Read Biatah Bidayuh JEREMIAH 36 Bible Online

JEREMIAH 36 - Biatah Bidayuh bible

JEREMIAH 36

¹ Di sawa adi pat Jehoiakim anak Josiah jadi raja Judah, TUHAN nang di aku,

²“Tambit surat-barun ka nuris dieh sopŭrŭg kayuh adi Aku mbŭh kidaan di kuu pasar Israel ngga Judah ngga bangsa bangsa. Nuris sopŭrŭg kayuh adi Aku mbŭh kidaan di kuu so tika adi ngga Aku minyu ngga kuu di sibungas-i, kan Josiah mbŭh jadi raja, ndŭg andu ati.

³Kadŭ kan daya Judah dingah pasar sopŭrŭg pinyirusag adi Aku re bada nyatŭk ngara, ngara an pasan aran pimudip ngara adi arap anŭ. Komŭnŭ Aku re apun pimudip ginaka ngara samŭn dosa ngara.”

⁴Jadi aku bagan Baruch anak Neriah ka kidaan di ayŭh sopŭrŭg kayuh adi TUHAN mbŭh nang di aku. Ka Baruch nuris sopŭrŭg-i di surat-barun anŭ.

⁵Komŭnŭ Aku nggen di Baruch pinganang ati: “Aku mbŭh dŭh tia dog nyibandar mŭrŭt Ramin TUHAN.

⁶Pak aku raan kuu di kamanŭ andu bŭkŭn di tika daya bipusa. Kuu an basa isi surat-barun anŭ di ngara ngga bana, isa ngara dapŭd dingah sopŭrŭg kayuh adi TUHAN mbŭh nang di aku ka adi aku mbŭh kidaan di kuu. Ndai simŭnŭ di tadŭ yŭn daya dapŭd dingah kuu; simŭnŭ gŭh di daya Judah adi mbŭh mandŭg so kupo kupo ngara.

⁷Kadŭ ngara an bidua ka TUHAN ka pasan aran pimudip ngara adi arap anŭ, sabab TUHAN mbŭh pirawan daya-I ngga baji-I adi bisā ka riyŭn-I.”

⁸Jadi Baruch basa pinganang TUHAN di Ramin TUHAN brisak ngga anŭ adi aku mbŭh kidaan di ngara.

⁹Di buran adi prii darŭm sawa adi rimŭh Jehoiakim jadi raja Judah, daya bipusa ngga an dapŭd pinurung so TUHAN. Pusa anŭ dog sita sopŭrŭg daya adi rŭŭ di Jerusalem ngga sopŭrŭg daya adi mandŭg kamanŭ so kupo kupo Judah.

¹⁰Komŭnŭ, darŭm sopŭrŭg daya dingah, Baruch basa so surat-barun anŭ sopŭrŭg kayuh adi aku ko nang. Ayŭh ndai simŭnŭ di Ramin TUHAN, so birit Gemariah anak Shaphan, adi tukang pinuris. Birit-i inŭh di badag tura ka sambu sindŭk aran mŭrŭt Tiban Bauh Ramin TUHAN.

¹¹Micaiah, anak Gemariah ngga sukuh Shaphan, dingah Baruch basa so surat-barun kayuh adi TUHAN nang.

¹²Ko anŭ ayŭh di ka istana raja, di ka birit tukang pinuris, di yŭn sopŭrŭg pinurung agi tikuruk. Elishama adi tukang pinuris, Delaiah anak Shemaiah, Elnathan anak Achbor, Gemariah anak Shaphan, Zedekiah anak Hananiah, ka sopŭrŭg pinurung adi bŭkŭn adi agi diginŭ.

¹³Micaiah kidaan di ngara sopŭrŭg kayuh adi-i mbŭh dingah Baruch basa di sirung jawin bara daya.

¹⁴Komŭnŭ bara pinurung bada Jehudi (anak Nethaniah, sukuh Shelemiah, ka sukuh sit Cushi) kidaan di Baruch da taban surat-barun adi ayŭh ko basa di sirung jawin bara daya. Baruch taban surat-barun anŭ ka ngara.

