Read Biatah Bidayuh JEREMIAH 9 Bible Online

JEREMIAH 9 - Biatah Bidayuh bible

JEREMIAH 9

¹Kasi ka ubak ku keya ka prigi adi puno ngga piin, ka batŭh ku keya ka sumbur adi mirasit piin-i, isa aku bisa sien sandu ngga singarŭm yŭn daya ku adi mbŭh dog siŭ.

²Kasi ka aku biyŭn tarun yŭn rŭŭ di tarun tana-pajam di yŭn aku bisa pijo adŭp ku so daya ku. Sopŭrŭg ngara dŭh tŭtŭd, tibaran daya adi ginaka.

³Ngara ari sidia an kadong; di ndi tarun tana rais, anŭ adi sawŭ dŭh bikuasa, pak atin bidikok mbŭh mritah. TUHAN nang, “Daya Ku dŭh ko ko ndai arap, ka dŭh ngaku Aku Tapa ngara.”

⁴Barang naan an jaga adŭp-i so dingan-i, ka jurud pasid dŭh gŭh bisa dog sabah; amai barang naan mbŭh pinipu mun Jacob, ka barang naan kinarap dingan-i.

⁵Sopŭrŭg ngara nipu dingan-i, ka mating adi nang kayuh adi sawŭ; ngara mbŭh pikanyet jura ngara minyu kadong ka dŭh re ko bidosa. Ngara dŭh ko ko ganas, ka dŭh ko ko ndai pingandai tipu. TUHAN nang daya-I mbŭh tirawan adŭp-I.

⁷Sabab anŭ TUHAN Bisa-pŭrŭg nang, “Aku re pibisig daya Ku mun tukang basi pibisig basi, siŭn ngara jadi bisig. Daya Ku mbŭh ndai arap, re simuki dinge Aku ngga ngara?

⁸Jura ngara keya ka reja-panah adi bisā; ngara ari kadong. Barang naan minyu mandis ngga dingan-i, pak sibatur-i ngga kudog dingan-i.

⁹Re dŭh kah Aku ngukum ngara amai sopŭrŭg anŭ? Re dŭh kah Aku maras dendam di tunduh bangsa adi mun anŭ? Aku, adi TUHAN, mbŭh minyu.”

¹⁰Aku nang, “Aku ngurid darŭd ka muās tarun tana kupai, sabab ngara mbŭh badŭh pisŭk, ka mating daya panu mutas-i. Jawŭn dāng kudip mbŭh mating tia dog dingah; manuk ngga dāng tarun mbŭh bu ka mating tia.”

¹¹TUHAN nang, “Aku re bada Jerusalem jadi tugung rakang tibawang, tarun yŭn kasong tarun rŭŭ; kupo kupo Judah re jadi tarun tana-pajam, tarun adi dŭh daya yŭn rŭŭ.”

¹²Aku siken “TUHAN, mani tarun tana jadi matung ka badŭh mun tarun tana-pajam, ndŭg ka daya mating panu mutas-i? Asi adi sukup bijak re mirati kayuh adi mun anŭ? Di asi Kaam mbŭh kidaan rati-i isa ayŭh bisa kidaan di daya bŭkŭn?”

¹³TUHAN nam, “Kayuh mbŭh jadi simŭnŭ amai daya Ku mbŭh tagan ajar adi Aku mbŭh nggen di ngara. Ngara dŭh dingah pinganang Ku bait ndai kayuh adi Aku bada ngara ndai.

¹⁴Ngara baking buang mbŭh nyambah tibudo Baal nimun adi dog ngajar tayung-babuk ngara.

¹⁵Ngapŭi dingah kayuh adi Aku, adi TUHAN Bisa-pŭrŭg, adi Tapa Israel, re ndai: Aku re nggen di daya Ku anak anak kayuh-udip adi pa'it bada ngara man ka rasun bada ngara nok.

¹⁶Aku re bada ngara papar sasah di dupan bangsa bangsa adi dŭh ngara bait tayung-babuk ngara puan, ka Aku re pait bara tibaran soldadu bada nyerang ngara ndŭg ka Aku mbŭh batur batur pirabur ngara.”

¹⁷TUHAN Bisa-pŭrŭg nang, “Pikir meh kayuh adi mbŭh jadi! Bada mandŭg daya adi tukang muās, bada mandŭg bara dayung adi nang ragu nyikubur.”

¹⁸Daya nang, “Bada ngara rikas nang ragu nyikubur yŭn ami, ndŭg ka batŭh ami puno ngga randang batŭh, ka pundu batŭh ami bisa amai sien.”

¹⁹Dingah sak jawŭn sien di Zion, “Kieh mbŭh asur! Kieh mbŭh batur batur dog pimangŭh! Kieh dŭh siŭn dŭh bu so tarun tana ami; ramin arŭn ami mbŭh rubuh.”

²⁰Aku nang, “Dingah pinganang TUHAN, angān adi bara dayung, ka mbit bat di pinganang-I. Ngajar bara anak dayung ngan munki muās, ka bara dingan ngan munki nang ragu nyikubur.

²¹Pinyikabŭs mbŭh mŭrŭt so pinjan ta ka mŭrŭt istana ta; pinyikabŭs mbŭh siŭ anak-sŭ di aran raya ka bara dari adi mara di passar.

²²Tadang ngara mbŭh di barang yŭn, mun tugung tamŭh di tana, mun tŭngŭn gandom adi dog japa ka dog tingge daya adi ngatŭm, gandom adi dŭh dog sun. Anŭ inŭh kayuh adi TUHAN bada aku kidaan.”

²³TUHAN nang, “Daya adi bijak dŭh patut mingangŭn pasar pinyibijak ngara, simŭnŭ gŭh daya adi bake pasar pinyibake ngara, simŭnŭ gŭh daya adi kaya pasar pinyikaya ngara.

²⁴ Kambŭi daya raan mingangŭn, ayŭh patut mingangŭn adŭp-i puan ka mirati Aku, sabab pinyirindu Ku dŭh bisa birubah, ka Aku ndai anŭ adi tŭnggŭn ka adi batur. Anŭ inŭh kayuh adi pimunos asŭng Ku. Aku, adi TUHAN, mbŭh minyu.”

²⁵TUHAN nang, “Tika-i re mandŭg adi ngga Aku ngukum daya Egypt, daya Judah, daya Edom, daya Ammon, daya Moab, ka daya tarun tana-pajam, adi mbŭh kapŭg ubok ngara bada purok.[9] Sopŭrŭg daya anŭ bisunat, pak dŭh sita simanya adi dog nandā ngga sunat anŭ. Mating so ngara anŭ ka mating so daya Israel adi mbŭh sita simanya Ku.”