Read Biatah Bidayuh PUĀS 3 Bible Online

PUĀS 3 - Biatah Bidayuh bible

PUĀS 3

¹Aku inŭh adi puan nyamki nŭŭh dog ukum Tapa.

²Ayŭh bada aku mŭrŭt ka tarun adi dŭ dŭ karŭm,

³ka pari pari mukong aku ngga dŭh biyŭn masi.

⁴Ayŭh bada pŭrŭng ganan ku tawan, ka mbŭh mata turang ku.

⁵Ayŭh mbŭh kurung aku darŭm jer sangsara ngga jera-birasa.

⁶Ayŭh mbŭh takan aku udip darŭm karŭm, keya ka daya adi mbŭh tui kabŭs.

⁷Ayŭh mbŭh muak aku ngga parik basi; aku ati daya-takap ka mating pingarap ku re dog pirupas.

⁸Aku bana bagan mite turung, pak Tapa abah dingah;

⁹aku tibabeu buang aku panu; sindung batuh agi matŭn aku kan aku biruit.

¹⁰Ayŭh tuman aku mun buāng; Ayŭh nyerang aku mun singah.

¹¹Ayŭh tadak aku ndŭg ka aku mbŭh miriseu so aran, ka nyiratak nyirigat aku, ka tagan aku.

¹²Ayŭh pakat bawŭh-I ka nŭtŭn reja panah-I ka aku.

¹³Ayŭh nimbak reja panah-I bada mŭrŭt pŭrŭng ku.

¹⁴Daya tawŭh aku ndi andu andu; aku mbŭh jadi buwa tapat sopŭrŭg ngara.

¹⁵Sangsara bās inŭh adi-I nggen di aku ndu pinguman ka nok.

¹⁶Ayŭh gasak jawin ku di tana ka jipŭh ku pata dog batuh.

¹⁷Aku mbŭh kambŭt ani anŭ udip tiranah, udip darŭm damai, ka udip sanang.

¹⁸Aku dŭh re tui udip, pingarap ku di TUHAN mbŭh mating.

¹⁹Bipikir pasar udip sangsara ngga udip jera-birasa ku, mbŭh keya ka man rasun.

²⁰Aku adu adu pikir pasar-i, ndŭg ka simangi ku mbŭh nyam adi asur darŭm aku.

²¹Pak pingarap ku pari kan aku ingat ndi kayuh ati:

²²Pinyirindu ngga masi TUHAN re tan adu adu,

²³tibŭn mun isan isan, ka manŭn mun batŭh andu makat.

²⁴TUHAN adŭ adi aku biyŭn, ngapŭi aku na pingarap ku di Ayŭh.

²⁵TUHAN inŭh kana ngga barang naan daya adi sabah di Ayŭh,

²⁶Ngapŭi raru kana inŭh ata kajŭn ngga atin tŭtŭd, ndŭg ka Ayŭh mbŭh nyiramat ata.

²⁷Ngapŭi raru kana inŭh ata birajar atin tŭtŭd di tika ata gi-mara.

²⁸Kan ata sangsara, ata patut guru sadi adŭp ta ngga atin tŭtŭd;

²⁹ata patut pirapat adŭp ta ngga atin adi an nundok, amai kadŭ babŭ agi pingarap.

³⁰Sunggu dog mukong ka dog pimangŭh, ata patut trima sopŭrŭg-i.

³¹TUHAN inŭh masi ka re dŭh adu adu tirawan ata.

³²Sunggu Ayŭh taban pinyusah ka ata, pinyirindu-I di ata inŭh manŭn buang tagap.

³³Ayŭh dŭh gagā bada ata sangsara buang mandam.

³⁴TUHAN puan kan asŭng ta dog digang di tika ata darŭm jer;

³⁵Ayŭh puan kan hak adi-I nggen di ata dog miman so ata;

³⁶kan pinyitŭnggŭn dŭh dog pimanu di tarun yŭn bisara, Ayŭh puan.

³⁷Pinyiraan TUHAN sadi adŭ adi ari dog pijadi.[6]

³⁸Pinyikana ngga arap jadi so ka pesan-I.

³⁹Mani ata sah mingungut kan ata dog ukum amai dosa[7] ta?

⁴⁰Ja ata piruh aran pimudip ta ka pari ka TUHAN.

⁴¹Ja ata kuka atin ta ka Tapa di shorga ka bidua,

⁴²“Kieh mbŭh bidosa ka birawan, ka Kaam, O TUHAN, mbŭh apun kieh.

⁴³“Kaam tadak kieh ka siŭ kieh; masi Mai dog sukan baji Mai,

⁴⁴Bisā baji Mai keya ka abun adi raru tabar, ndŭg ka dŭh dapŭd dog tambus dosa.

⁴⁵Kaam mbŭh bada kieh keya ka tugung sapok di ong.

⁴⁶“Kieh dog pimangŭh ka dog tawŭh sopŭrŭg pinganyu ami.

⁴⁷Kieh mbŭh dog nyatŭk pinyirusag ka asur; kieh udip rapā yŭn kayuh adi bisā ngga kayuh adi dog taru.

⁴⁸Randang batŭh ku aman mun sungi, kiris pinyirusag daya ku.

⁴⁹“Randang batŭh ku re adu adu ruah

⁵⁰ndŭg ka TUHAN tingga so sambu ka kiris kieh.

⁵¹Atin ku susah kan aku kiris kayuh adi mbŭh jadi di bara dayung di kupo ami.

⁵²“Aku keya ka manuk dog mirakap bara pinganyu ku adi tiru di aku ngga dŭh biyŭn pada.

⁵³Ngara taran aku ka darŭm rubang ka nutu baba rubang anŭ ngga batuh.

⁵⁴Piin maad ndŭg ubak ku, ka aku pikir aku mbŭh sindŭk re kabŭs.

⁵⁵“So rasan rubang, O TUHAN, aku bagan Kaam,

⁵⁶ka kan aku mite Kaam turung aku, Kaam dingah sirŭŭn ku.

⁵⁷Kaam nam aku ka bada aku dŭh taru.

⁵⁸“Kaam mandŭg di batu aku, TUHAN, ka mbŭh nyiramat asŭng ku.

⁵⁹Kaam kiris kayuh arap adi dog ndai di tunduh aku;

⁶⁰Kaam puan munki pinganyu ku tiru di aku ka munki ngara bipekat rawan aku.

⁶¹“Kaam mbŭh dingah ngara pimangŭh aku, O TUHAN; Kaam puan sopŭrŭg pekat ngara.

⁶²Ndi andu andu ngara minyu pasar aku ka bisatur yŭn an kudog aku.

⁶³So isan isan ndŭg karŭm ngara nyirimbe aku.

⁶⁴“Ngukum ngara amai kayuh adi ngara mbŭh ndai, O TUHAN;

⁶⁵mangu ngara ka bada ngara asa!

⁶⁶Tadak ngara ka pirarap ngara so jawin ong!”