¹⁵“Guru,” ngara nang, “ka basa isi surat-barun anŭ di kieh.” Baruch sawŭ basa-i.

¹⁶Ripas-i basa, ngara kimat dingan ngara buang gŭgŭh, ka nang di Baruch, “Ata dŭh siŭn dŭh kidaan kayuh ati di raja.”

¹⁷Ka ngara siken ayŭh, “Kidaan di kieh, munki kuu dapŭd nuris sopŭrŭg kayuh ati? Agi kah Jeremiah kidaan-i di kuu?”

¹⁸Baruch nam, “Jeremiah kidaan di aku sopŭrŭg bang piminyu anŭ, ka aku nuris-i ngga dawat di surat ati.”

¹⁹Ka ngara nang di ayŭh, “Kuu ngga Jeremiah dŭh siŭn dŭh bu di bisukan. Dŭhnyah bada daya puan tarun yŭn angān bisukan.”

²⁰Bara pinurung na surat-barun anŭ di birit Elishama, adi tukang pinuris, ka di kidaan di raja sopŭrŭg kayuh anŭ.

²¹Komŭnŭ raja pait Jehudi bada di tambit surat-barun anŭ. Ayŭh tambit-i so birit Elishama ka basa-i di raja ka di sopŭrŭg pinurung adi mijog diginŭ maning ayŭh.

²²Nganŭ mbŭh tipuh madud ka raja guru nura apui darŭm istana-i, yŭn tipuh madud.

²³Kan Jehudi muko basa kudu kudu susud utung pinganang, raja kapŭg-i ngga sinda adi siit ka taran-i ka apui. Ayŭh adu adu ndai simŭnŭ ndŭg ka ndi surat-barun anŭ mbŭh abo dog badang.

²⁴Pak ngara, bait-i raja puan kah bara pinurung-i adi mbŭh dingah sopŭrŭg kayuh anŭ, dŭh taru ka tatŭng dŭh susah.

²⁵Sunggu Elnathan, Delaiah, ngga Gemariah mite raja dŭh badang surat-barun anŭ, ayŭh dŭh piduri ngara.

²⁶Komŭnŭ ayŭh mritah Anak-raja Jerahmeel, samŭn Seraiah anak Azriel ngga Shelemiah anak Abdeel, bada nakap aku ngga tukang pinuris ku Baruch. Pak TUHAN mbŭh sukan kieh.

²⁷Ripas Raja Jehoiakim muko badang surat-barun adi brisi ngga kayuh adi aku bada Baruch nuris dieh, TUHAN bada aku

²⁸tambit surat-barun adi bŭkŭn ka nuris dieh sopŭrŭg kayuh adi muko dog nuris darŭm anŭ adi diŭ.

²⁹TUHAN bada aku nang di raja, “Kuu mbŭh badang surat-barun anŭ, ka kuu mbŭh siken mani Jeremiah nuris nang raja Babylonia re mandŭg ka pirabur tarun tana ati ka siŭ bara daya-i samŭn dāng dāng adi agi dieh.

³⁰Ka madin, Aku, adi TUHAN, nang di kuu, Raja Jehoiakim, nang mating so bara sesang mu re mritah Pritah David. Tadang mu re dog taran ka sapa di yŭn-i re dog sura ka singarŭm-i re dog abun.

³¹Aku re ngukum kuu, bara sesang mu, ka bara pinurung mu sabab sopŭrŭg dosa adi kuu mbŭh ndai. Mating so angān, bait-i kuu puan kah bara daya Jerusalem ngga daya Judah adi mbŭh mbit piduri di pinyibakan Ku, ngapŭi meh Aku taban bada nyatŭk angān pinyirusag anŭ adi Aku mbŭh kidaan nang re nyatŭk angān.”

³²Komŭnŭ aku tambit surat-barun adi bŭkŭn ka nggen-i di tukang pinuris ku Baruch, ka ayŭh nuris sopŭrŭg kayuh adi aku nang. Ayŭh nuris sopŭrŭg anŭ adi muko dog nuris darŭm surat-barun di diŭ ngga pinganang adi brisak ngga anŭ adi aku mbŭh kidaan di ayŭh.