Read Biatah Bidayuh JEREMIAH 51 Bible Online

JEREMIAH 51 - Biatah Bidayuh bible

JEREMIAH 51

¹TUHAN nang, “Aku taban sabak adi pirusak[63] ka Babylonia ngga bara daya-i.

²Aku re pait daya tami bada pirabur Babylonia mun sabak poh siriyang. Kan andu pinyirusag anŭ mbŭh mandŭg, ngara re nyerang so barang parad ka tingge rais anŭ dŭh biyŭn ani ani dieh.

³Dŭhnyah bada bara soldadu-i sipŭt nimbak reja-panah ngara bait kasŭk piraka perang ngara. Dŭhnyah tandah bara dari adi mara udip! Pirabur sopŭrŭg tibaran bara soldadu-i!

⁴Ngara re biragan ka kabŭs di aran aran kupo ngara.

⁵Aku, adi TUHAN Tapa Bisa-pŭrŭg, bŭn tagan Israel ngga Judah, sunggu ngara mbŭh bidosa rawan Aku, adi Tapa Kudus Israel.

⁶Bikaduh bu so Babylonia! Nyiramat adŭp ngan! Dŭhnyah bada adŭp ngan dog siŭ sabab dosa Babylonia. Aku madin maras dendam ka ngukum-i amai kayuh adi mbŭh-i ndai.

⁷ Babylonia inŭh keya ka saker mas di tangan Ku, bada ndi ong ong nok. Bangsa bangsa nok wain-i ndŭg ka ngara mbŭh jadi gira.

⁸Babylonia mbŭh nyirŭgŭh rabu ka mbŭh rabur! Ngurid-i! Tambit uri yŭn tawan-i, kadŭ-i dapŭd bua.

⁹ Daya tami adi rŭŭ diginŭ nang, ‘Kieh suba turung Babylonia, pak-i mbŭh rambat. Ja bu madin ka pari ka rais adŭp ta. Tapa mbŭh bandar bandar ngukum Babylonia ka mbŭh pirabur-i ndŭg ka rŭpŭg.’ ”

¹⁰TUHAN nang, “Daya Ku nyirais nang, ‘TUHAN mbŭh kiren nang ata batur. Ja di kidaan di daya di Jerusalem kayuh adi TUHAN adi Tapa ta mbŭh ndai.’ ”

¹¹TUHAN mbŭh kies atin raja raja di Media, sabab Ayŭh raan pirabur Babylonia. Simŭnŭ inŭh Ayŭh maras dendam yŭn pinyirusag Ramin-I. Bara pingubak soldadu adi nyerang pesan, “Ngasa reja-panah ngan! Sidia pinangin ngan!

¹²Nggen tandā ngga nyerang sindung Babylon. Nyibake bara adi jaga! Tijuan soldadu soldadu bada masin masin tambit yŭn bijaga! Tijuan kudu kudu naan bada tukang tuman pinganyu!” TUHAN mbŭh ndai kayuh adi-I nang adŭp-I re ndai di daya Babylonia.

¹³ Rais anŭ kaya ka biyŭn bagŭ sungi, pak tika-i mbŭh mandŭg, ka pimudip-i re pango'.

¹⁴TUHAN Bisa-pŭrŭg mbŭh bipayu pakai asŭng adŭp-I nang Ayŭh re taban bagŭ daya bada nyerang Babylonia mun dudu kadis, ka ngara re nyirais ngga pimanang.

¹⁵TUHAN ndai ong ngga kuasa adŭp-I; ngga pinyibijak-I Ayŭh natu ong di yŭn adŭp-i ka mamad rangit so ka pinyimirati-I.

¹⁶So pesan-I piin di sambu rangit[64] magā; Ayŭh taban abun so bŭngŭn ong. Ayŭh ndai kirab kijat di tika ujen ka pait sabak so birit pinyirikŭn-I.

¹⁷Kiris kayuh anŭ, daya jadi budo ka dŭh puan ani ani; ngara adi ndai tibudo mbŭh asa sabab tapa tapa adi ngara ndai dŭh biyŭn asŭng.

¹⁸Ngara au-tarun ka patut dog ngamun; ngara re dog pirabur kan TUHAN mandŭg di nggen ukum.

¹⁹Tapa Jacob dŭh mun ngara; Ayŭh inŭh sianŭ adi ndai sopŭrŭg kayuh, ka Ayŭh mbŭh mien Israel bada jadi daya yŭn adŭp-I. TUHAN Bisa-pŭrŭg inŭh adŭn-I.

²⁰TUHAN nang, “Babylonia, kuu inŭh pabā Ku, sinyata perang Ku. Aku pakai kuu ngga pirandŭk bangsa bangsa ka pritah pritah,

²¹ngga pirandŭk kuda ka bara pinunggang-i, ngga pirandŭk krita kuda ka bara adi tukang pimanu-i,

²²ngga siŭ dari ngga dayung ngga siŭ nyamba daya ngga adi mara, ngga siŭ anak dari ngga anak dayung,

²³ngga siŭ pingingat-biri ka kaban biri-i, ngga siŭ daya adi tukang majak samŭn kuda-i, ngga pirandŭk pimritah ka bara pinurung pritah.”

