Read Biatah Bidayuh JEREMIAH 52 Bible Online

JEREMIAH 52 - Biatah Bidayuh bible

JEREMIAH 52

¹Zedekiah mbŭh 21 sawa umbur-i kan ayŭh jadi raja Judah, ka ayŭh mritah di Jerusalem sitŭkŭd simŭng ndi sawa. Sindŭ-i inŭh Hamutal, anak Jeremiah adi rŭŭ di kupo Libnah.

²Raja Zedekiah bidosa rawan TUHAN mun Raja Jehoiakim.

³TUHAN jadi raru baji di daya Jerusalem ngga daya Judah ndŭg ka Ayŭh taran ngara so sirung jawin-I. Zedekiah rawan Nebuchadnezzar adi raja Babylonia,

⁴ ka sabab anŭ Nebuchadnezzar mandŭg ngga sopŭrŭg tibaran bara soldadu-i ka nyerang Jerusalem di andu adi simŭng darŭm buran simŭng ngga sawa adi prii darŭm pinyipritah Zedekiah. Ngara bibari di sapa kupo, pijog sindung sindung ngga nyikapung-i,

⁵ka nyikapung-i ndŭg sawa adi simŭng ndi darŭm pinyipritah Zedekiah.

⁶Di andu adi prii darŭm buran pat sawa anŭ, kan apag mbŭh sera ka daya dŭh biyŭn pinguman,

⁷ sindung kuta kupo mbŭh dog miratos pinganyu. Sunggu daya Babylonia kirurung kupo anŭ, sopŭrŭg soldadu ruah bu singarŭm. Ngara bu so teya raja ka so tiban-bās adi tubu duwŭh sindung, ka bu kadŭg aran nuju parad ka Rubān Jordan.

⁸Pak tibaran bara soldadu Babylonia tadak Raja Zedekiah, ka nakap ayŭh di rabak sindŭk Jericho; sopŭrŭg soldadu-i bu tagan ayŭh.

⁹Zedekiah dog taban ka Raja Nebuchadnezzar, nganŭ di kupo Riblah di utung tarun tana Hamath, ka diginŭ Nebuchadnezzar miratak ukum di tunduh ayŭh.

¹⁰Di Riblah ayŭh siŭ anak anak dari Zedekiah di sirung jawin adŭp Zedekiah, ka ayŭh siŭ gŭh bara pinurung pritah Judah.

¹¹ Ripas anŭ, ayŭh bada batŭh Zedekiah dog tuket ka bada ayŭh dog muak ngga parik basi ka dog taban ka Babylon. Zedekiah rŭŭ darŭm jer di Babylon ndŭg andu adi ngga-i kabŭs.

¹²Di andu adi simŭng darŭm buran rimŭh ngga sawa adi simŭng prii darŭm pinyipritah Raja Nebuchadnezzar so Babylonia, Nebuzaradan, daya adi tukang pitayan raja ka pingibās tibaran bara soldadu-i, mŭrŭt Jerusalem.

¹³ Ayŭh sigot Ramin TUHAN, istana, ka ramin ramin sopŭrŭg daya adi bās di Jerusalem;

¹⁴ka bara soldadu-i nyirubuh sindung sindung kupo.

¹⁵Komŭnŭ Nebuzaradan taban ngga bu ka Babylonia[66] daya adi dŭm di kupo, bara adi dŭm adi pandai bitukang, ngga ngara adi mbit parad ka daya Babylonia.

¹⁶Pak ayŭh tingge di Judah kada daya adi siabo sirata, adi dŭh biyŭn rata, ka ayŭh bada ngara nyiraja di teya anggor bait di ŭmŭh.

¹⁷ Bara daya Babylonia pirandŭk tiang tiang bās timaga ka krita krita timaga anŭ adi darŭm Ramin TUHAN, samŭn tibande tong timaga anŭ, ka ngara taban sopŭrŭg timaga ka Babylon.

