Read Biatah Bidayuh EZEKIEL 13 Bible Online

EZEKIEL 13 - Biatah Bidayuh bible

EZEKIEL 13

¹TUHAN minyu ngga aku.

²“Manusia,” Ayŭh nang, “nyarah bara nabi kadong Israel adi nimbur pinganang-binabi ngara. Kidaan di ngara bada dingah pinganang TUHAN.”

³Ati inŭh kayuh adi TUHAN Raja nang: “Mbŭh payah inŭh bara nabi adi budo anŭ! Ngara nimbur pinyidapŭd adŭp-i ka nimbur adŭp-i agi kiris kayuh keya ka darŭm pŭmŭh.

⁴Daya Israel, bara nabi ngan dŭh biguna keya ka bisirŭh adi rŭŭ di tibawang kupo.

⁵Ngara dŭh jaga tarun tarun adi yŭn sindung mbŭh rubuh, dŭh gŭh ngara pari pijog sindung, ngapŭi Israel dŭh dapŭd dog ngibān kan perang timbur di andu TUHAN.

⁶Kayuh adi ngara kiris keya ka darŭm pŭmŭh dŭh sawŭ, ka pininjau ngara inŭh pinganang kadong. Ngara nang adŭp-i kidaan agah Ku, pak Aku mating pait ngara. Ngara harap pinganang-i re jadi bitŭtŭk!

⁷Kidaan di ngara: kayuh anŭ adi angān kiris keya ka darŭm pŭmŭh dŭh sawŭ, ka pininjau ngan inŭh pinganang kadong. Angān nang-i pinganang Ku, pak Aku mating minyu ngga angān!”

⁸Jadi TUHAN Raja nang di ngara, “Pinganang ngan dŭh sawŭ, ka kayuh anŭ adi angān kiris keya ka darŭm pŭmŭh inŭh kayuh kadong. Aku rawan angān.

⁹Aku re ngukum angān bara nabi adi kiris kayuh keya ka darŭm pŭmŭh pak adi dŭh sawŭ, ka adi nggen pininjau adi kinanyap daya. Angān re mating diginŭ kan daya Ku tikuruk matŭd pikir-kira ngara; dŭn ngan re dŭh dog pibŭrŭt di susud dŭn bara rayat Israel; angān dŭh re pari ka tarun tana adŭp ngan. Komŭnŭ angān re puan nang Aku ati TUHAN Raja.

¹⁰ “Bara nabi kinanyap daya Ku nang sopŭrŭg kayuh agi siramat pŭn ka sopŭrŭg-i dŭh! Daya Ku mbŭh pijog sindung adi gayo, ka bara nabi mandŭg ka nutu-i ngga chat.

¹¹Kidaan di bara nabi anŭ nang sindung ngara re rubuh. Aku re pait ujen adi bangat. Ujen batuh re rabu nyatŭk-i, ka sabak adi daras re poh maka-i.

¹²Sindung anŭ re rubuh, ka barang naan daya re siken ani kana-i chat anŭ.”

¹³Ati inŭh kayuh adi TUHAN Raja nang: “Darŭm baji Ku Aku re pait sabak adi daras, ujen adi bangat, ka ujen batuh bada pirusak sindung anŭ.

¹⁴Aku re nyirubuh sindung adi ngara chat, ka re mapar-i ndŭg ka batuh batuh pinagap rasan-i tatŭng. Sindung anŭ re rubuh ka siŭ sopŭrŭg ngan. Komŭnŭ barang naan daya re puan nang Aku ati TUHAN.

¹⁵“Sindung anŭ ngga ngara adi nutu-i ngga chat re kinyam bisā baji Ku. Komŭnŭ Aku re kidaan di angān nang sindung anŭ mbŭh mating ka simŭnŭ gŭh ngara adi muko chat-i --

¹⁶bara nabi anŭ adi kidaan di Jerusalem nang sopŭrŭg kayuh agi siramat, kan sopŭrŭg kayuh dŭh siramat!” TUHAN Raja mbŭh minyu.

¹⁷TUHAN nang, “Madin, manusia, tingga bara dayung anŭ di ruang daya mu, adi nimbur pininjau. Nyarah ngara

¹⁸ka kidaan di ngara kayuh adi TUHAN Raja nang di ngara: “Mbŭh payah inŭh angān bara dayung! Angān ndai garang jimat yŭn barang naan daya ka ndai banang biruri-karŭm ngga bibubok, isa ngara biyŭn kuasa di tunduh pimudip daya bŭkŭn. Angān raan nguasa udip kabŭs daya Ku yŭn utung adŭp ngan.

¹⁹Angān ngamun Aku di sirung jawin daya Ku ngga dapŭd duwŭh taruh agŭm jeri ka duwŭh taruh baru ruti. Angān siŭ daya adi dŭh patut dog siŭ, ka angān bada udip daya adi dŭh patut udip. Jadi angān kadong daya Ku, ka ngara sabah angān.”

²⁰Ngapŭi ati inŭh kayuh adi TUHAN Raja nang: “Aku tiru di garang jimat anŭ adi ngga angān suba nguasa udip kabŭs daya bŭkŭn. Aku re nyirugut-i so tangan ngan ka pirupas daya adi angān nguasa.[23]

²¹Aku re nyirugut bubok ngan anŭ ka bada daya Ku adu adu rupas so kuasa ngan. Ka angān re puan nang Aku ati TUHAN.

²²“Ngga pinganang kadong ngan angān pijimŭ atin daya adi kana, adi Aku dŭh an ida ida ngga. Angān ngasu daya arap ndai kraja arap ndŭg ka ngara dŭh dapŭd dog nyiramat.

²³Jadi madin kayuh adi angān kiris keya ka darŭm pŭmŭh pak adi dŭh sawŭ ngga pininjau ngan adi kinanyap daya mbŭh mungan. Aku nyiramat daya Ku so kuasa ngan, isa angān puan nang Aku ati TUHAN.”