²⁴TUHAN nang, “Kuu re kiris Aku maras di Babylonia ngga di bara daya-i sopŭrŭg kayuh arap adi ngara mbŭh ndai di Jerusalem.

²⁵Babylonia, kuu inŭh keya ka darŭd adi pirabur ndi ong ong, pak Aku, adi TUHAN, inŭh pinganyu mu. Aku re nakap kuu, pirata kuu di tana, ka tandah kuu jadi apŭk.

²⁶Mating so batuh mu adi mbŭh rubuh re pari dog pakai ngga piramin. Kuu re jadi tarun tana-pajam ndŭg situi tui. Aku, adi TUHAN, mbŭh minyu.

²⁷“Nggen tandā ngga nyerang! Mambak trompet isa bangsa bangsa dapŭd dingah! Sidia bangsa bangsa yŭn perang rawan Babylonia! Bada pritah Ararat, pritah Minni, ka pritah Ashkenaz nyerang. Tijuan ndi naan pingubak bada nguru serang. Taban kuda kuda bada mun dudu kadis.

²⁸Sidia bangsa bangsa yŭn biperang rawan Babylonia. Bagan raja raja so Media, bara pinguru ngga bara pingubak soldadu, ka tibaran tibaran bara soldadu so sopŭrŭg rais adi ngara nguasa.

²⁹Ong bigagar ka bigŭgŭs sabab TUHAN mbŭh taban atur-i ngga bada Babylonia jadi tarun tana-pajam, di yŭn daya mating rŭŭ.

³⁰Bara soldadu daya Babylonia mbŭh dŭh tia biperang ka rŭŭ darŭm kuta ngara. Ngara mbŭh dŭh tia pagan ka mbŭh mun dayung. Tiban-bās kupo mbŭh rubuh, ka ramin ramin mbŭh dog man apui.

³¹Bara pinyisung bigati gati kidaan di raja Babylonia nang kupo-i mbŭh dog mŭrŭt pinganyu so barang parad.

³²Pinganyu mbŭh sirabut sungi pimutas ka mbŭh badang kuta kuta. Bara soldadu daya Babylonia mbŭh kandang-kandŭ taru.

³³Dŭm dŭh tui pinganyu re ngarah ngara ka bidigang di tunduh ngara mun bidigang di tunduh gandom di tarun yŭn daya ngiik. Aku, adi TUHAN Bisa-pŭrŭg, adi Tapa Israel, mbŭh minyu.”

³⁴Raja Babylonia ko natad Jerusalem ka man-i. Ayŭh kangan kupo mun kangan tipayan; mun raja dāng ayŭh tŭrŭn-i. Ayŭh tambit kayuh adi-I raan ka taran adi bŭkŭn.

³⁵Isa daya Zion nang, “Isa-i Babylonia dapu tanggong pinyiganas adi mbŭh dog ndai di tunduh ata!” Isa daya Jerusalem nang, “Isa-i Babylonia dapu tanggong sangsara adi ata mbŭh kinyam!”

³⁶Ngapŭi meh TUHAN nang di daya Jerusalem, “Aku re ngarun angān ka re maras di tunduh pinganyu ngan kayuh adi ngara mbŭh ndai di tunduh ngan. Aku re nyibadŭh atak piin Babylonia ka bada sungi sungi-i badŭh.

³⁷Rais anŭ re jadi tugung rakang tibawang di yŭn dāng tarun rŭŭ. Rais anŭ re jadi kayuh adi tikŭnŭd daya kiris; mating daya re rŭŭ diginŭ, ka sopŭrŭg adi kiris-i re taru.

³⁸Daya Babylonia re ngŭr mun singah ka nyikaong mun anak singah.

³⁹Ngara pirusong? Aku re sidia gawai yŭn ngara ka bada ngara mabuk ka pawŭn. Ngara re bŭŭs ka re ruro dŭh makat.

⁴⁰Aku re taban ngara yŭn dog simareh, mun anak biri, dari biri, ka kambing. Aku, adi TUHAN, mbŭh minyu.”

⁴¹TUHAN minyu pasar Babylon: “Kupo adi ndi ong ong muji mbŭh dog sirabut! Babylon mbŭh jadi kayuh adi tikŭnŭd daya kiris di batŭh bangsa bangsa!

⁴²Rawŭt mbŭh ngapuh Babylon ka mbŭh nutu-i ngga girumbang adi magā.

⁴³Kupo kupo mbŭh jadi kayuh adi tikŭnŭd daya kiris ka mbŭh keya ka tarun tana-pajam adi dŭh biyŭn piin, di yŭn daya mating rŭŭ bait bigandon dieh.

⁴⁴Aku re ngukum Bel, adi tapa Babylonia, ka bada ayŭh nggen pari kayuh adi-i ko naku. Bangsa bangsa re dŭh tia nyambah ayŭh. “Sindung Babylon mbŭh rubuh.

