Read Biatah Bidayuh PUĀS 5 Bible Online

PUĀS 5 - Biatah Bidayuh bible

PUĀS 5

¹Ingat, O TUHAN, kayuh adi jadi di kieh. Tingga kieh, ka tingga munki masam kieh mbŭh mangŭh.

²Rata bisaka ami mbŭh darŭm tangan daya tami; daya tami mbŭh rŭŭ di ramin ami.

³Sama ami mbŭh dog siŭ pinganyu, ka madin sindŭ ami jadi dayung uban.

⁴Kieh dŭh siŭn dŭh miris piin nok; kieh dŭh siŭn dŭh miris kayuh ndu uwang.

⁵Kieh dog takan bada nyiraja mun kaldi puan kah onta, kieh ramah, pak dŭh dog nyibandar rŭŭ so kraja.

⁶Ngga kudip adŭp ami, kieh nundok ka Egypt ngga Assyria.

⁷Tayung-babuk ami bidosa, pak madin ngara mbŭh mating, ka kieh mbŭh sangsara amai dosa ngara.

⁸Kieh dog mritah daya adi keya ka urun, ka mating daya dapŭd nyiramat kieh so kuasa ngara.

⁹Bara pinyiŭ bidandong di sapa kupo, kieh ruban asŭng ami kan kieh ruah jiroh pinguman.

¹⁰Sibŭrŭk mbŭh bada kieh sungoh, ndŭg ka kurit ami mbŭh paras mun oven-tana.

¹¹Bara sawŭn ami dog miragag di Sandah Zion; di barang anak kupo Judah anak anak dayung ami dog takan bada nggen adŭp-i.

¹²Bara pinguru ami mbŭh dog nakap ka dog tangid; bara nyamba ami dŭh dog stabi.

¹³Bara dari ami adi mara dog takan bada ngisar gandom mun urun; anak anak dari kabis kayuh adi bāt ndŭg ka tibabeu.

¹⁴Bara nyamba dŭh tia guru di tiban-bās kupo, ka bara adi mara dŭh tia ndai ragu.

¹⁵Pinyigaŭn mbŭh mating darŭm pimudip ami; atin susah mbŭh gati tanda ami.

¹⁶Sopŭrŭg kayuh adi kieh ngangŭn mbŭh mating dŭm. Kieh bidosa, ka madin kieh mbŭh dog ukum.

¹⁷Kieh raru susah darŭm atin ami ka nyana tingga tarun so randang batŭh ami,

¹⁸sabab Sandah Zion mbŭh maput ka dog tagan, ka kasong tarun mbŭh bijaruh dieh.

¹⁹Pak Kaam, O TUHAN, inŭh Raja ndŭg situi tui, ka re mritah ndŭg sikasŭn tipuh.

²⁰Mani Kaam raru tui tagan kieh? Abah kah Kaam tia ingat kieh?

²¹Taban kieh pari ka Kaam, TUHAN! Taban kieh pari! Pari pijog bragah ami adi dawŭ-i.

²²Kadŭ-i Kaam mbŭh tirawan kieh adu adu? Dŭh arang arang kah baji Mai?