Read Biatah Bidayuh PUĀS 2 Bible Online

PUĀS 2 - Biatah Bidayuh bible

PUĀS 2

¹Darŭm baji-I TUHAN nutu Jerusalem ngga karŭm. Sangŭn-i adi ndŭg rangit mbŭh rubuh. Di andu Ayŭh baji, ndŭg ka Ramin-I Ayŭh tagan.

²TUHAN pirabur sopŭrŭg kupo di Judah ngga dŭh kira masi. Ayŭh nyirubuh kuta kuta adi ngibān rais. Ayŭh pimangŭh pritah ngga bara pinguasa-i.

³Darŭm baji-I Ayŭh pirandŭk pinyibake Israel; Ayŭh abah turung ata kan pinganyu mandŭg. Ayŭh magā di ata mun apui pirabur sopŭrŭg kayuh.

⁴Ayŭh nŭtŭn reja panah-I ka ata mun pinganyu; Ayŭh siŭ sopŭrŭg daya adi ata angan ka adi ata ngangŭn. Digiti di Jerusalem ata kinyam apui baji-I.

⁵Mun pinganyu, TUHAN pirabur Israel; Ayŭh mbŭh tandah kuta kuta ngga istana-i rubuh. Ayŭh mbŭh bada daya Judah adu adu susah.

⁶Ayŭh bada randŭk Ramin-I adi yŭn ata nyambah Ayŭh; Ayŭh mbŭh pirŭŭ sopŭrŭg gawai ngga andu Sabbath. Raja ngga imam imam mbŭh samah kinyam bisā baji-I.

⁷TUHAN abah di mija sambah-I ka tagan Ramin-I adi kudus; Ayŭh nyibandar pinganyu nyirubuh sindung-i. Ngara nyirais amai manang di tarun yŭn ata ko nyambah ngga gaŭn.

⁸TUHAN mbŭh natu adŭp-I an nyirubuh sindung Zion; Ayŭh muko nakit kira yŭn sopŭrŭg pinyirusag-i. Madin tawā ngga sindung mbŭh sopŭrŭg-i rubuh.

⁹Tiban tiban rubuh, parang parang-i mbŭh asur. Madin raja ngga bara daya adi bās mbŭh dog taran ka rais tami. Ukum-adat mbŭh dŭh tia dog ngajar, ka bara nabi mbŭh dŭh tia kiris keya ka darŭm pŭmŭh kayuh so TUHAN.

¹⁰Bara nyamba daya Jerusalem guru di tana dŭh nang ani ani, na dabu di ubak ka nēn piraka banang guni. Bara dayung adi mara mutu ubak ngara ka tana.

¹¹Batŭh ku bŭ amai dŭh ko ko sien; asŭng ku mbŭh nyibuwar. Aku mbŭh rarah amai susah kiris pinyirabur daya ku. Bara anak-anya ngga anak-sŭ mijŭp di aran kupo.

¹²Sibŭrŭk ngga badŭh asŭng, ngara sien nyigura sindŭ-i; ngara rabu di aran mun adi biragan, ka kabŭs di kŭkŭn sindŭ-i.

¹³O Jerusalem, kupo adi dog rindu, ani bisa ku nang? Aku dŭh dapŭd nyaduh kuu. Gi-bŭn daya sangsara mun kuu. Pinyirusag mu raru bayah mun rawŭt; mating pingarap mu tia.

¹⁴Bara nabi mu dŭh biyŭn kayuh re ngara kidaan di kuu adŭ-i pinganang kadong; ajar so ngara nipu kuu pak bŭn kidaan dosa mu. Ngara bada kuu bipikir nang kuu dŭhsah pasan dosa mu.

¹⁵Daya adi murah kupo mu tingga kuu ka ngamun kuu. Ngara kuting ubak buang tawŭh pinyirubuh Jerusalem: “Dŭh kah ati kupo adi ramus anŭ? Dŭh kah ati adi ong ngangŭn?”

¹⁶Sopŭrŭg pinganyu mu napat kuu ka nyitŭrŭng kuu ngga tiru. Ngara nyikube buang nyirimbe, “Ata mbŭh pirabur-i! Ati inŭh andu adi ata kajŭn!”

¹⁷TUHAN mbŭh ndai kayuh adi Ayŭh nang adŭp-I raan ndai: Ayŭh mbŭh pirabur ata ngga dŭh kira masi, nanyam adi mbŭh-I bakan dawŭ-i. Ayŭh nggen pimanang di pinganyu ta, nggen di ngara pinyigaŭn di pinyirabu ta.

¹⁸O Jerusalem, bada sindung mu nyirais bagan TUHAN![5] Bada randang batŭh mu aman mun sungi sandu ngga singarŭm; pirarah adŭp mu ngga puās ka susah.

¹⁹Ndi ngarŭm ngarŭm ka pari pari makat ka bagan TUHAN; kidaan ani darŭm atin mu ka mite Ayŭh masi di anak anak mu. Anak anak-sŭ mbŭh aŭn sikirau di barang sakap aran!

²⁰Tingga, O TUHAN! Mani Kaam ngukum kieh mun ati? Bara dayung man anak anak adi ngara rindu! Bara imam ngga bara nabi dog siŭ di Ramin TUHAN!

²¹Adi mara ngga adi minyamba kabŭs di aran, dari ngga dayung adi mara, dog siŭ pinganyu ngga pedang. Kaam siŭ ngara ngga dŭh kira masi kan Kaam baji.

²²Kaam bagan pinganyu ku bada ndai gawai pinyiganas maning aku, ka mating daya dapŭd pirupas adŭp-i di andu anŭ so baji Mai. Ngara siŭ anak anak ku, adi aku nyiran ka rindu.