⁴⁵Daya Israel, bikaduh bu so nŭ! Bikaduh bu ka nyiramat adŭp ngan so bisā baji Ku.

⁴⁶Dŭhnyah bada atin pagan ngan manyap bait taru sabab kayuh adi angān mbŭh dingah. Barang sawa taŭn agi adŭ dundan adi mbar dog sabah dog piagah, dundan pinyiganas di rais ka pasar raja birawan ngga raja bŭkŭn.

⁴⁷Tika adi ngga Aku ngukum tibudo Babylonia mbŭh re mandŭg. Ndi tarun tarun tana rais anŭ re dog pimangŭh, ka sopŭrŭg daya-i re dog siŭ.

⁴⁸ Sopŭrŭg kayuh di ong ka di rangit re nyirais ngga gaŭn kan Babylonia rabu ka tangan daya adi mandŭg so utara di pirabur-i.

⁴⁹ Babylonia inŭh adi bada daya di ndi ong ong kabŭs, ka madin Babylonia re rabu sabab-i bada raru bagŭ daya Israel kabŭs. Aku, adi TUHAN, mbŭh minyu.”

⁵⁰TUHAN nang di daya-I di Babylonia: “Angān mbŭh rupas so dog siŭ! Madin bu meh! Dŭhnyah nyikite! Sunggu angān jo so yŭn adŭp ngan, ingat Aku, adi TUHAN ngan, ka ingat Jerusalem.

⁵¹Angān nang, ‘Kieh mbŭh dog ngamun ka dog pimangŭh; kieh mbŭh raru dŭh dapŭd ndai ani ani sabab daya tami mbŭh tambit birit birit kudus darŭm Ramin TUHAN.’

⁵²Ngapŭi meh, Aku nang tika-i re mandŭg adi ngga Aku ngukum tibudo tibudo Babylon, ka ngara adi biragan re nyidaing di ndi rais rais.

⁵³Sunggu bait kani Babylon dapŭd maad ka rangit ka pijog kuta adi tagap di au-tarun, Aku babŭ gŭh re pait daya bada pirabur-i. Aku, adi TUHAN, mbŭh minyu.”

⁵⁴TUHAN nang, “Dingah jawŭn sien di Babylon, jawŭn ngurid amai pinyirusag di rais anŭ.

⁵⁵Aku pirabur Babylon ka bada-i pajam. Tibaran tibaran bara soldadu nyarab mŭrŭt mun girumbang adi magā ka nyerang ngga sirais adi bana.

⁵⁶Ngara mbŭh mandŭg di pirabur Babylon; bara soldadu-i mbŭh dog nakap, ka bawŭh ngara mbŭh pata. Aku ati Tapa adi ngukum kayuh arap, ka Aku re maras di tunduh Babylon nimun patut-i trima.

⁵⁷Aku re bada bara pimritah-i mabuk -- ngara adi bijak, ngara adi pinguru, ka bara soldadu-i. Ngara re bŭŭs ka re ruro dŭh makat. Aku, adi TUHAN, mbŭh minyu, Aku ati TUHAN Bisa-pŭrŭg.

⁵⁸Sindung Babylon adi bikuasa re rubuh ka tana, ka tiban tiban adi bigatung re dog badang. Sopŭrŭg kraja bangsa bangsa mbŭh jadi au-tarun; kayuh adi mandŭg so turang udas ngara re dog man apui. Aku, adi TUHAN Bisa-pŭrŭg, mbŭh minyu.”

⁵⁹Pinurung rapat Zedekiah inŭh Seraiah, anak Neriah ka sukuh Mahseiah. Di sawa adi pat Zedekiah jadi raja Judah, Seraiah tunda ayŭh di ka Babylonia, ka aku nggen di ayŭh kudu kudu pesan.

⁶⁰Aku nuris darŭm surat sopŭrŭg pinyirusag adi re nyatŭk Babylonia, samŭn sopŭrŭg kayuh adi bŭkŭn pasar Babylonia.

⁶¹Aku kidaan di Seraiah, “Kan kuu mbŭh ndŭg Babylonia, dŭhnyah dŭh basa sopŭrŭg kayuh adi mbŭh dog nuris darŭm surat ati.

⁶²Komŭnŭ bidua, ‘TUHAN, Kaam mbŭh nang Kaam an pirabur tarun ati, isa mating kayuh udip dog dapŭd dieh, bait-i manusia puan kah dāng, ka-i re jadi mun tarun tana-pajam adu adu.’

⁶³ Seraiah, kan kuu muko basa surat ati di bara daya, mŭŭng-i di ndi batuh ka taran-i ka Yang Euphrates,

⁶⁴ka nang, ‘Ati inŭh kayuh adi re jadi di Babylonia. Babylonia re timŭtŭm ka manŭn dŭh re tipuang, sabab pinyirusag adi TUHAN re bada nyatŭk-i.’ ”[65] Pinganang Jeremiah abo digiti.