Read Biatah Bidayuh PUĀS 1 Bible Online

PUĀS 1 - Biatah Bidayuh bible

PUĀS 1

¹Munki masam maput-i Jerusalem, adi ko dawŭ-i puno ngga daya! Ko dawŭ-i dog stabi ndi ong ong, pak madin mbŭh mun dayung uban; kupo kupo adi ko bibragah madin mbŭh mun urun.

²Ndi ngarŭm ngarŭm ayŭh sien; randang batŭh misa paŭp-i. Ndi naan so bara jerā-i mating gŭh an nyaduh ayŭh. Bara pambit-i mbŭh tagan ayŭh ka sopŭrŭg mbŭh rawan ayŭh madin.

³Daya Judah mbŭh jadi urun adi dŭh bigaya, dog pibu so ramin arŭn[1] ngara. Ngara rŭŭ di rais bŭkŭn, ngga mating tarun adi bisa dog kadŭn tung adŭp ngara. Ngara rŭŭ di dupan bara pinganyu, ngga mating aran re bu.

⁴Madin mating daya tia mandŭg ka Ramin TUHAN di nyambah di andu gawai. Bara dayung mara adi ko biragu diginŭ mbŭh sangsara, ka imam imam mbŭh nyidaing adŭ. Tiban tiban-bās kupo mbŭh mating daya dieh, ka kupo Zion mbŭh sangsara.

⁵Bara pinganyu-i manang ka mbŭh nguasa-i. TUHAN mbŭh bada-i sangsara amai sopŭrŭg dosa-i; bara anak-i mbŭh dog nakap ka dog taban ngga bu.

⁶Sangŭn Jerusalem mbŭh miyap. Bara pinguru-i mbŭh keya ka peyu adi ramah amai sikirau; pinyibake-i mbŭh re abo darŭm-i bikaduh bu mangān bara pingasū.

⁷Darŭm-i mbŭh rubuh, Jerusalem ingat sangŭn-i adi jah. Darŭm-i rabu ka darŭm tangan pinganyu, mating daya turung ayŭh; bara adi nyerang ayŭh tawŭh pinyirabu-i.

⁸Bragah-i mbŭh mating; ayŭh mbŭh sitabet ka dog ngamun. Ayŭh nyidaing ka nutu jawin-i darŭm mangŭh. Jerusalem ko bada adŭp-i kais ngga dosa adi sipŭ.

⁹Pinyikais-i tungang dog kiris, pak ayŭh dŭh mbit piduri. Pinyirabu-i re bisā; mating daya re dapŭd nyaduh ayŭh. Pinganyu-i mbŭh manang, ka ayŭh sien mite masi so TUHAN.

¹⁰Pinganyu-i mirupak sopŭrŭg pinyikaya-i. Ayŭh kiris ngara mŭrŭt Ramin TUHAN, adi TUHAN nagah daya adi dŭh daya Jahudi mŭrŭt.

¹¹Daya-i nyidaing darŭm ngara jiroh pinguman; Ngara nyambi pinyikaya ngga pinguman ramŭn an udip. “Tingga aku, TUHAN,” kupo anŭ nang; “tingga aku darŭm sangsara ku.”

¹²“Tingga aku!” ayŭh nyirais nang di barang naan adi murah.[2] “Gi-mating daya kinyam sangsara mun jaku, Sangsara adi TUHAN mbŭh bada nyatŭk aku darŭm-I baji.

¹³“Ayŭh pait apui so sambu, apui adi bijagu darŭm aku. Ayŭh tŭŭn jarat ngga nakap aku ka pirabu aku ka tana. Komŭnŭ Ayŭh tandah aku sangsara ndi andu andu.

¹⁴“Ayŭh nyibatŭh sopŭrŭg dosa ku ka nguruk sopŭrŭg-i; Ayŭh tangid-i di tungo ku, ka aku jadi ramah bada bat-i. TUHAN nggen di aku ka darŭm tangan pinganyu ku, ka aku dŭh bigaya re rawan ngara.

¹⁵“TUHAN tirawan sopŭrŭg soldadu ku adi siabo bake; Ayŭh pait ndi tibaran bara soldadu bada pirabur bara dari ku adi mara. Ayŭh pirandŭk daya ku mun daya mŭ buwa anggor.

¹⁶“Anŭ inŭh sabab randang batŭh ku pripasor ruah. Mating daya dapŭd nyaduh aku; mating daya dapŭd ngatat aku. Pinganyu mbŭh ngarah aku; daya ku mbŭh dŭh biyŭn ani ani tia.

¹⁷“Aku tōn tangan ku, pak mating daya raan turung aku. TUHAN mbŭh bagan pinganyu bada rawan aku so barang parad; ngara ndai aku keya ka aku ati kayuh kais.

¹⁸“Pak TUHAN inŭh tŭnggŭn, amai aku nundok di Ayŭh. Dingah aku, angān manusia di barang yŭn; tingga aku ati adi sangsara. Bara dari ku ngga bara dayung ku mbŭh dog taban ngga bu jadi daya-takap.

¹⁹“Aku bagan bara pambit ku, pak ngara abah turung aku. Bara imam ngga bara pinguru kabŭs di aran aran kupo, darŭm ngara jiroh pinguman ngga kudip adŭp ngara.

²⁰“Tingga, O TUHAN, sangsara ku, ngga jera-birasa ku! Atin ku asur amai dosa ku adi dawŭ. Di aran aran raya agi daya dog siŭ; darŭm arŭn ani daya agi kabŭs.

²¹“Dingah[3] sidaing ku; mating daya nyaduh aku. Pinganyu ku gaŭn amai Kaam bada pinyirusag nyatŭk aku. Taban[4] andu anŭ adi Kaam mbŭh janji; bada pinganyu ku sangsara mun aku.

²²“Nunggu ngara amai sopŭrŭg pingandai ginaka ngara; ngukum ngara mun Kaam ngukum aku amai dosa ku. Aku nyidaing amai mbŭh raru sangsara.”