Read Biatah Bidayuh EZEKIEL 1 Bible Online

EZEKIEL 1 - Biatah Bidayuh bible

EZEKIEL 1

¹ Di andu adi rimŭh darŭm buran pat darŭm sawa adi taruh puru,[1] aku, Ezekiel adi imam, anak Buzi, rŭŭ ngga bara daya Jahudi adi dog taran ka Babylonia, sindŭk Yang Chebar. Rangit tikuka, ka aku keya ka darŭm pŭmŭh kiris Tapa. (

² Anŭ mbŭh sawa adi rimŭh ripas Raja Jehoiachin dog taran so rais adŭp-i.)

³Diginŭ di Babylonia di pang Yang Chebar, aku dingah TUHAN minyu ngga aku ka aku agi kinyam kuasa-I.

⁴Aku nyigura ka kiris sabak ribut mandŭg so utara. Kijat mikirab so tibande abun, ka rangit maning-i nyirinyak ngga jawa. Di yŭn kijat mikirab, agi kayuh bringam jawa mun timaga.

⁵ Di yun sabak ribut, aku kiris kayuh mun pat dāng udip adi mun gayŭn manusia,

⁶pak barang pŭrŭng kayuh anŭ biyŭn pat jawin ka pat urad.

⁷Kaja ngara tŭnggŭn, ka ngara bitinjug mun sapi. Ngara bringam jawa mun timaga adi ko dog ngusu.

⁸Ngga nambah pat jawin ka pat urad ngara, barang pŭrŭng ngara biyŭn pat tangan manusia, ndi di punda barang urad.

⁹Duwŭh urad barang pŭrŭng dāng anŭ tiburai ngga bada tŭbŭn tŭbŭn urad ngara bidapŭd, ndŭg ka ngara mun kayuh adi misagi pat. Ngapŭi kan ngara sigen adŭp ngara, barang pŭrŭng dŭhsah sigen adŭp-i, amai ngara sigen adŭp ngara ngga ndi tibaran.

¹⁰ Barang pŭrŭng dāng udip anŭ biyŭn pat masam jawin: ndi mun jawin manusia di tura ka jawin, ndi mun jawin singah di tura ka tauh, ndi mun jawin sapi di tura ka bait, ka ndi mun jawin beuh di tura ka punok.

¹¹Duwŭh urad[2] barang pŭrŭng dāng anŭ dog pakat ndŭg ka tŭbŭn tŭbŭn-i bidapŭd ngga tŭbŭn tŭbŭn urad dingan-i adi sindŭk-i, ka urad ngara adi duwŭh adi bŭkŭn tikupet nutu pŭrŭng ngara.

¹²Barang pŭrŭng dāng anŭ nura pat parad tarun, ka bisa di ka tadŭ yŭn-i raan, buang dŭhsah bigiring.

¹³Di ruang[3] dāng dāng udip anŭ agi kayuh adi mun siru' adi bijireb, adi adu adu sakŭt. Apui anŭ bijagu ka kijat prikirab ruah so dieh.

¹⁴Dāng anŭ raju mikabur matak mari mun kijat.

¹⁵ Darŭm aku tingga pat pŭrŭng dāng anŭ, aku kiris pat kaja kaja-krita di tunduh tana, ndi ngapid barang pŭrŭng dāng anŭ.[4]

¹⁶So-pat kaja-krita anŭ brimun; barang kaja bringam jawa mun batuh brega, ka barang kaja biyŭn kaja adi bŭkŭn adi nyiparang di yun-i,

¹⁷isa kaja kaja anŭ dapŭd trigen ka tadŭ pat parad tarun.

¹⁸ Turang kaja kaja anŭ inŭh puno ngga dudu batŭh.[5]

¹⁹Kan dāng dāng anŭ trigen, kaja kaja-krita anŭ trigen gŭh, ka kambŭi dāng dāng anŭ makat so tana, simŭnŭ gŭh kaja kaja anŭ.

²⁰Dāng dāng anŭ panu ka barang yŭn-i raan, ka kaja kaja anŭ ndai nimun adi ndai dāng anŭ, sabab dāng dāng anŭ nguasa ngara.

²¹Jadi tiap kari dāng dāng anŭ trigen bait rŭŭ bait makat ka au-tarun, kaja kaja anŭ ndai simŭnŭ gŭh.

²² Nyirungan ubak dāng dāng anŭ agi kayuh mun sakŭb adi dog ndai so kristal mikirib.

²³Diginŭ di ribo sakŭb anŭ agi mijog dāng dāng anŭ, barang pŭrŭng dāng anŭ murai duwŭh urad bada bidapŭd ngga tung dingan-i ka nutu pŭrŭng-i ngga duwŭh urad-i adi bŭkŭn.

²⁴ Aku dingah jawŭn urad urad ngara mikabap kan ngara mikabur; sak jawŭn piin di rawŭt, sak jawŭn tibande tibaran bara soldadu, sak jawŭn sirŭŭn Tapa Bisa-pŭrŭg. Kan ngara ko mikabur, ngara ngupet urad ngara,

²⁵pak babŭ agi jawŭn mandŭg so tunduh sakŭb adi nyirungan ubak ngara.

²⁶ Di tunduh sakŭb agi kayuh mun takta dog ndai so batuh nilam, ka guru di takta anŭ agi gayŭn adi mun pŭrŭng manusia.

²⁷ Gayŭn anŭ mun bringam timaga di yun apui anŭ. Ayŭh bringam ngga jawa adi tarang

²⁸ngga sopŭrŭg kala ujen bukang. Anŭ inŭh jawa adi nyirinyak adi kiren bragah TUHAN.