Read Biatah Bidayuh JEREMIAH 50 Bible Online

JEREMIAH 50 - Biatah Bidayuh bible

JEREMIAH 50

¹ Ati inŭh pinganang adi dog nggen di aku pasar kupo Babylon ngga bara daya-i:

²“Kidaan agah anŭ di bangsa bangsa! Piagah-i! Nggen tandā ka pigarau agah anŭ! Dŭhnyah sukan-i! Babylon mbŭh rabu! Tapa-i Marduk mbŭh asur! Tibudo tibudo Babylon mbŭh dog pimangŭh, Gayŭn gayŭn-i adi sipŭ anŭ mbŭh dog pirandŭk!

³“Ndi bangsa so utara mbŭh mandŭg di nyerang Babylonia ka re bada-i jadi tarun tana-pajam. Daya ngga dāng dāng re bikaduh bu, ka mating daya re rŭŭ diginŭ.”

⁴TUHAN nang, “Kan tika anŭ mbŭh mandŭg, daya Israel ngga daya Judah re sien, jiroh Aku, adi Tapa ngara.

⁵Ngara re siken aran di ka Zion ka komŭnŭ di ka pinijū anŭ. Ngara re ndai simanya adi tan adu adu ngga Aku ka re dŭh miranggar-i.

⁶“Daya Ku mbŭh keya ka kaban biri adi pingingat-biri mbŭh bada manyap di arong darŭd. Ngara mbŭh bigandon mun kaban biri so darŭd ndi di ka darŭd andi, ka ngara mbŭh kambŭt tarun yŭn ngara rŭŭ.

⁷Ngara dog nyerang tadŭ tadŭ daya adi kiris ngara. Pinganyu ngara nang, ‘Ngara bidosa rawan TUHAN, ngapŭi kayuh adi ata ndai inŭh dŭh sarah. Tayung-babuk ngara sabah di TUHAN, ka adŭp ngara patut bijijŭ tŭtŭd di Ayŭh.’

⁸ “Daya Israel, bikaduh bu so Babylonia! Tingge rais anŭ! Jadi daya adi sibungas bu so nŭ!

⁹Aku re kies ndi tibaran bangsa bangsa adi bake di utara ka bada ngara nyerang Babylonia. Ngara re birisang rawan rais anŭ ka ngarah-i. Ngara anŭ pingasū adi sukup pandai, nimbak reja-panah adi bŭn aset.

¹⁰Babylonia re dog pirinda, ka ngara adi pirinda-i re taban ngga bu sopŭrŭg kayuh adi ngara raan. Aku, adi TUHAN, mbŭh minyu.”

¹¹TUHAN nang, “Daya Babylonia, angān pirinda bangsa Ku. Angān pawŭn ka gaŭn, panu kamati kamanŭ mun sapi bidigang di tunduh gandom bait mun kuda adi pira-mr|e adŭp-i,

¹²pak kupo bās adŭp ngan anŭ re dog pirinda ka dog ngamun. Babylonia re jadi bangsa adi siabo dŭh biguna; ka-i re jadi tarun tana-pajam adi dŭh biyŭn piin.

¹³Sabab baji Ku mating daya re rŭŭ di Babylon; Babylon re dog tingge nyibawang, ka sopŭrŭg adi murah-i re gŭgŭh ka inga inga.

¹⁴“Bara adi sukup pandai nimbak reja-panah, birisang meh yŭn re rawan Babylon ka kirurung-i. Nimbak sopŭrŭg reja-panah ngan ka Babylon, sabab-i mbŭh bidosa rawan Aku, adi TUHAN.

¹⁵Ngāb buang angān maning kupo anŭ! Madin Babylon mbŭh nyerah adŭp-i. Sindung sindung-i mbŭh dog miratos ka mbŭh rubuh.[60] Aku maras dendam di daya Babylonia. Jadi maras dendam meh angān di ngara, ka ndai di tunduh ngara nimun adi mbŭh ngara ndai di tunduh daya bŭkŭn.

