Read Biatah Bidayuh JEREMIAH 44 Bible Online

JEREMIAH 44 - Biatah Bidayuh bible

JEREMIAH 44

¹TUHAN minyu ngga aku pasar sopŭrŭg daya Israel adi rŭŭ di Egypt, di kupo Migdol, Tahpanhes, Memphis, ka di tarun tana rais parad ka siratan.

²TUHAN Bisa-pŭrŭg, adi Tapa Israel, nang, “Adŭp ngan mbŭh kiris pinyirusag adi Aku mbŭh bada nyatŭk Jerusalem ngga sopŭrŭg kupo adi bŭkŭn di Judah. Ndŭg madin, sopŭrŭg-i babŭ nyibawang, ka mating daya rŭŭ dieh

³sabab daya-i mbŭh ndai arap ngga kinuas Aku. Ngara jugan sadis ka tapa tapa bŭkŭn ka bituan di tapa tapa adi adŭp ngara bait kuu bait tayung-babuk ngara bŭn nyambah.

⁴Aku adu adu pait urun Ku adi bara nabi, adi kidaan di angān bada dŭh ndai kayuh adi sipŭ anŭ adi Aku tiru.

⁵Pak angān dŭh an dingah ka abah mbit piduri. Angān abah pasan kraja pingandai arap ngan anŭ adi jugan sadis ka tapa bŭkŭn.

⁶Jadi baji bangok Ku nyatŭk kupo kupo di Judah ka di aran aran di Jerusalem, ka Aku sigot sopŭrŭg-i. Sopŭrŭg anŭ mbŭh jadi tugung rakang tibawang adi tikŭnŭd daya kiris, ndŭg andu ati.

⁷“Ngapŭi meh Aku, adi TUHAN Bisa-pŭrŭg, adi Tapa Israel, madin siken mani angān ndai kayuh adi arap mun anŭ di tunduh adŭp ngan. Angān raan bada pinyirusag nyatŭk bara dari ngga bara dayung, anak-anya ngga anak anak pira, isa daya ngan mating tia dŭm kah?

⁸Mani angān bada Aku baji ngga pingandai ngan adi nyambah tibudo ka nyadis ka tapa bŭkŭn digiti di Egypt, tarun yŭn ngan rŭŭ madin? Angān ndai simŭnŭ ngga pirabur adŭp ngan kah, isa barang bangsa di ong ngamun angān ka pakai dŭn ngan ndu pangu?

⁹Mbŭh kambŭt ngan kah sopŭrŭg pingandai ginaka adi tayung-babuk ngan, raja raja Judah ngga sawŭn sawŭn ngara, ka angān ngga sawŭn sawŭn ngan, mbŭh ndai di kupo kupo Judah ka di aran aran di Jerusalem?

¹⁰Pak ndŭg andu ati angān gi-mating pirapat adŭp ngan. Angān gi-mating stabi di Aku bait udip nanyam ka sopŭrŭg ukum-adat adi Aku mbŭh nggen di angān ka di tayung-babuk ngan.

¹¹“Jadi meh, Aku, adi TUHAN Bisa-pŭrŭg, adi Tapa Israel, re natang angān ka pirabur ndi tarun tana Judah.

¹²Ka bara daya Judah adi babŭ di Judah ka adi mbŭh bigŭtŭ an di ka rŭŭ di Egypt, Aku re manŭn re pirabur ngara. Sopŭrŭg ngara, adi bās ngga adi sŭ, re kabŭs di Egypt, darŭm perang bait sabab sikirau. Ngara re jadi kayuh adi tikŭnŭd daya kiris; daya re ngamun ngara ka pakai dŭn ngara ndu pangu.

¹³Aku re ngukum ngara adi rŭŭ di Egypt, mun Aku ngukum Jerusalem pakai perang, udip sikirau, ka andam.

¹⁴Mating so daya Judah adi babŭ di Judah ka adi mbŭh di ka rŭŭ di Egypt re dapŭd pirupas adŭp ngara bait siramat. Mating so ngara re pari ka Judah, sunggu agi so ngara mbŭh jabŭng an pari rŭŭ di rais adŭp ngara dinge. Mating so ngara re pari adŭ-i kudu kudu naan daya adi bu mangān adŭp-i dog siŭ.”

