Read Biatah Bidayuh JEREMIAH 33 Bible Online

JEREMIAH 33 - Biatah Bidayuh bible

JEREMIAH 33

¹Sitadŭn aku dog bitan di badag istana, pinganang so TUHAN mandŭg ka aku dinge.

²TUHAN, adi napa ong, adi ndai-i ka na-i di yŭn adŭp-i, minyu ngga aku. Ayŭh adi adŭn-I TUHAN nang,

³“Bagan Aku, ka Aku re nam kuu; Aku re kidaan di kuu kayuh adi kana ngga adi bās adi bŭn kuu puan.

⁴Aku, adi TUHAN, adi Tapa Israel, nang ramin ramin di Jerusalem ngga istana raja di Judah re rubuh amai dog nyikapung ka dog nyerang.

⁵Kada daya re rawan daya Babylonia, adi re ngisi ramin ramin[44] ngga tadang tadang daya adi Aku re siŭ amai baji ngga bangok Ku. Aku re bu so kupo ati sabab kayuh kayuh arap adi daya-i mbŭh ndai.

⁶Pak Aku re pari pijog kupo ati samŭn bara daya-i ka bada ngara bua sanang. Aku re bada ngara udip sukup pagŭng buang siramat.

⁷Aku re bada Judah ngga Israel mujur, ka Aku re pari pijog ngara bada mun adi dawŭ-i.

⁸Aku re pibisig ngara so dosa adi ngara mbŭh ndai rawan Aku, ka Aku re apun dosa ngara samŭn udip ngara adi raan birawan.

⁹Jerusalem re jadi atak pinyigaŭn, stabi, ka kayuh adi Aku ngangŭn; ka barang bangsa di ong re taru ka kimŭtŭr kan ngara dingah pasar kayuh kana adi Aku ndai yŭn daya Jerusalem ka pasar udip mujur adi Aku taban ka kupo anŭ.”

¹⁰TUHAN nang, “Daya nang tarun yŭn ati mun tarun tana-pajam, adi mating daya bait dāng rŭŭ dieh. Ka pinganang ngara sawŭ; kupo kupo Judah ngga aran aran di Jerusalem mbŭh mating daya dieh; mating daya bait dāng rŭŭ dieh. Pak di tarun tarun yŭn anŭ angān re dingah dinge

¹¹ sirais gaŭn ngga pawŭn ka jawŭn rami gawai banan sawan. Angān re dingah daya biragu darŭm ngara taban pinganggen trima kaseh ka Ramin Ku; ngara re nang, ‘Nggen trima kaseh di TUHAN Bisa-pŭrŭg, sabab Ayŭh kana ka pinyirindu-I tan adu adu.’ Aku re bada tarun tana ati mujur mun dawŭ-i. Aku, adi TUHAN, mbŭh minyu.”

¹²TUHAN Bisa-pŭrŭg nang, “Di tarun tana ati adi mun tarun tana-pajam ka di yŭn mating daya bait dāng rŭŭ dieh, re pari agi tarun tana kupai di yŭn pingingat-biri taban kaban biri-i.

¹³Di kupo kupo rais tarun tana sandah, di sigŭn sigŭn sandah, ka di siratan Judah, di utung tarun tana Benjamin, di anak anak kupo maning Jerusalem, ka di kupo kupo Judah, pingingat pingingat-biri re pari agi mirang biri ngara. Aku, adi TUHAN, mbŭh minyu.”

¹⁴ TUHAN nang, “Tika re mandŭg adi ngga Aku re pijadi janji adi Aku mbŭh ndai ngga daya Israel ka ngga daya Judah.

¹⁵Di tika anŭ Aku re mien bada jadi raja ndi naan so sesang David, adi tŭnggŭn. Raja anŭ re ndai kayuh adi batur ka adi tŭnggŭn di ndi tarun tana rais.

¹⁶Daya Judah ngga daya Jerusalem re dog nyiramat ka re udip darŭm damai. Kupo anŭ re dog kadŭn ‘TUHAN adi Pinyikudip Ta’.

¹⁷ Aku, adi TUHAN, bijanji nang re ari agi ndi naan so sesang David jadi raja Israel

¹⁸ ka re ari agi bara imam so tibaran-asar Levi bituan di Aku ka jugan sadis badang, sadis ruwang kayuh, ka dudu sadis adi bŭkŭn.”

¹⁹TUHAN nang di aku,

²⁰“Aku mbŭh ndai simanya ngga andu ngga ngarŭm, isa ngara ari mandŭg di tika adi batur; ka simanya anŭ dŭh siŭn dog miranggar.

²¹Simŭnŭ gŭh Aku mbŭh ndai simanya ngga urun Ku David nang Ayŭh re ari biyŭn sesang adi re jadi raja, ka Aku mbŭh ndai simanya ngga bara imam so tibaran-asar Levi nang ngara re ari bituan di Aku; ka simanya simanya anŭ dŭh siŭn dog miranggar.

²²Aku re nambah kiang bara sesang urun Ku David ka kiang bara imam so tibaran-asar Levi, isa ngara dŭh dapŭd dog mirang nimun bitang di rangit bait sumat di pang rawŭt.”

²³TUHAN nang di aku,

²⁴“Puan mu kah daya minyu nang Aku mbŭh tirawan Israel ngga Judah, duwŭh rawang anŭ adi Aku mbŭh mien? Ngapŭi meh ngara tiru di daya Ku ka dŭh tia nyirundeng ngara ndi bangsa.

²⁵Pak Aku, adi TUHAN, biyŭn simanya ngga andu ngga ngarŭm, ka Aku mbŭh ndai ukum-adat adi nguasa ong ngga rangit.

²⁶Ka siragi Aku mbŭh ndai simŭnŭ, simŭnŭ gŭh Aku re sita simanya Ku ngga bara sesang Jacob ka ngga urun Ku David. Aku re mien ndi naan so sesang David bada mritah bara sesang Abraham, Isaac, ka Jacob. Aku re masi di daya Ku ka bada pimudip ngara pari mujur.”