Read Biatah Bidayuh JEREMIAH 49 Bible Online

JEREMIAH 49 - Biatah Bidayuh bible

JEREMIAH 49

¹ Ati inŭh kayuh adi TUHAN nang pasar Ammon: “Diki bara dari Israel? Mating kah daya re ngibān rais-i? Mani ngara bada daya adi nyambah Molech tambit tarun tana tibaran-asar Gad ka rŭŭ dieh?

²Pak tika-i re mandŭg kan Aku re bada daya di sindŭ kupo Rabbah dingah jawŭn daya biperang. Kupo Rabbah re rubuh ka dog sigot ndŭg ka rŭpŭg. Komŭnŭ Israel re tambit pari tana-i adi ko dog sirabut so ngara.

³Daya Heshbon, sien meh! Ai mbŭh dog pirabur! Bara dayung Rabbah, panu di sua ngurid! Nēn piraka banang guni ka ngurid. Bikaduh kandang-kandŭ meh. Tapa ngan Molech re dog taran ka rais tami, samah ngga bara imam-i ka bara pinguasa-i.

⁴Mani angān mingangŭn, angān daya adi dŭh tŭtŭd? Pinyibake ngan mbŭh re miyap. Mani angān sabah di kuasa adŭp ngan ka nang daya mating birani nyerang angān?

⁵Aku re taban pinyitaru ka angān so barang parad. Sopŭrŭg ngan re bikaduh bu. Barang naan re bikaduh bu suba an nyiramat adŭp-i, ka mating daya re dapŭd bada bara soldadu ngan tikuruk dinge.

⁶“Pak sundis andu Aku re bada Ammon pari mujur. Aku, adi TUHAN, mbŭh minyu.”

⁷ Ati inŭh kayuh adi TUHAN Bisa-pŭrŭg nang pasar Edom: “Daya Edom mbŭh manyap pinyibijak kah? Mbŭh dŭh dapŭd kah bara tukang pitayan ngara kidaan di ngara kayuh adi patut ngara ndai? Mbŭh miyap kah pinyibijak ngara?

⁸Daya Dedan, bikaduh bu! Bisukan! Aku re pirabur bara sesang Esau, sabab tika-i mbŭh mandŭg adi ngga Ku ngukum ngara.

⁹Kan daya kutas buwa anggor, ngara tingge kada-i di atuh-i, ka kan pinaku mandŭg singarŭm, ngara tambit anŭ adi ngara raan adŭ.

¹⁰Pak Aku[58] mbŭh kubo tambit barang naan sesang Esau ka kiren tarun yŭn ngara bisukan, isa ngara dŭh dapŭd bisukan tia. Sopŭrŭg daya Edom mbŭh dog pirabur. Mating ngara dŭm.

¹¹Tingge anak tumang ngan ngga Aku, ka Aku re kingat ngara. Bara dayung uban ngan dapŭd bisangan di Aku.

¹²“Daya adi dŭh patut dog ukum sua gŭh dog ukum. Angān pikir adŭp ngan dŭh re dog ukum kah? Angān manŭn re dog ukum!

¹³Adŭp Ku mbŭh bipayu nang kupo Bozrah re jadi tarun tana-pajam ka kayuh adi tikŭnŭd daya kiris; daya re tawŭh-i ka pakai dŭn-i ndu pangu. Sopŭrŭg anak kupo maning anŭ re rubuh ka adu adu nyibawang. Aku, adi TUHAN, mbŭh minyu.”

¹⁴Aku nang, “Edom, aku mbŭh trima pinganang so TUHAN. Ayŭh mbŭh pait pinyisung bada kidaan di bangsa bangsa da nguruk tibaran tibaran bara soldadu ngara ka sidia yŭn re nyerang angān.

¹⁵TUHAN re bada angān ramah, ka mating daya re stabi di angān.

¹⁶Atin sambuh ngan mbŭh nipu angān. Mating daya taru di angān sak adi nang ngan. Angān rŭŭ di jenjang adi pibatuh, bigatung di tibung darŭd; pak sunggu angān rŭŭ di tarun yŭn adi bigatung mun beuh, TUHAN babŭ gŭh re taban angān ka sagān. TUHAN mbŭh minyu.”

¹⁷TUHAN nang, “Pinyirusag adi re nyatŭk Edom re raru bisā ndŭg ka barang naan daya adi murah-i re gŭgŭh ka taru.

¹⁸ Kayuh adi re jadi di Edom inŭh samah ngga anŭ adi mbŭh jadi di Sodom ngga Gomorrah, kan-i ngga kupo kupo adi maning-i dog pirabur. Mating daya re rŭŭ dieh tia. Aku, adi TUHAN, mbŭh minyu.