¹⁵Komŭnŭ sopŭrŭg dari adi puan sawŭn sawŭn ngara agi jugan sadis ka tapa tapa bŭkŭn, ka sopŭrŭg dayung adi mijog diginŭ, samŭn bara daya Israel adi rŭŭ di siratan Egypt -- ngara nang di aku,

¹⁶“Kieh dŭh an dingah kayuh adi kuu nang ngga adŭn TUHAN.

¹⁷Kieh re ndai sopŭrŭg anŭ adi kieh nang re ndai. Kieh re jugan sadis ka tapa ami, Rani Shorga, ka kieh re jugan sadis wain ka ayŭh, nimun adi mbŭh ami ngga tayung-babuk ami, raja ami ka pinguru ami ari ndai di kupo kupo di Judah ka di aran aran di Jerusalem. Komŭnŭ kieh re biyŭn bagŭ pinguman, kieh re udip mujur, ka dŭh biyŭn pinyusah.

¹⁸Pak so andu kieh mbŭh dŭh tia jugan sadis ka Rani Shorga ka dŭh tia jugan sadis wain ka ayŭh, kieh mbŭh dŭh biyŭn ani ani, ka daya ami mbŭh kabŭs darŭm perang ka kabŭs sikirau.”

¹⁹Ka bara dayung nambah nang, “Kan kieh ndai kue tunda gayŭn Rani Shorga, jugan sadis ka ayŭh, ka jugan sadis wain ka ayŭh, banŭh ami situju di pingandai ami.”

²⁰Komŭnŭ aku nang di sopŭrŭg dari ngga dayung adi mbŭh nam aku sakanŭ,

²¹“Mun sadis sadis adi angān ngga tayung-babuk ngan, raja raja ngan ngga bara pinguru ngan, ka daya tarun tana rais ngan, jugan di kupo kupo di Judah ka di aran aran Jerusalem, angān pikir TUHAN dŭh puan ka mbŭh kambŭt kah?

²²Ndŭg andu ati tarun tana ngan nyibawang ka mating daya rŭŭ dieh. Tarun tana ngan anŭ mbŭh jadi kayuh adi tikŭnŭd daya kiris, ka daya pakai dŭn-i ndu pangu sabab TUHAN mbŭh dŭh tia tan kiris kraja pingandai arap ngan ngga udip ginaka ngan.

²³Pinyirusag ati adi madin inŭh sabab angān jugan sadis ka tapa tapa bŭkŭn ka bidosa rawan TUHAN darŭm angān nyibireu sopŭrŭg pesan-I.”

²⁴Aku kidaan di sopŭrŭg daya, rabis-i di bara dayung, kayuh adi TUHAN Bisa-pŭrŭg, adi Tapa Israel, mbŭh nang di daya Judah adi rŭŭ di Egypt: “Angān ngga sawŭn sawŭn ngan mbŭh bipayu ngga Rani Shorga. Angān bijanji nang angān re jugan sadis ngga sadis wain ka ayŭh, ka angān mbŭh sita janji ngan. Kana! Sita janji ngan! Ndai meh nanyam ka payu ngan!

²⁶Pak madin dingah payu adi Aku, adi TUHAN, mbŭh ndai ngga adŭn Ku adi bikuasa di sopŭrŭg ngan daya Israel di Egypt: Aku re dŭh tia bada tadŭ tadŭ so angān pakai adŭn Ku ngga bipayu nang, ‘Aku bipayu pakai adŭn TUHAN Raja adi udip!’

²⁷Aku manŭn puan angān dŭh re mujur, pak re dog pirabur. Sopŭrŭg ngan re kabŭs, darŭm perang bait sabab andam, ndŭg ka angān mbŭh mating dŭm.

²⁸Pak kudu kudu naan adŭ so angān re dapŭd pirupas adŭp ngan so dog siŭ ka bu so Egypt pari ka Judah. Komŭnŭ ngara adi siramat re puan nang pinganang asi adi sawŭ bitŭtŭk, jaku kah tung ngara.

²⁹Aku, adi TUHAN, re nggen di angān tandā adi kiren nang Aku sawŭ re ngukum angān di tarun yŭn ati ka janji Ku, adi re taban pinyirusag bada nyatŭk angān, re sawŭ jadi bitŭtŭk.

³⁰ Aku re nggen Hophra adi raja Egypt ka darŭm tangan bara pinganyu-i adi raan siŭ ayŭh, nimun Aku muko nggen Zedekiah adi raja Judah ka darŭm tangan Raja Nebuchadnezzar so Babylonia, adi pinganyu-i ka adi raan siŭ ayŭh.”