Read Biatah Bidayuh JEREMIAH 4 Bible Online

JEREMIAH 4 - Biatah Bidayuh bible

JEREMIAH 4

¹TUHAN nang, “Daya Israel, kambŭi kuu raan pari, marik pimudip mu pari ka Aku. Kambŭi kuu tŭtŭd di Aku ka taran tibudo tibudo anŭ adi Aku tiru,

²kuu bisa bipayu pakai adŭn Ku. Komŭnŭ[3] sopŭrŭg bangsa re mite Aku nyiberkat ngara, ka ngara re muji Aku.”

³ TUHAN nang di daya Judah ngga daya Jerusalem, “Majak tana ngan adi bayuh dog majak; dŭhnyah nabur bine di karu reja.

⁴Sita simanya adi angān ndai ngga Aku adi TUHAN ngan, ka nitah adŭp ngan ka Aku, angān daya Judah ngga daya Jerusalem. Kambŭi dŭh, baji Ku re bijagu mun apui adi dŭh tungang dog mura, sabab pingandai arap ngan.”

⁵Mambak trompet di ndi tarun tana! Nyirais ngga tarang! Bada daya Judah ngga daya Jerusalem bikaduh ka kupo kupo adi bikuta.

⁶Tiju aran di ka Zion! Rikas di nyiramat adŭp ngan! Dŭhnyah nyikite! TUHAN inŭh taban pinyirusag ngga pinyirabur so utara.

⁷Keya ka singah ruah so tarun yŭn-i bisukan, pinyirabur bangsa mbŭh matak. Ayŭh mandŭg di pirabur Judah. Kupo kupo Judah re rubuh, ka mating daya re rŭŭ dieh.

⁸Ngapŭi kasŭk piraka banang guni, ka muās ka sien sabab bisā baji TUHAN bayuh tingge Judah.

⁹TUHAN nang, “Di andu anŭ raja raja ngga bara pinurung pritah re taru; bara imam re gŭgŭh ka bara nabi re inga inga.”

¹⁰Komŭnŭ aku nang, “TUHAN Raja, Kaam mbŭh batur batur nipu daya Jerusalem! Kaam ko nang re agi damai, pak pedang mbŭh di tungo ngara.”

¹¹Tika-i re mandŭg kan daya Jerusalem re dog kidaan nang sabak paras so tarun tana-pajam mbŭh poh ka parad ngara. Dŭh-i sabak adi kaŭs-i tungang poh aping.

¹²Sabak adi mandŭg so ka pesan TUHAN inŭh bake so anŭ! Adŭp TUHAN inŭh adi pirabu ukum di tunduh daya-I.

¹³Tingga, pinganyu mbŭh mandŭg mun abun. Krita krita kuda ngara mun sabak biriyung, ka kuda kuda ngara raju mun beuh. Arah ata! Mŭmbŭh inŭh ata!

¹⁴Jerusalem, musor arap so atin mu, isa kuu bisa dog nyiramat. Ndŭg sinde pikir mu puno ngga kayuh adi bidosa?

¹⁵Pinyisung so kupo Dan ngga so sandah sandah Ephraim kidaan agah arap.

¹⁶Ngara mbŭh mandŭg an bakan bangsa bangsa ka kidaan di Jerusalem nang pinganyu mbŭh aŭn mandŭg so rais adi jo. Bara pinganyu anŭ re nyirais natang kupo kupo Judah

¹⁷ka re kirurung Jerusalem mun daya nguan teya, sabab daya Jerusalem mbŭh rawan TUHAN. TUHAN mbŭh minyu.

¹⁸Judah, kuu mbŭh bada kayuh anŭ nyatŭk adŭp mu so pimudip mu ngga kayuh adi kuu mbŭh ndai. Dosa adŭp mu mbŭh taban sangsara anŭ, ka-i mbŭh tabŭk atin mu.

¹⁹Andam-i! Dŭh aku tan nyinjŭn-i! Atin ku! Atin ku mbŭh simadup! Aku dŭh dapŭd bada-i tanang; Aku dingah jawŭn trompet ngga sirais perang.

²⁰Pinyirusag ndi dog tunda pinyirusag andi; ndi tarun tarun tana rais mbŭh rabur. Gŭgŭh bari bari ami mbŭh dog pirusak; dudu tabir-i mbŭh tiratak.

²¹Ndŭg sinde aku dŭh siŭn dŭh kiris bisaad ati ka dingah jawŭn trompet?

²²TUHAN nang, “Daya Ku inŭh budo; ngara dŭh puan Aku. Ngara mbŭh keya ka bara anak-sŭ adi budo; ngara dŭh biyŭn atin mirati. Ngara sukup pandai ndai kayuh adi arap, pak dŭh pandai ndai kayuh adi kana.”

²³Aku tingga ong, ka mating ani ani dieh buang matung. Aku tingga rangit, ka mating sekar jawa dieh.

²⁴Aku tingga darŭd, sopŭrŭg-i bigagar, ka sandah sandah biguyut.

²⁵Aku mating kiris manusia; ndŭg ka manuk mbŭh mikabur bu.

²⁶Tana damŭn mbŭh jadi tarun tana-pajam; kupo kupo-i mbŭh rubuh sabab bisā baji TUHAN.

²⁷(TUHAN mbŭh nang ndi ong ong re jadi tarun tana-pajam, pak Ayŭh dŭh re kubo pirabur-i.)

²⁸Ong re ngurid; rangit re karŭm. TUHAN mbŭh minyu ka re dŭh nukar pikir-I. Ayŭh mbŭh matŭd pikir-I ka re dŭh pari.

²⁹Dingah jawŭn bara pinunggang kuda ka bara adi tukang nimbak reja-panah sopŭrŭg daya re bikaduh bu. Agi adi bu ka tuān, adi bŭkŭn re jakŭh dudu batuh. Barang kupo re dog tingge, ka mating daya re tia rŭŭ dieh.

³⁰Jerusalem, mŭmbŭh inŭh kuu! Mani kuu nēn piraka bireh? Mani kuu kasŭk pimakai mas ka ngudat batŭh mu? Mating guna-i kuu bada adŭp mu ramus! Bara ambai mu mbŭh tirawan kuu ka raan siŭ kuu.

³¹Aku dingah sirŭŭn daya sien, sak dayung naman sarang andam re biranak, sirais sak dayung ruwan anak pinuai-i. Anŭ inŭh sien Jerusalem tarik apŭg asŭng-i, pakat tangan-i buang nang, “Mŭmbŭh inŭh aku! Ngara mandŭg re siŭ aku!”