Read Biatah Bidayuh JEREMIAH 39 Bible Online

JEREMIAH 39 - Biatah Bidayuh bible

JEREMIAH 39

¹Di buran adi simŭng darŭm sawa adi prii Zedekiah jadi raja Judah, Raja Nebuchadnezzar so Babylonia mandŭg ngga sopŭrŭg tibaran bara soldadu-i ka nyerang Jerusalem.

²Di andu adi prii darŭm buran adi pat darŭm sawa adi simŭng ndi Zedekiah jadi raja, pinganyu dapŭd miratos sindung kuta kupo.

³(Kan Jerusalem dog sirabut,[46] sopŭrŭg pingubak soldadu raja Babylonia adi baga pangkat-i mandŭg ka guru di Tiban Yūn, samŭn Nergal Sarezer, Samgar Nebo, Sarsechim, ka Nergal Sarezer adi bŭkŭn).[47]

⁴Kan Raja Zedekiah ngga sopŭrŭg soldadu-i kiris kayuh adi mbŭh jadi, ngara suba bu so kupo singarŭm. Ngara bu so teya raja ka so tiban-bās adi tubu duwŭh sindung, ka bu kadŭg aran nuju parad ka Rubān Jordan.

⁵Pak tibaran bara soldadu Babylonia tadak ngara ka nakap Zedekiah di rabak sindŭk Jericho. Komŭnŭ ngara taban ayŭh ka Raja Nebuchadnezzar, nganŭ di kupo Riblah di utung tarun tana Hamath, ka diginŭ Nebuchadnezzar miratak ukum di tunduh ayŭh.

⁶Di Riblah ayŭh siŭ anak anak dari Zedekiah di sirung jawin adŭp Zedekiah, ka ayŭh siŭ gŭh bara pinurung pritah Judah.

⁷Ripas anŭ, ayŭh bada ruwang ruwang batŭh Zedekiah dog tuket ka bada ayŭh dog muak ngga parik basi ka dog taban ka Babylonia.

⁸Atan anŭ, bara soldadu Babylonia badang istana raja, ramin ramin daya ka nyirubuh sindung Jerusalem.

⁹Sikasŭn-i Nebuzaradan, adi pingibās soldadu, taban ngga bu jadi daya-takap bara daya adi dŭm darŭm kupo di ka Babylonia, samŭn ngara adi mbŭh mŭrŭt parad ka adŭp-i.

¹⁰Ayŭh tingge di Judah daya adi siabo sirata, adi dŭh biyŭn ani ani, ka ayŭh nggen di ngara teya anggor samŭn ŭmŭh.

¹¹Raja Nebuchadnezzar pesan di Nebuzaradan, adi pingibās soldadu, bada nggen ukum sakati:

¹²“Di jiroh Jeremiah ka nakit kingat ayŭh. Dŭhnyah ida ida ngga ayŭh, pak ndai yŭn-i ani ani adi raan-i.”

¹³Jadi Nebuzaradan, ngga pingubak pingubak adi dŭn Nebushazban ngga Nergal Sarezer samŭn sopŭrŭg pingubak soldadu raja Babylonia adi bŭkŭn,

¹⁴tambit aku so badag istana. Ngara bada aku dog kingat Gedaliah, adi anak Ahikam ka sukuh Shaphan, adi nguru aku mari ngga siramat. Ka aku rŭŭ diginŭ di dupan bangsa adŭp ku.

¹⁵Sitadŭn aku darŭm jer di badag istana, TUHAN bada aku

¹⁶kidaan di Ebedmelech adi daya Ethiopia nang TUHAN Bisa-pŭrŭg, adi Tapa Israel, mbŭh nang, “Sak adi nang Ku, Aku re taban bada nyatŭk kupo anŭ pinyirusag ka dŭh pimujur. Ka kan kayuh mbŭh tambus, kuu re agi diginŭ ka kiris-i.

¹⁷Pak Aku, adi TUHAN, re grindung kuu, ka kuu re dŭh dog nggen ka darŭm tangan ngara adi kuu taru.

¹⁸Aku re nyiramat kuu, ka kuu re dŭh dog siŭ. Kuu re siramat sabab kuu mbŭh na pinyabah mu di Aku. Aku, adi TUHAN, mbŭh minyu.”