Read Biatah Bidayuh EZEKIEL 12 Bible Online

EZEKIEL 12 - Biatah Bidayuh bible

EZEKIEL 12

¹TUHAN minyu ngga aku.

² “Manusia,” Ayŭh nang, “kuu udip di ruang daya adi an birawan. Ngara biyŭn batŭh, pak ngara dŭh kiris tarun; ngara biyŭn kajit, pak ngara dŭh dingah ani ani, sabab ngara daya adi suka birawan.

³“Madin, manusia, bipisŭn meh mun daya nupang, ka matak diŭ so andu karŭm. Bada barang naan daya kiris kuu bu tingge kupo panu di ka tarun bŭkŭn. Kadŭ ngara adi an birawan anŭ re kiris kuu.[22]

⁴Sitadŭn andu gibabŭ jawa, bipisŭn sidia adŭp mu yŭn re dog taran ka rais tami, isa ngara kiris kuu; komŭnŭ bada ngara kiris kuu bu singumi andu mun daya adi dog taran so rais adŭp mu.

⁵Sitadŭn ngara kiris kuu bu, ndai ndi rubang di sindung ramin mu ka taban bakot barang mu ngga ruah so nŭ.

⁶Tandah ngara kiris kuu na bakot barang mu di tunduh kawin mu ka ruah ka yŭn karŭm ngga jawin mu dog nutu, isa kuu dŭh dapŭd kiris kamaki kuu panu. Pingandai mu anŭ re jadi pinyibakan di bara daya Israel.”

⁷Aku ndai nimun adi TUHAN mbŭh bada aku ndai. Di andu anŭ aku bipisŭn mun daya nupang, ka singumi andu anŭ kan-i mbŭh re karŭm aku ndai rubang ngga tangan adŭp ku di sindung ramin ku. Komŭnŭ aku ruah, ka buang daya bagŭ kiris, aku na bakot barang ku di kawin ku ka bu.

⁸Ngga isan isan andu jawa ndi TUHAN minyu ngga aku.

⁹“Manusia,” Ayŭh nang, “amai madin bara daya Israel adi an birawan anŭ mbŭh siken ani ndai mu,

¹⁰kidaan di ngara kayuh adi Aku, adi TUHAN Raja, nang di ngara. Agah ati inŭh yŭn raja adi mritah di Jerusalem ka yŭn sopŭrŭg daya adi rŭŭ diginŭ.

¹¹Kidaan di ngara nang kayuh adi Aku mbŭh ndai inŭh tandā kayuh adi re jadi di ngara -- ngara re jadi daya adi bu mangān rais adŭp-i ka jadi daya-takap.

¹²Raja adi mritah ngara re kabis barang adŭp-i singarŭm ka bu so rubang adi ngara ndai yŭn-i di sindung. Ayŭh re nutu batŭh-i ka dŭh kiris kamaki ayŭh panu.

¹³ Pak Aku re tŭŭn jaring Ku ka nakap ayŭh. Komŭnŭ Aku re taban ayŭh ka kupo Babylon, di yŭn ayŭh re kabŭs buang dŭh kiris kupo anŭ.

¹⁴Aku re bada papar sasah ka barang yŭn sopŭrŭg daya adi di istana-i, bara adi tukang pitayan ngga bara pingibān-i, ka daya re jiroh ngara yŭn re siŭ.

¹⁵“Kan Aku bada ngara papar sasah di ruang bangsa bangsa bŭkŭn ka di rais rais tami, ngara re puan nang Aku ati TUHAN.

¹⁶Aku re bada kada so ngara siramat so biperang, so apag, ka so andam, isa di ruang bangsa bangsa anŭ ngara re rada munki masam sipŭ pingandai ngara ka re ngaku Aku ati TUHAN.”

¹⁷TUHAN minyu ngga aku.

¹⁸“Manusia,” Ayŭh nang, “kimŭtŭr kan kuu man, ka nitet amai taru kan kuu nok.

¹⁹Kidaan di barang naan daya bangsa Israel nang ati inŭh agah so TUHAN Raja yŭn daya Jerusalem adi gibabŭ rŭŭ di tarun tana ngara: ngara re kimŭtŭr kan ngara man ka nitet amai taru kan ngara nok. Tarun tana ngara re dog pirabur ka jadi matung, sabab barang naan adi rŭŭ diginŭ mbŭh miranggar ukum-adat.

²⁰Kupo kupo adi madin puno ngga bara daya re dog pirabur, ka rais anŭ re jadi tarun tana-pajam. Komŭnŭ ngara re puan nang Aku ati TUHAN.”

²¹TUHAN minyu ngga aku.

²²“Manusia,” Ayŭh nang, “mani daya Israel pari pari nang pitas ati: ‘Tika ripuan, ka pininjau jadi au-tarun’?

²³Madin kidaan di ngara kayuh adi Aku, adi TUHAN Raja, mbŭh nang pasar anŭ. Aku re pirŭŭ pitas anŭ. Pitas anŭ re dŭh tia pari pari dog nang darŭm Israel. Kidaan di ngara nang: tika mbŭh mandŭg, ka pininjau anŭ mbŭh re jadi bitŭtŭk!

²⁴“Di ruang daya Israel re mating tia daya nang adŭp-i kiris kayuh keya ka darŭm pŭmŭh, bait pinganang-binabi adi kinanyap daya.

²⁵Aku, adi TUHAN, re minyu ngga ngara, ka kayuh adi Aku nang re dog ndai. Re mating tia nyikite. Di tika angān gibabŭ udip, angān adi an birawan, Aku re ndai kayuh adi Aku muko bakan di angān nang Aku re ndai. Aku mbŭh minyu,” nang TUHAN Raja.

²⁶TUHAN nang di aku,

²⁷“Manusia, bara daya Israel pikir kayuh adi kuu kiris keya ka darŭm pŭmŭh anŭ ngga pinganang-binabi mu inŭh pasar kayuh adi gibabŭ tui bayuh.

²⁸Jadi kidaan di ngara kayuh adi Aku, adi TUHAN Raja, nang: re mating tia nyikite. Kayuh adi Aku mbŭh nang re dog ndai. Aku, adi TUHAN Raja, mbŭh minyu!”