Read Biatah Bidayuh JEREMIAH 48 Bible Online

JEREMIAH 48 - Biatah Bidayuh bible

JEREMIAH 48

¹ Ati inŭh kayuh adi TUHAN Bisa-pŭrŭg nang pasar Moab: “Tadah gŭh daya Nebo kupo ngara mbŭh dog pirabur! Kiriathaim mbŭh dog sirabut, kuta kuta-i adi tagap mbŭh rubuh. ka daya-i mbŭh dog pimangŭh;

²Sangŭn Moab mbŭh mating tia. Pinganyu mbŭh sirabut Heshbon ka mbŭh bipekat an pirabur bangsa Moab. Kupo Madmen re pajam; tibaran tibaran bara soldadu re baris di nyerang-i.

³Bara daya di Horonaim nyirais nang, ‘Pinyiganas! Pinyirusag!’

⁴“Moab mbŭh dog pirabur; dingah sirŭŭn bara anak-sŭ sien.

⁵Dingah sakuk sien ngara di ndi aran aran ndŭg Luhith, sakuk sien amai susah di aran mūn ka Horonaim.

⁶‘Rikas, di nyiramat adŭp ngan!’ ngara nang. ‘Bikaduh mun kaldi tarun tana-pajam!’

⁷“Moab, kuu sabah di pinyibake ngga pinyikaya adŭp mu, pak madin kuu re dog ngarah gŭh; tapa mu Chemosh re dog taran ka rais tami, samŭn bara pinguasa-i ngga bara imam-i.

⁸Ndi kupo dŭh gŭh re dapŭd pirupas adŭp-i so pinyirusag; rubān ngga rabak re rusag. Aku, adi TUHAN, mbŭh minyu.

⁹Pijog tandā kubur yŭn Moab; rais anŭ re rikas dog pirabur. Kupo kupo-i re rubuh, ka mating daya re rŭŭ diginŭ tia.”

¹⁰(Mangu ngara adi dŭh ndai kraja TUHAN ngga siabo atin ngara! Mangu ngara adi dŭh japa ka adi dŭh siŭ!)

¹¹TUHAN nang, “Tian-ti Moab ari udip pagŭng ka bŭn dog taran ka rais tami. Moab mbŭh keya ka wain adi dog tandah tui ka dŭh dog ren so tipayan ndi ka tipayan andi. Sap-i babŭ kana, ka babŭ buuh sidi.

¹²“Jadi madin, tika-i mbŭh mandŭg adi ngga Aku re pait daya bada ren Moab keya ka wain. Ngara re kangan tipayan wain ngara ka mape-i bada randŭk.

¹³Komŭnŭ daya Moab re asa bada Chemosh adi tapa ngara, nimun daya Israel mbŭh asa bada Bethel, tapa adi ngara sabah.

¹⁴“Daya Moab, mani angān nang adŭp ngan pimagan, bara soldadu adi ko dog suba darŭm perang?

¹⁵Moab ngga kupo kupo-i mbŭh dog nyerang; bara dari-i adi mara mbŭh dog siŭ. Aku ati raja, adi TUHAN Bisa-pŭrŭg, ka Aku mbŭh minyu.

¹⁶Pinyirabu Moab mbŭh sindŭk dŭm dŭh tui Moab re rubuh.

¹⁷“Ngurid bangsa anŭ, angān adi rŭŭ sindŭk anŭ, sopŭrŭg ngan adi puan sangŭn-i. Nang, ‘Pinyipritah-i adi bikuasa mbŭh rubuh; bragah-i ngga pinyibake-i mbŭh mating tia.’

¹⁸Angān adi rŭŭ di Dibon, mūn so takta so yŭn ngan dog stabi ka guru darŭm dabu di tana; sianŭ adi tukang pirabur Moab mbŭh mandŭg ka mbŭh nyirubuh kuta kuta-i.

¹⁹Angān adi rŭŭ di Aroer, mijog di pang aran ka kajŭn; siken ngara adi bikaduh bu, pasar kayuh adi mbŭh jadi.

²⁰‘Moab mbŭh rabu,’ ngara re nam, ‘muās-i; Moab mbŭh dog pimangŭh. Piagah di barang naan daya di Yang Arnon nang Moab mbŭh dog pirabur!’

²¹“Ukum mbŭh mandŭg ka kupo kupo di tarun tana adi rata buang bayah bigatung: kupo Holon, kupo Jahzah, kupo Mephath,

²²kupo Dibon, kupo Nebo, kupo Beth Diblathaim,

²³kupo Kiriathaim, kupo Bethgamul, kupo Bethmeon,

²⁴kupo Kerioth, ka kupo Bozrah. Ukum mbŭh mandŭg ka sopŭrŭg kupo di Moab, adi jo ngga adi sindŭk.

²⁵Pinyibake Moab mbŭh dog nyirubuh; kuasa-i mbŭh dog pirabur. Aku, adi TUHAN, mbŭh minyu.”

