anŭ adi dŭh dog matis;

¹²ka nggen-i di Baruch, adi anak Neriah ka sukuh Mahseiah. Aku nggen-i di ngara di sirung jawin Hanamel ngga bara saksi adi muko na tandā tangan ngara di surat adat-bibiris anŭ ka di sirung jawin bara daya adi guru di badag istana anŭ.

¹³Di sirung jawin sopŭrŭg ngara aku nang di Baruch,

¹⁴“TUHAN Bisa-pŭrŭg, adi Tapa Israel, mbŭh nggen ukum bada kuu tambit surat ati, ati adi mbŭh dog matis ngga ati adi dŭh dog matis, ka na-i darŭm tipayan tana-riyat, siŭn-i dapŭd dog nyikŭn tui.

¹⁵TUHAN Bisa-pŭrŭg, adi Tapa Israel, mbŭh minyu nang ramin ramin, ŭmŭh ŭmŭh, ka teya teya anggor re dog miris dinge di rais ati.”

¹⁶Ripas aku mbŭh nggen surat adat-bibiris anŭ di Baruch, aku bidua,

¹⁷“TUHAN Raja, Kaam napa ong ngga rangit pakai kuasa bās ngga pinyibake Mai; mating kayuh adi raru mbar re Mai ndai.

¹⁸Kaam mbŭh kiren pinyirindu Mai adi dŭh bisa birubah di biribu ribu daya, pak Kaam gŭh ngukum daya amai dosa pimas ngara. Kaam inŭh Tapa adi bās ka bikuasa; Kaam inŭh TUHAN Bisa-pŭrŭg.

¹⁹Kaam ndai atur adi bijak ka ndai kayuh kayuh adi bās; Kaam kiris sopŭrŭg pingandai daya, ka Kaam ngupah ngara nanyam ka pingandai ngara.

²⁰Ndun jah, Kaam ndai pingandai-nginga ngga pingandai-saruh di Egypt, ka Kaam babŭ ndai-i ndŭg andu ati, di Israel ngga di bangsa bangsa bŭkŭn, siŭn madin Kaam dog puan di barang yŭn.

²¹Ngga pingandai-nginga ka pingandai-saruh adi pitaru pinganyu ami, Kaam pakai kuasa ka pinyibake ngga taban daya Mai Israel ruah so Egypt.

²²Kaam nggen di ngara tana adi kaya ka damŭn ati, nimun adi mbŭh Kaam janji di tayung-babuk ngara.

²³Pak kan ngara mŭrŭt tarun tana ati ka dapu-i, ngara dŭh tunda pesan Mai bait udip nanyam ka ajar Mai; ngara dŭh ndai kayuh adi Kaam bada ngara ndai. Ngapŭi meh Kaam bada masam masam pinyirusag ati nyatŭk ngara.

²⁴“Daya Babylonia mbŭh nugung tana ngga nyikapung kupo ka sirabut-i, ka ngara mbŭh nyerang madin. Perang, udip sikirau, ka andam re bada kupo ati rabu ka darŭm tangan ngara. Kaam dapŭd kiris sopŭrŭg kayuh, adi Kaam mbŭh nang, jadi bitŭtŭk.

²⁵Sunggu-i simŭnŭ, TUHAN Raja, Kaam inŭh adi mritah aku bada miris tana di sirung jawin bara saksi, sunggu kupo ati mbŭh re dog sirabut daya Babylonia.”

²⁶Komŭnŭ TUHAN nang di aku,

²⁷“Aku ati TUHAN, adi Tapa sopŭrŭg bangsa manusia. Mating kayuh adi raru mbar yŭn Ku.

²⁸ Aku re nggen kupo ati ka Nebuchadnezzar adi raja Babylonia ka di tibaran bara soldadu-i; ngara re sirabut-i

²⁹ka badang-i. Ngara re badang-i ndŭg ka rŭpŭg, samŭn ramin ramin adi yŭn daya mbŭh bada Aku baji, anŭ inŭh badang kimanyan yŭn Baal di tibung ramin ka ren wain sadis yŭn tapa tapa bŭkŭn.