¹⁶Dŭhnyah tandah daya nyipurun bait ngatŭm di rais anŭ. Barang naan daya tami adi agi rŭŭ diginŭ re taru tibaran bara soldadu adi nyerang anŭ ka re masin masin pari ka rais adŭp ngara.”

¹⁷TUHAN nang, “Daya Israel mbŭh keya ka biri, adi dog tadak singah ka mbŭh basak basik. Sibungas-i, ngara dog nyerang raja-empaya Assyria, ka komŭnŭ Raja Nebuchadnezzar so Babylonia mapa turang ngara.

¹⁸Sabab anŭ, Aku, adi TUHAN Bisa-pŭrŭg, adi Tapa Israel, re ngukum Raja Nebuchadnezzar samŭn rais-i, nimun Aku ngukum raja-empaya Assyria.

¹⁹Aku re pari daya Israel ka tarun tana adŭp ngara. Ngara re man pinguman adi timbu di Darŭd Carmel ka di utung tarun tana Bashan, ka ngara re man sopŭrŭg buwa pimuruh adi timbu di tarun tana Ephraim ngga Gilead.

²⁰Di tika anŭ, dosa re mating tia dog dapŭd di Israel, ka mating tia udip ginaka di Judah, sabab Aku re apun ngara adi Aku mbŭh nyiramat. Aku, adi TUHAN, mbŭh minyu.”

²¹TUHAN nang, “Nyerang daya Merathaim ka daya Pekod. Siŭ ka pirabur ngara.[61] Ndai sopŭrŭg kayuh adi Aku pesan di angān. Aku, adi TUHAN, mbŭh minyu.

²²Jawŭn daya bisaad dog dingah di tarun tana anŭ; anŭ inŭh pinyirusag bās.

²³Babylonia mukong ndi ong ong bada asur, ka madin pukong anŭ mbŭh asur! Sopŭrŭg bangsa mbŭh gŭgŭh bada kayuh adi mbŭh jadi di rais anŭ.

²⁴Babylonia, kuu rawan Aku, ka kuu mbŭh dŭh rada adŭp mu mŭrŭt ka darŭm jarat adi Aku mbŭh tŭŭn ngga nakap kuu.

²⁵Aku mbŭh kuka tarun adi yŭn sinyata Ku dog nyikŭn, ka darŭm baji Ku Aku mbŭh piruah-i, sabab Aku, adi TUHAN Raja Bisa-pŭrŭg, biyŭn kayuh adi re Ku ndai di Babylonia.

²⁶Nyerang-i so barang parad ka kuka tarun tarun adi yŭn gandom dog nyikŭn! Nugung kayuh sirapas bada mun tugung gandom! Pirabur kupo! Dŭhnyah kidŭm ani ani!

²⁷Siŭ sopŭrŭg soldadu ngara! Simŭnŭ inŭh nasip ngara, amai tika ngara dog ukum mbŭh mandŭg!”

²⁸(Bara daya adi bu mangān adŭp-i dog siŭ di Babylonia ka mandŭg ka Jerusalem, ka ngara kidaan munki TUHAN adi Tapa ta mbŭh maras kayuh adi daya Babylonia mbŭh ndai di Ramin TUHAN.)

²⁹ “Kidaan di bara soldadu adi tukang nimbak reja-panah bada nyerang Babylon. Tijuan barang naan daya adi pandai pakai bawŭh ngga reja-panah. Nyikapung kupo anŭ ka dŭhnyah bada tadŭ daya ruah. Maras di tunduh-i sopŭrŭg kayuh adi muko-i ndai, ka ndai di tunduh-i nimun-i mbŭh ndai di tunduh daya bŭkŭn, sabab-i mbŭh ndai simŭnŭ ngga atin gambung rawan Aku, adi Kudus yŭn Israel.

³⁰Ngapŭi bara dari-i adi mara re dog siŭ di aran aran kupo, ka sopŭrŭg soldadu-i re dog siŭ di andu anŭ. Aku, adi TUHAN, mbŭh minyu.

