Read Biatah Bidayuh EZEKIEL 10 Bible Online

EZEKIEL 10 - Biatah Bidayuh bible

EZEKIEL 10

¹ Aku tingga sakŭb adi nyirungan cherubim anŭ[19] ka nyirungan ngara agi kayuh mun takta adi dog ndai so batuh nilam.

² Tapa nang di sianŭ adi nēn piraka banang linen, “Panu ka asah kaja kaja-krita di ribo cherubim cherubim anŭ ka ngakŭp bam apui ngga tangan mu. Komŭnŭ nabur bam apui anŭ di ndi tarun tarun darŭm kupo anŭ.” Aku nyibatŭh ayŭh panu.

³Cherubim cherubim anŭ mijog tura ka siratan Ramin TUHAN kan ayŭh mŭrŭt, ka abun ngisi badag tura ka darŭm.

⁴Jawa bragah TUHAN makat so dāng dāng anŭ ka panu nuju tiban mŭrŭt Ramin TUHAN. Komŭnŭ abun anŭ ngisi Ramin TUHAN, ka badag anŭ mbŭh nyirinyak ngga jawa.

⁵Jawŭn kabap urad urad cherubim anŭ tungang dog dingah di awah adi tura ka sapa. Jawŭn anŭ sak sirŭŭn Tapa Bisa-pŭrŭg.

⁶Kan TUHAN nggen ukum bada sianŭ adi nēn piraka banang linen tambit apui so asah kaja kaja-krita anŭ di ribo cherubim cherubim anŭ, daya anŭ mŭrŭt ka mijog sindŭk ndi kaja-krita anŭ.

⁷Ndi so cherubim cherubim anŭ ton tangan-i ka apui anŭ di yun ngara, tambit kada bam apui, ka na-i darŭm agŭm tangan daya adi nēn piraka banang linen. Daya anŭ tambit-i ka bu.

⁸Aku kiris cherubim cherubim anŭ biyŭn kayuh adi mun tangan manusia di punda barang urad-i.

⁹ Aku gŭh kiris diginŭ pat kaja-krita, sopŭrŭg-i brimun, ndi ngapid barang cherubim. Kaja kaja-krita anŭ bringam jawa mun batuh brega, ka barang kaja anŭ biyŭn kaja adi bŭkŭn adi nyiparang di yun-i.

¹¹Kan dāng dāng anŭ trigen, ngara dapŭd trigen ka tadŭ parad tarun buang dŭhsah bigiring. Sopŭrŭg ngara trigen samah ka parad adi ngara raan, buang dŭhsah bigiring.

¹² Pŭrŭng ngara, punok, tangan, urad, ka kaja mbŭh puno ngga batŭh.

¹³Aku dingah sirŭŭn bagan, “Kaja-tipusing.”

¹⁴ Barang pŭrŭng dāng anŭ biyŭn pat jawin. Adi sibungas mun jawin sapi, adi numbor duwŭh mun jawin manusia, adi numbor taruh mun jawin singah, ka adi numbor pat mun jawin beuh.

¹⁵(Ngara inŭh cherubim cherubim adi aku muko kiris di pang Yang Chebar.) Kan cherubim cherubim anŭ makat ka au-tarun

¹⁶ka sigen adŭp-i, kaja kaja anŭ sua ngga ngara. Kan ngara murai urad re mikabur, kaja kaja anŭ sua gŭh ngga ngara.

¹⁷Kan cherubim cherubim anŭ rŭŭ, kaja kaja anŭ rŭŭ; ka kan cherubim cherubim anŭ mikabur, kaja kaja anŭ sua ngga ngara, sabab cherubim cherubim anŭ adi nguasa-i.

¹⁸Komŭnŭ jawa bragah TUHAN bu so tiban Ramin TUHAN ka panu ka yŭn adi nyirungan cherubim cherubim anŭ.

¹⁹Ngara murai urad ngara ka mikabur makat so tana sitadŭn aku nyibatŭh ngara, ka kaja kaja anŭ sua ngga ngara. Ngara rŭŭ di tura ka timor tiban-bās Ramin TUHAN, ka jawa bragah TUHAN nyirinyak di tunduh ngara.

²⁰Aku natŭng ngara anŭ cherubim cherubim adi aku muko kiris di ribo Tapa Israel di pang Yang Chebar.

²¹Barang pŭrŭng dāng anŭ biyŭn pat jawin, pat urad, ka agi kayuh adi mun tangan manusia di punda barang urad.

²²Jawin ngara mun jawin[20] adi aku muko kiris di pang Yang Chebar. Barang pŭrŭng dāng anŭ panu tŭnggŭn ka jawin.