¹⁸Ngara taban ngga bu gŭh sanduk sanduk ka bŭrŭh ŭbŭ adi dog pakai di tika pibisig mija-sambah, pingakas adi ngga sita prita, makuk adi dog pakai ngga taŭ deya so sadis, ka makuk yŭn badang kimanyan, ka sopŭrŭg pimakai adi bŭkŭn adi dog ndai so timaga, adi dog pakai ngga bisambah di Ramin TUHAN.

¹⁹Ngara tambit sopŭrŭg pingakas adi dog ndai so mas bait so pirak: anak anak makuk, ka tipaku adi dog pakai ngga taban bam apui, makuk makuk yŭn taŭ deya so sadis, bŭrŭh bŭrŭh ŭbŭ, rika rika prita, makuk makuk yŭn kimanyan, ka makuk makuk yŭn sadis wain.

²⁰Kayuh kayuh timaga adi Raja Solomon mbŭh ndai yŭn Ramin TUHAN, mun duwŭh tiang bās, krita krita timaga, tibande tong anŭ, ka simŭng duwŭh dari sapi adi yŭn-i bisangan adi mbŭh raru bat re nŭŭh nimbang.

²¹Duwŭh tiang bās anŭ brimun: soduwŭh-i 8 mita bigatung ka 5.3 mita bŭrŭng-i. Soduwŭh-i bigagong, ka timaga tiang anŭ inŭh 75 milimita tabar-i. Di tibung barang tiang bās anŭ agi ubak ubak tiang timaga adi 2.2 mita bigatung, ka maning ubak tiang anŭ agi radai timaga dog ngabuh ngga buwa delima adi dog ndai so timaga.

²³Di radai timaga anŭ yŭn barang tiang bās anŭ agi siratus sopŭrŭg-i buwa delima, ka 96 dapŭd dog kiris so tana.

²⁴Ripas so anŭ, Nebuzaradan, adi pingibās soldadu, taban ngga bu jadi daya-takap Seraiah adi Imam Bās, Zephaniah adi numbor duwŭh-i, ka taruh naan pinurung adi pangkat baga di Ramin TUHAN.

²⁵So kupo anŭ ayŭh nakap pingubak soldadu, ju naan daya adi tukang pitayan raja adi babŭ di kupo anŭ, pinurung pingibās soldadu, adi tukang jaga rekod soldadu, ka 60 naan daya bās adi bŭkŭn.

²⁶Nebuzaradan taban ngara ka raja Babylonia, nganŭ di kupo Riblah

²⁷di utung tarun tana Hamath. Diginŭ raja bada ngara dog mukong ka dog siŭ. Ka daya Judah dog taban ngga bu dog taran ka rais tami.

²⁸Ati inŭh rekod kiang daya adi Nebuchadnezzar taban ngga bu jadi daya-takap: di sawa adi ju darŭm pinyipritah-i ayŭh taban ngga bu 3,023 naan daya;

²⁹di sawa adi simŭng mai darŭm pinyipritah-i, 832 naan daya so Jerusalem;

³⁰ka di sawa adi 23 darŭm pinyipritah-i, 745 naan dog taban ngga bu di tangan Nebuzaradan. Prungun-i, 4,600 naan daya dog taban ngga bu.

³¹Di sawa adi ngga Evilmerodach jadi raja Babylonia, ayŭh kana ngga Raja Jehoiachin so Judah ka pirupas ayŭh so ramin jer. Anŭ inŭh andu adi 25 darŭm buran simŭng duwŭh darŭm sawa adi 37 ripas Jehoiachin dog taban ngga bu jadi daya-takap.

³²Evilmerodach kana ngga ayŭh ka nggen di ayŭh pangkat adi rabis bās so anŭ adi-i nggen di raja raja adi bŭkŭn adi samah dog taran ngga ayŭh di Babylonia.

³³Jehoiachin dog nyibandar nyambi piraka ramin jer-i ka man samah di mija raja sitŭkŭd umbur-i.

³⁴Barang andu, sitŭkŭd umbur-i, ayŭh ari dog nggen duit ngga miris kayuh adi-i biguna.