³¹“Babylonia, kuu mbŭh dog nguasa atin gambung mu, jadi Aku, adi TUHAN Bisa-pŭrŭg, mbŭh rawan kuu! Tika-i mbŭh mandŭg adi ngga Ku ngukum kuu.

³²Kuu bangsa adi sambuh re sikak ka rabu, ka mating daya re turung kuu makat. Aku re sigot kupo kupo mu, ka sopŭrŭg kayuh adi maning-i re abo dog pirabur.”

³³TUHAN Bisa-pŭrŭg nang, “Daya Israel ngga daya Judah dog kinanyuh. Sopŭrŭg adi nakap ngara mbŭh jaga ngara ngga nakit ka dŭh re pirupas ngara.

³⁴Pak sianŭ adi re nyiramat ngara inŭh bake; adŭn-I inŭh TUHAN Bisa-pŭrŭg. Adŭp-i re ngarun ngara ka re taban damai ka ong, pak Ayŭh re taban pinyusah ka daya Babylonia.”

³⁵TUHAN nang, “Pirabur meh Babylonia! Pirabur daya-i, samŭn bara pinguasa-i, samŭn bara daya-i adi bijak.

³⁶Pirabur bara nabi-i adi pingadong, ngara adi raru budo anŭ! Pirabur bara soldadu-i, munki masam tikaran-i ngara!

³⁷Pirabur bara kuda ngga krita kuda-i! Pirabur bara soldadu-i adi dog ngupah -- munki masam ramah meh ngara! Pirabur pinyikaya-i; pirinda ka sirapas meh.

³⁸Taban apag ka tarun tana anŭ ka nyibadŭh sungi sungi-i. Babylonia inŭh tarun tana adi puno ngga dudu tibudo adi sipŭ anŭ, adi mbŭh nyibudo daya adi nyambah-i.

³⁹ “Ngapŭi Babylonia re jadi tarun yun bara umot ngga roh roh adi arap,[62] ka manuk manuk adi kais nanyam ka adat. Daya re adu adu dŭh tia rŭŭ diginŭ.

⁴⁰ Kayuh adi re jadi di Babylon inŭh mun kayuh adi mbŭh jadi di Sodom ngga Gomorrah, kan Aku pirabur-i samŭn kupo kupo adi maning anŭ. Mating daya re rŭŭ diginŭ tia. Aku, adi TUHAN, mbŭh minyu.

⁴¹“Daya mandŭg so rais di utara, bangsa adi bikuasa adi jo; bagŭ raja mbŭh sidia yŭn re biperang.

⁴²Ngara mbŭh tambit bawŭh ngga reja-panah ngara; ngara anŭ gaok buang kapang. Jawŭn ngara sak jawŭn rawŭt, darŭm ngara nunggang kuda ngara. Ngara mbŭh sidia an biperang rawan Babylonia.

⁴³Raja Babylonia dingah agah, ka mbŭh ramah amai taru. Ayŭh mbŭh darŭm susah, bada andam mun dayung naman adŭp-i re biranak.

⁴⁴“Mun singah ruah so tuān adi tabar di arong Yang Jordan di ka tarun tana kupai, Aku, adi TUHAN, re mandŭg ka bada daya Babylonia nyirŭgŭh bikaduh bu so kupo ngara. Komŭnŭ pinguru adi Aku mien re mritah bangsa anŭ. Asi dapŭd dog danding ngga Aku? Asi dapŭd natang Aku? Pimritah adi munki dapŭd nyakar Aku?

⁴⁵Jadi dingah meh kayuh adi Aku mbŭh ngatur an ndai di tunduh kupo Babylon ka kayuh adi Aku an ndai di tunduh daya-i. Ndŭg ka anak anak ngara re dog batak ngga bu, ka barang naan daya re tikaran.

⁴⁶Kan Babylon rabu, re agi jawŭn adi raru bana ndŭg ka ndi ong ong re bigugoh bada-i, ka sirais bara daya adi rŭŭ diginŭ re dapŭd dog dingah bangsa bangsa bŭkŭn.”