¹⁹Mun singah ruah so darŭm tarun adi tabar di arong Yang Jordan di ka tarun tana kupai, Aku re bada daya Edom nyirŭgŭh babak bu so rais ngara. Komŭnŭ daya adi Aku mien re mritah bangsa anŭ. Asi dapŭd dog danding ngga Aku? Asi birani natang Aku? Pimritah aki ndi adi dapŭd nyakar Aku?

²⁰Jadi nakit dingah kayuh adi Aku mbŭh ngatur ngga rawan daya Edom, ka kayuh adi Aku re ndai di daya di kupo Teman. Ndŭg ka anak anak ngara re dog batak ngga bu, ka sopŭrŭg re tikaran.

²¹Kan Edom rabu, re agi jawŭn adi raru bana ndŭg ka ndi ong ong re bigagar, ka sirais bara daya di kupo anŭ re dog dingah jeh ndŭg Tanjung Aqaba.

²²Pinganyu re nyerang Bozrah mun beuh mūn nyambar ngga urad-i tiburai. Di andu anŭ bara soldadu Edom re taru mun dayung adi aŭn re biranak.”

²³ Ati inŭh kayuh adi TUHAN nang pasar Damascus: “Daya adi rŭŭ di kupo Hamath ngga kupo Arpad mbŭh gapang buang susah sabab ngara mbŭh dingah agah arap. Atin gapang ngara nyarab ngara mun rawŭt, ka ngara dŭh dapŭd rŭŭ-paya.

²⁴Daya Damascus dŭh dapŭd ndai ani ani ka mbŭh babak bu amai taru. Ngara mandam buang sangsara mun dayung adi aŭn ruwan anak-i.

²⁵Kupo adi timagah adi ari pawŭn[59] mbŭh dog tagan.

²⁶Di andu anŭ bara dari ngara adi mara re dog siŭ di arong aran raya, ka sopŭrŭg soldadu-i re dog pirabur.

²⁷Aku re badang sindung Damascus ka re sigot bada rŭpŭg istana istana Raja Benhadad. Aku, adi TUHAN Bisa-pŭrŭg, mbŭh minyu.”

²⁸Ati inŭh kayuh adi TUHAN nang pasar tibaran-asar Kedar ngga utung tarun tana adi dog nguasa Hazor, adi mbŭh dog ngarah Raja Nebuchadnezzar so Babylonia: “Nyerang daya Kedar ka pirabur tibaran-asar daya timor!

²⁹Sirapas bari bari ngara ngga dāng kudip ngara, tabir bari ngara ngga sopŭrŭg kayuh darŭm bari ngara. Sirapas onta ngara ka kidaan di ngara, ‘Pinyitaru mbŭh kirurung angān!’

³⁰“Daya Hazor, Aku, adi TUHAN, bakan angān bada bikaduh bu ka tarun adi jo di bisukan. Raja Nebuchadnezzar so Babylonia mbŭh bipekat rawan angān, ka ati inŭh kayuh adi nang-i,

³¹‘Ja! Ata di nyerang daya adi kinyam adŭp-i siramat buang pagŭng! Kupo ngara dŭh biyŭn tiban-bās bait kusi ka taŭn dŭh dog grindung.’

³²Sirapas onta onta ngara samŭn sopŭrŭg dāng kudip ngara! Aku re bada papar sasah ka barang yŭn sinadan ngara adi kapŭg ubok-i bada purok, ka Aku re bada pinyirusag nyatŭk ngara.

³³Hazar re adu adu jadi tarun tana-pajam, tarun adi kaŭs-i yŭn kasong tarun bisukan. Mating daya re rŭŭ diginŭ tia. Aku, adi TUHAN, mbŭh minyu.”

³⁴Dŭh tui ripas Zedekiah jadi raja Judah, TUHAN Bisa-pŭrŭg minyu ngga aku pasar rais Elam.

³⁵Ayŭh nang, “Aku re siŭ sopŭrŭg soldadu adi pandai nimbak reja-panah adi mbŭh bada Elam jadi raru bikuasa.

³⁶Aku re bada sabak poh maka Elam so barang parad, ka Aku re bada daya-i papar sasah di barang yŭn, ndŭg ka mating rais dŭm adi bayuh ngara ka ngga bu mangān rais adŭp-i.

³⁷Aku re bada daya Elam taru pinganyu-i, adi raan siŭ ngara. Darŭm baji Ku adi bisā Aku re pirabur daya Elam ka pait tibaran tibaran bara soldadu bada rawan ngara ndŭg ka Aku mbŭh kubo siŭ ngara.

³⁸Aku re siŭ raja raja ngara ngga pinguru pinguru ngara, ka pijog takta Ku diginŭ.

³⁹Pak ripas anŭ Aku re bada daya Elam pari mujur. Aku, adi TUHAN, mbŭh minyu.”