Read Biatah Bidayuh EZEKIEL 14 Bible Online

EZEKIEL 14 - Biatah Bidayuh bible

EZEKIEL 14

¹Kada so bara pinguru daya Israel mandŭg ka bisiken ngga aku pasar pinyiraan TUHAN.

²Komŭnŭ TUHAN minyu ngga aku.

³“Manusia,” Ayŭh nang, “ngara ati mbŭh na atin ngara di tibudo ka anŭ bada ngara tanŭ ka bidosa. Ngara pikir Aku re nggen pinyinam di ngara kah?

⁴“Madin minyu ngga ngara ka kidaan kayuh adi Aku, adi TUHAN Raja, nang di ngara: barang naan daya Israel adi mbŭh na atin ngara di tibudo adi bada ngara tanŭ ka bidosa ka ripas anŭ mandŭg di bisiken ngga nabi, re dapŭd pinyinam so Aku, anŭ inŭh pinyinam adi situgu ngga dosa ngara!

⁵Sopŭrŭg tibudo anŭ mbŭh pijo daya Israel so Aku, pak ngga pinyinam Ku Aku harap Aku tungang marik atin ngara pari ka Aku.

⁶“Ngapŭi meh, kidaan di daya Israel kayuh adi Aku, adi TUHAN Raja, nang: marik pimudip ngan bu so tibudo ngan adi sipŭ anŭ pari ka Aku.

⁷“Kan tadŭ daya Israel bait ndi naan so bara daya tami adi rŭŭ bigaur ngga daya Israel bu so Aku ka nyambah tibudo, ka ripas anŭ di bisiken ngga nabi, Aku adi TUHAN, re nggen pinyinam di daya anŭ!

⁸Aku re rawan ayŭh. Aku re bada ayŭh jadi suto ndu pinyibakan. Aku re kadi ayŭh so dupan bara daya Ku, isa angān puan nang Aku ati TUHAN.

⁹“Kambŭi ndi naan nabi dog nipu bada nggen pinyinam adi dŭh sawŭ, anŭ mbŭh sabab Aku, adi TUHAN, mbŭh nipu ayŭh. Aku re kadi ayŭh so dupan daya Israel.

¹⁰Nabi anŭ ngga sianŭ adi bisiken ngga ayŭh re trima ukum adi samah.

¹¹Aku re ndai simŭnŭ ngga bada daya Israel dŭh tagan Aku ka nyembar adŭp ngara ngga dosa. Ngara re jadi daya Ku, ka Aku re jadi Tapa ngara.” TUHAN Raja mbŭh minyu.

¹²TUHAN minyu ngga aku.

¹³“Manusia,” Ayŭh nang, “Kambŭi rais bidosa ka dŭh tŭtŭd di Aku, Aku re pakat tangan Ku ka pirŭŭ pimandŭg pinguman-i. Aku re pait apag ka siŭ manusia ngga dāng.

¹⁴Sunggu bait kani ngara adi taruh, Noah, Danel,[24] ngga Job, agi rŭŭ diginŭ, pinyikana ngara kaŭs-i nyiramat asŭng adŭp ngara.” TUHAN Raja mbŭh minyu.

¹⁵“Bait kah Aku pait dāng tarun bada siŭ manusia, ndŭg ka tarun tana anŭ bisā ka mating daya tungang panu mutas-i.

¹⁶Sunggu bait kani ngara adi taruh agi rŭŭ diginŭ, ka ngga adŭn Ku, adi TUHAN Raja, Tapa adi udip, anak adŭp ngara dŭh gŭh ngara re tungang nyiramat. Ngara re nyiramat asŭng adŭp ngara adŭ, ka tarun tana anŭ re jadi tarun tana-pajam.

¹⁷Bait kah Aku bada perang timbur di rais anŭ ka pait sinyata adi bisā ngga pirarap manusia ka dāng,

¹⁸ka sunggu bait kani ngara adi taruh agi rŭŭ diginŭ, ka ngga adŭn Ku, adi TUHAN Raja, Tapa adi udip, anak adŭp ngara dŭh gŭh ngara re tungang nyiramat, adŭ-i asŭng adŭp ngara.

¹⁹“Kambŭi Aku pait sesak-andam ka rais anŭ, ka darŭm baji Ku siŭ bagŭ daya ka dāng,

²⁰sunggu Noah, Danel, ngga Job bait kani agi rŭŭ diginŭ, ka ngga adŭn Ku, adi TUHAN Raja, Tapa adi udip, anak adŭp ngara dŭh gŭh ngara re tungang nyiramat. Pinyikana ngara kaŭs-i dapŭd nyiramat asŭng adŭp ngara.”

²¹ Ati inŭh kayuh adi TUHAN Raja nang: “Aku re pait pat ukum Ku adi bisā bada nyatŭk Jerusalem, anŭ inŭh perang, apag, dāng tarun, ka andam, ngga pirabur manusia ka dāng.

²²Kambŭi agi daya babŭ udip ka nyiramat anak-i, tingga ngara kan ngara mandŭg ka kuu. Tingga munki masam arap-i ngara, ka sabah meh ukum adi Aku pait bada nyatŭk Jerusalem inŭh patut;

²³ka kuu meh re puan nang agi sabab adi kana yŭn sopŭrŭg kayuh adi Aku ndai.” TUHAN Raja mbŭh minyu.