Read Biatah Bidayuh EZEKIEL 11 Bible Online

EZEKIEL 11 - Biatah Bidayuh bible

EZEKIEL 11

¹Roh Tapa pakat aku ka taban aku ka tiban-bās parad ka timor Ramin TUHAN. Diginŭ sindŭk tiban-bās anŭ aku kiris duwŭh puru-rimŭh naan daya, samŭn Jaazaniah anak Azzur ngga Pelatiah anak Benaiah, duwŭh naan pinguru bangsa.

²Tapa nang di aku, “Manusia, bara daya ati bisatur ndai kayuh adi arap ka nggen pinganang pitayan adi arap darŭm kupo ati.

³Ngara nang, ‘Dŭm dŭh tui ata re pijog ramin dinge.[21] Kupo ati inŭh keya ka priok, ka ata keya ka dagin darŭm-i, pak mua gŭh amai-i tak ata so apui.’

⁴Ngapŭi meh, manusia, kidaan agah pasar ukum adi re nyatŭk ngara.”

⁵Roh TUHAN nguasa aku, ka TUHAN kidaan di aku bada nggen di bara daya pinganang ati: “Daya Israel, Aku puan kayuh adi angān nang ka kayuh adi angān bisatur an ndai.

⁶Angān mbŭh siŭ raru bagŭ daya digiti darŭm kupo ndŭg ka aran mbŭh puno ngga tadang.

⁷“Jadi anŭ inŭh kayuh adi Aku, TUHAN Raja, nang di angān. Kupo ati inŭh sawŭ priok, pak ani meh dagin di darŭm-i? Tadang ngara adi angān mbŭh siŭ inŭh! Angān re mating digiti -- angān re Ku taran so kupo ati!

⁸Angān taru pedang kah? Aku re bada daya mandŭg nyerang angān ngga pedang.

⁹Aku re taban angān ngga ruah so kupo ka nggen angān ka darŭm tangan daya tami. Aku mbŭh nggen ukum kabŭs di angān,

¹⁰ka angān re dog siŭ darŭm perang darŭm rais adŭp ngan. Komŭnŭ barang naan daya re puan nang Aku ati TUHAN.

¹¹Kupo ati re dŭh grindung angān keya ka priok grindung dagin adi darŭm-i. Aku re ngukum angān di tadŭ yŭn angān agi darŭm tarun tana Israel.

¹²Angān re puan nang Aku ati TUHAN ka sitadŭn angān sita ukum-adat rais rais adi sindŭk angān, angān mbŭh miranggar ukum-adat Ku ka nyibireu pesan Ku.”

¹³Sitadŭn aku minyu-binabi, Pelatiah tumbang kabŭs. Aku sidikang di tana ka nyirais nang, “Dŭhnyah, TUHAN Raja! Kaam re siŭ sopŭrŭg daya adi babŭ udip di Israel kah?”

¹⁴TUHAN minyu ngga aku.

¹⁵“Manusia,” Ayŭh nang, “bara daya adi rŭŭ di Jerusalem minyu pasar kuu ka pasar daya Israel adi samah bangsa ngga adŭp mu adi dog taran ka rais tami. Ngara nang, ‘Ngara adi dog taran mbŭh raru jo ka dŭh re tungang nyambah TUHAN. Ayŭh mbŭh nggen tarun tana ati di ata.’

¹⁶“Madin kidaan di bara dingan mu adi samah dog taran kayuh adi Aku nang. Aku inŭh adi pait ngara bada rŭŭ jo bigaur ngga bangsa bangsa bŭkŭn ka bada ngara papar sasah di rais rais bŭkŭn. Pak yŭn tika ati, Aku re agi ngga ngara di yŭn ngara dog taran.

¹⁷“Jadi kidaan di ngara kayuh adi Aku, adi TUHAN Raja, nang. Aku re nguruk taban ngara ngga ruah so rais rais adi yŭn Aku bada ngara papar sasah, ka re nggen tarun tana Israel pari ka ngara.

¹⁸Kan ngara pari, ngara an taran sopŭrŭg kayuh adi sembar ka adi sipŭ, mun tibudo tibudo adi ngara dapŭd.

¹⁹ Aku re nggen di ngara atin adi bauh ka pikir adi bauh. Aku re gati atin ngara adi baking mun batuh ngga atin adi nundok.

²⁰Komŭnŭ ngara re sita ukum ukum-adat Ku ka tŭtŭd sita sopŭrŭg pesan Ku. Ngara re jadi daya Ku ka Aku re jadi Tapa ngara.

²¹Pak Aku re ngukum daya adi suka nyambah tibudo adi sembar ka adi sipŭ anŭ. Aku re ngukum ngara amai kayuh adi ngara mbŭh ndai.” TUHAN Raja mbŭh minyu.

²² Cherubim cherubim anŭ piguru mikabur, ka kaja kaja-krita anŭ sua ngga ngara. Jawa bragah Tapa Israel nyirinyak di tunduh ngara.

²³Komŭnŭ jawa bragah anŭ bu so kupo anŭ di ka darŭd di parad ka timor kupo.

²⁴Keya ka darŭm pŭmŭh roh Tapa pakat aku ka taban aku pari ka bara adi dog taran di Babylonia. Komŭnŭ kayuh anŭ adi keya ka darŭm pŭmŭh miyap,

²⁵ka aku kidaan di ngara, adi dog taran, sopŭrŭg kayuh adi TUHAN mbŭh kiren di aku.