Read Biatah Bidayuh JEREMIAH 38 Bible Online

JEREMIAH 38 - Biatah Bidayuh bible

JEREMIAH 38

¹Shephatiah anak Mattan, Gedaliah anak Pashhur, Jehucal anak Shelemiah, ngga Pashhur anak Malchiah dingah aku agi kidaan di bara daya nang

²TUHAN mbŭh nang, “Asi asi adi babŭ darŭm kupo re kabŭs darŭm perang, bait sabab sikirau, bait sabab andam. Pak ngara adi ruah ka nyerah adŭp ngara di daya Babylonia re dŭh dog siŭ; sikurang kurang-i ngara babŭ udip.”

³Aku agi gŭh kidaan di daya nang TUHAN mbŭh nang, “Aku re nggen kupo ati ka darŭm tangan tibaran bara soldadu Babylonia, ka ngara re sirabut-i.”

⁴Komŭnŭ bara pinurung anŭ di ka yŭn raja ka nang, “Daya ati dŭh siŭn dŭh dog nggen ukum kabŭs. Pinganang-i anŭ re bada bara soldadu darŭm kupo taru, ka ayŭh mbŭh minyu sakanŭ di barang naan daya adi babŭ darŭm kupo. Ayŭh dŭh turung rayat; sibatur-i ayŭh an nyusah rayat.”

⁵Raja Zedekiah nam, “Anŭ sŭn adŭp ngan nang; aku dŭh re bitan angān.”

⁶Jadi ngara tambit aku ka bisor aku pakai taris ka darŭm prigi Anak-raja Malchiah, adi di badag istana. Mating piin darŭm prigi anŭ, adŭ-i tana bisa, ka aku timŭtŭm dieh.

⁷Pak, Ebedmelech adi daya Ethiopia[45], ndi naan eunuch adi nyiraja di istana raja, dingah aku dog na darŭm prigi. Di tika anŭ raja aŭn kuka udung di Tiban Benjamin.

⁸Jadi Ebedmelech di kamanŭ ka nang di raja,

⁹“Tuan Raja, kayuh adi bara daya anŭ mbŭh ndai inŭh sarah. Ngara mbŭh na Jeremiah darŭm prigi, di yŭn ayŭh tatu re kabŭs sikirau, amai mating tia pinguman darŭm kupo.”

¹⁰Komŭnŭ raja nggen ukum bada Ebedmelech di tambit aku ngga taruh naan daya ka tarik aku so darŭm prigi anŭ diŭ so aku kabŭs.

¹¹Jadi Ebedmelech di ngga ngara anŭ ka birit-pinyirikŭn istana ka tambit kada piraka adi amba adi-i bisor ka yŭn ku pakai taris.

¹²Ayŭh bada aku na jukat anŭ di kirapa ku, isa taris anŭ dŭh bada aku kinaman. Aku ndai simŭnŭ,

¹³ka ngara tarik aku so darŭm prigi anŭ. Ripas anŭ aku dog kurung di badag istana.

¹⁴Agi ndi sidah meh Raja Zedekiah bada aku dog taban mŭrŭt ka yŭn adŭp-i di aran mŭrŭt Ramin TUHAN adi numbor taruh, ka-i nang, “Aku an siken kayuh so kuu, ka aku raan kuu kidaan kayuh adi sawŭ di aku.”

¹⁵Aku nam, “Kambŭi aku kidaan kayuh adi sawŭ di kuu, kuu re siŭ aku, ka kambŭi aku nggen pinyitayan di kuu, kuu dŭh mbit piduri.”

¹⁶Jadi Raja Zedekiah bijanji ngga aku darŭm bisukan, “Aku bipayu pakai adŭn Tapa, Tapa adi nggen di ata asŭng, aku dŭh re siŭ kuu bait nggen kuu ka darŭm tangan daya adi raan siŭ kuu.”

¹⁷Komŭnŭ aku kidaan di Zedekiah nang TUHAN Bisa-pŭrŭg, adi Tapa Israel, mbŭh nang, “Kambŭi kuu nyerah adŭp mu ka darŭm tangan bara pingubak soldadu raja Babylonia, kuu dŭh re dog siŭ, ka kupo ati dŭh re dog sigot. Kuu ngga rawang mu re dŭh dog siŭ.

¹⁸Pak kambŭi kuu dŭh nyerah adŭp mu, kupo ati re dog nggen di bara daya Babylonia, adi re badang-i, ka kuu dŭh re dapŭd pirupas adŭp mu so ngara.”

¹⁹Pak raja nam, “Aku taru rayat adŭp ku adi mbŭh bu ka parad daya Babylonia. Kadŭ aku re dog nggen ka darŭm tangan ngara ka dog kijera ngara.”

²⁰Aku nang, “Kuu dŭh re dog nggen ka darŭm tangan ngara. Aku mite kuu tunda pinganang TUHAN; ka sopŭrŭg kayuh re siramat, ka kuu dŭh re dog siŭ.

²¹Pak TUHAN mbŭh kiren di aku keya ka darŭm pŭmŭh kayuh adi re jadi di kuu kambŭi kuu abah nyerah adŭp mu.

²²Aku kiris keya ka darŭm pŭmŭh sopŭrŭg dayung adi babŭ di istana raja Judah dog taban ka bara pingubak soldadu raja Babylonia. Dingah kayuh adi ngara nang darŭm ngara panu: ‘Raja anŭ dog nipu bara jerā adŭp-i, ngara mbŭh nguasa ayŭh. Ka madin amai kaja-i mbŭh timŭtŭm di tawang, bara jerā-i mbŭh tagan ayŭh.’ ”

²³Komŭnŭ aku nang dinge, “Sopŭrŭg dayung mu ngga bara anak mu re dog taban ka Babylonia, ka kuu re dŭh tungang pirupas adŭp mu so ngara. Kuu re jadi daya-takap raja Babylonia, ka kupo ati re dog sigot ndŭg ka rŭpŭg.”

²⁴Zedekiah nam, “Dŭhnyah bada daya puan pasar piminyu ta ati, isa kuu dŭh dog siŭ.

²⁵Kambŭi bara pingubak soldadu dingah aku agi minyu ngga kuu, ngara re tudu kuu ka siken di kuu kayuh adi ata mbŭh nang. Ngara re bijanji dŭh siŭ kuu kambŭi kuu kidaan sopŭrŭg-i.

²⁶Batur nŭŭh kidaan di ngara nang kuu mite turung so aku bada dŭh pait kuu pari ka ramin jer ka tandah kuu kabŭs diginŭ.”

²⁷Ripas anŭ sopŭrŭg pingubak soldadu mandŭg ka siken aku, ka aku kidaan di ngara kayuh adi raja bada aku nang. Ripas so anŭ, mating kayuh bisa ngara ndai, sabab mating daya puan pasar piminyu ami duwŭh.

²⁸ Aku dog kurung di badag istana anŭ ndŭg ka andu adi ngga Jerusalem dog sirabut.