²⁶TUHAN nang, “Bada Moab mabuk, sabab-i mbŭh rawan Aku. Moab re bigurai di uta adŭp-i, ka daya re tawŭh.

²⁷Moab, ingat munki kuu tawŭh daya Israel? Kuu bada ngara mun daya adi dog nakap samah ngga bara pirupak.

²⁸“Angān daya adi rŭŭ di Moab, bu so kupo kupo ngan! Panu di rŭŭ di arong jenjang! Bada adŭp ngan mun manuk asang adi bisarin di jenjang.

²⁹Moab inŭh raru sambuh! Aku agi dingah munki masam sambuh, gambung, miruap inŭh daya-i, ka nyibaga adŭp ngara.

³⁰Aku, adi TUHAN, puan atin gambung ngara. Pinganang sambuh ngara dŭh biyŭn rati, ka kayuh adi ngara ndai inŭh dŭh biguna.

³¹Ngapŭi Aku re muās barang naan daya di Moab ka simŭnŭ gŭh Aku re muās daya di Kir Heres.

³²Aku re sien nyibara daya Sibmah, rabis so Aku sien nyibara daya Jazer. Kupo Sibman, kuu inŭh keya ka tŭngŭn anggor adi ambu daan-i jeh mutas Rawŭt Pide ka jeh ndŭg Jazer. Pak madin buwa tipuh paras mu ngga buwa anggor mu mbŭh dog pirusak.

³³Pinyigaŭn ngga pawŭn mbŭh miyap so tarun tana damŭn Moab. Aku mbŭh bada wain ko ruah so tarun yŭn daya mŭ anggor; mating tia daya tukang ndai wain ka nyirais ngga gaŭn.

³⁴“Daya Heshbon ngga Elealeh nyirais,[56] ka sirais ngara dapŭd dog dingah jeh ndŭg Jahaz. Sirais anŭ dapŭd dog dingah daya di Zoar, ka dog dingah jeh di Horonaim ngga Eglath Shelishiyah. Sungi Nimrim gŭh mbŭh badŭh.

³⁵Aku re pirŭŭ daya Moab jugan sadis badang di tarun yŭn ngara bisambah, ka pirŭŭ ngara jugan sadis sadis adi bŭkŭn ka tapa tapa ngara. Aku, adi TUHAN, mbŭh minyu.

³⁶“Jadi atin Ku ngurid daya Moab ngga daya Kir Heres, mun daya main ragu nyikubur ngga tirari, sabab sopŭrŭg kayuh adi ngara dapu mbŭh mating tia.

³⁷Sopŭrŭg ngara mbŭh nundo ubak ngara ka gumbak gagap. Sopŭrŭg ngara mbŭh nidi tangan ngara, ka barang naan mbŭh nēn piraka banang guni.

³⁸Di tibung sopŭrŭg ramin di Moab ka di sopŭrŭg pakan taŭn mbŭh yŭn daya ngurid adŭ, sabab Aku mbŭh pirandŭk Moab mun tipayan adi dŭh daya raan.

³⁹Moab mbŭh asur! Sien! Moab mbŭh dog pimangŭh. Moab mbŭh rubuh, ka sopŭrŭg bangsa adi maning-i tawŭh ayŭh. Aku, adi TUHAN, mbŭh minyu.”

⁴⁰TUHAN mbŭh bijanji nang ndi bangsa re mūn nyambar Moab mun beuh ngga urad urad-i tiburai,

⁴¹ka kupo kupo ngga kuta kuta re dog sirabut. Di andu anŭ bara soldadu Moab re tikaran mun dayung naman sarang andam re biranak.

⁴²Moab re dog pirabur ka re dŭh tia jadi ndi bangsa, sabab-i nyambuh adŭp-i rawan Aku.

⁴³Pinyitaru, rubang, jarat mbŭh kajŭn daya Moab. TUHAN mbŭh minyu.

⁴⁴Asi asi adi suba an pirupas adŭp-i so pinyitaru anŭ re rabu ka darŭm rubang, ka asi asi adi jakŭh an ruah so rubang anŭ re dog jarat, sabab TUHAN mbŭh miratak tika adi ngga Moab dog pirabur.

⁴⁵Daya adi dŭh dapŭd ndai ani ani ka adi mbŭh bu mangān rais adŭp-i, suba an dapŭd pinyigrindung di Heshbon, kupo adi Raja Sihon ko mritah dawŭ-i, pak madin mbŭh dog man apui.[57] Apui mbŭh man gadung tarun ngga tarun tana darŭd daya Moab adi suka biperang.

⁴⁶Tadah gŭh daya Moab! Daya adi nyambah Chemosh mbŭh dog pirabur, ka anak anak dari ngga anak anak dayung ngara mbŭh dog taban ngga bu jadi daya-takap.

⁴⁷Pak di tika adi re mandŭg TUHAN re bada Moab mujur dinge. Sopŭrŭg anŭ inŭh kayuh adi TUHAN mbŭh nang re jadi di Moab.