³⁰So sibungas dundan ngara jah, daya Israel ngga daya Judah mbŭh bada asŭng Ku dŭh munos ka mbŭh kinuas Aku ngga pingandai ngara.

³¹Daya darŭm kupo mbŭh bada Aku baji ka bangok so andu adi ngga kupo ati dog pijog. Aku ndai pikir Ku an pirubuh-i

³²sabab sopŭrŭg arap adi dog ndai daya Judah ngga daya Jerusalem, ngga raja raja ka pinguru pinguru ngara, imam imam ka nabi nabi ngara.

³³Ngara nyipunok Aku; ka sunggu Aku babŭ ngajar ngara, ngara abah dingah ka birajar.

³⁴ Ngara tanŭ ka mbŭh na tibudo tibudo ngara adi sipŭ anŭ di Ramin Ku adi ngaŭn dog pijog yŭn nyambah Aku; ngara mbŭh nyembar-i.

³⁵ Ngara mbŭh pijog mija mija-sambah yŭn Baal di Rubān Hinnom, yŭn nyadis anak anak dari ngga anak anak dayung ngara ka tapa Molech. Aku mating pesan ngara bada ndai simŭnŭ, ka bŭn-i di pikir Ku nang ngara re ndai kayuh adi mun anŭ ngga bada daya Judah bidosa.”

³⁶TUHAN, adi Tapa Israel, nang di aku, “Jeremiah, bara daya mbŭh nang perang, udip sikirau, ka andam re bada kupo ati rabu ka darŭm tangan raja Babylonia. Madin dingah dinge kayuh bŭkŭn an Aku nang.

³⁷Aku re nguruk bara daya so sopŭrŭg rais adi yŭn Ku mbŭh bada ngara papar sasah amai baji ngga bangok Ku, ka Aku re taban ngara ngga pari ka tarun yŭn ati ka bada ngara rŭŭ digiti ngga siramat.

³⁸Komŭnŭ ngara re jadi daya Ku, ka Aku re jadi Tapa ngara.

³⁹Aku re nggen di ngara ndi pinŭtŭn darŭm pimudip: stabi di Aku yŭn adu adu, yŭn kana adŭp ngara ka yŭn kana bara sesang ngara.

⁴⁰Aku re ndai ndi simanya adi tan adu adu. Aku dŭh re ko ndai kayuh kana yŭn ngara, ka Aku re bada ngara taru Aku ngga siabo atin ngara, isa ngara dŭh tia bu so Aku.

⁴¹Aku re ngga sanang asŭng ndai kayuh kana yŭn ngara, ka Aku re bada ngara tatap rŭŭ di tarun tana ati.

⁴²“Nimun Aku mbŭh taban pinyirusag bada nyatŭk bangsa ati, simŭnŭ gŭh Aku re nggen di ngara sopŭrŭg kayuh kana adi Aku mbŭh bijanji an nggen.

⁴³Daya nang tarun tana ati re mun tarun tana-pajam di yŭn mating daya bait dāng rŭŭ dieh, ka re dog nggen di daya Babylonia. Pak ŭmŭh re dog miris dinge di rais ati.

⁴⁴Daya re miris-i, ka surat surat adat-bibiris re dog na tandā tangan dieh, dog matis, ka dog nyaksi daya bagŭ. Kayuh anŭ re jadi di utung tarun tana Benjamin, di anak anak kupo maning Jerusalem, di kupo kupo Judah, ka di kupo kupo di rais tarun tana sandah, di sigŭn sigŭn sandah, ka di siratan Judah. Aku re pari bangsa ati ka rais ngara. Aku, adi TUHAN, mbŭh minyu.”