Read Biatah Bidayuh EZEKIEL 16 Bible Online

EZEKIEL 16 - Biatah Bidayuh bible

EZEKIEL 16

²“Manusia,” Ayŭh nang, “kidaan di Jerusalem kayuh adi sipŭ anŭ adi mbŭh-i ndai.

³Kidaan di Jerusalem kayuh adi TUHAN Raja nang di ayŭh: “Kuu dog biranak di tana Canaan. Sama mu daya Amor, ka sindŭ mu daya Hitti.[25]

⁴Di andu kuu dog biranak, mating daya kapŭg taris pasid mu bait mamuh kuu[26] bait namu pŭrŭng ganan mu ngga garo, bait madung kuu.

⁵Mating daya nak masi di kuu ka ndai simŭnŭ di kuu. Kan kuu dog ruwan, mating daya rindu kuu. Kuu dog taran ka sapa di pakan.

⁶“Komŭnŭ Aku murah ka kiris kuu bigurai di deya adŭp mu. Kuu mbŭh bitameg adŭ ngga deya, pak Aku dŭh an tandah kuu kabŭs.

⁷Aku bada kuu udip mun anak kayuh-udip adi pimuah. Kuu bitambah bake ka bigatung ka jadi dayung mara.[27] Sisuh mu ramus, ka ubok mu mbŭh ambu, pak kuu gibabŭ sitabet.

⁸“Darŭm Aku panu murah, Aku rada tipuh-i mbŭh mandŭg adi ngga mu biawang. Aku nutu pŭrŭng ganan mu adi babŭ dah dah ngga jipo-tunduh Ku ka bijanji an awang kuu. Sawŭ, Aku ndai simanya sawan ngga kuu, ka kuu jadi jaku.” Anŭ inŭh kayuh adi TUHAN Raja nang.

⁹“Komŭnŭ Aku tambit piin ka ngu deya so pŭrŭng ganan mu, Aku susen inyo kanā di kurit mu.

¹⁰Aku kibarui kuu ngga gaon adi dog ngabuh ngga butik bunga jiit ka nggen di kuu kasut adi dog ndai so birurang adi siabo kana, bŭŭng ubok adi dog ndai so banang linen, ka jipo banang sutera.

¹¹Aku ngudat kuu ngga kukong ka garang.

¹²Aku nggen di kuu sisin undung ngga sigating ka makota adi ramus.

¹³Kuu biyŭn pimakai mas pirak, ka kuu ari nēn piraka banang linen ngga banang sutera adi dog ngabuh ngga butik bunga jiit. Kuu man ruti dog ndai so tibaduk adi siabo kana ngga ju banyis ka inyo kanā. Pinyiramus mu nyirinyak, ka kuu jadi rani.

¹⁴Kuu jadi timagah di barang bangsa amai pinyiramus mu, sabab Aku inŭh adi bada kuu ramus.” Anŭ inŭh kayuh adi TUHAN Raja nang.

¹⁵“Pak kuu nyiraba pinyiramus mu ngga dŭn timagah mu; kuu bŭŭs ngga barang naan daya adi mandŭg ka yŭn mu.[28]

¹⁶Kuu pakai kada piraka mu ngga ngabuh tarun yŭn mu bisambah, ka keya ka dayung sundar,[29] kuu nggen adŭp mu di barang naan daya.

¹⁷Kuu pakai pirak ka mas adi nggen Ku di kuu ngga ndai patong patong dari, ka tanggah ngga patong patong anŭ.

¹⁸Kuu tambit piraka adi dog ngabuh ngga butik bunga jiit adi Aku nggen di kuu ka na-i di patong patong anŭ, ka kuu jugan ka patong patong anŭ inyo kanā ngga kimanyan adi muko Aku nggen di kuu.

¹⁹Aku nggen di kuu pinguman -- tibaduk adi siabo kana, inyo kanā, ka ju banyis -- pak kuu jugan-i ndu sadis ngga pimunos asŭng tibudo.” Anŭ inŭh kayuh adi TUHAN Raja nang.

²⁰“Komŭnŭ kuu tambit anak anak dari ngga anak anak dayung adi kuu mbŭh biranak yŭn Ku ka jugan ngara ndu sadis ka tibudo. Gibayuh kah-i sadang kuu dŭh tŭtŭd di Aku?

²¹Mani kuu sirapas anak anak Ku ka nyadis ngara ka tibudo?

²²Sitadŭn pimudip mu adi sipŭ anŭ jadi dayung sundar kuu bŭn ingat munki adŭp mu gi-sŭ jah -- di andu kuu dŭh biyŭn piraka, bigurai di deya adŭp mu.”

²³TUHAN Raja nang, “Mbŭh payah inŭh kuu! Payah! Kuu ndai sopŭrŭg kayuh arap anŭ, ka komŭnŭ

²⁴di bŭngŭn barang aran kuu pijog tarun yŭn nyambah tibudo ka nyundar.

²⁵Kuu kinais pinyiramus mu di tawang. Kuu jugan adŭp mu di barang naan daya adi murah, ka kuu dŭh ko ko nyundar.

²⁶Kuu tandah rasū rasū mu daya Egypt adi mingaras nyibŭŭs ngga kuu, ka ngga pingandai nyundar mu anŭ kuu mbŭh kinuas Aku.

²⁷“Madin Aku mbŭh pakat tangan Ku re ngukum kuu ka tambit berkat adi Aku mbŭh nggen di kuu. Aku mbŭh nyerah kuu ka daya Philistine, adi tiru di kuu ka adi sidot di pingandai kais mu anŭ.

²⁸“Sabab kuu dŭh puas ngga ngara adi bŭkŭn, kuu di tadak daya Assyria. Kuu dayung sundar ngara, pak ngara dŭh gŭh tungang muas pinyiraan pŭrŭng mu.

²⁹Kuu dayung sundar gŭh yŭn daya Babylonia, bangsa bara daya dagang anŭ, pak ngara dŭh gŭh tungang muas pinyiraan pŭrŭng mu.”

³⁰[30] Ati inŭh kayuh adi TUHAN Raja nang: “Sopŭrŭg pingandai mu anŭ mun pingandai dayung sundar adi dŭh puan adŭp-i mangŭh.

³¹Di barang aran kuu pijog tarun yŭn nyambah tibudo ka yŭn nyundar. Pak kuu ndai simŭnŭ dŭh sabab raan dapŭd duit mun dayung sundar.

³²Kuu keya ka dayung adi tanggah ngga daya saruh, ka dŭh awang banŭh adŭp-i.

³³Dayung sundar dog bayar, pak kuu nggen pinganggen di sopŭrŭg ambai mu ka nyuap ngara bada mandŭg so barang yŭn da bŭŭs ngga adŭp mu.

³⁴Kuu dŭh mun dayung sundar adi bŭkŭn. Mating daya takan kuu bada jadi dayung sundar. Kuu dŭh dog bayar, pak adŭp mu adi bayar ngara! Sawŭ, kuu raru bŭkŭn.”

³⁵Ngapŭi meh, Jerusalem, kuu sundar! Dingah kayuh adi TUHAN nang.

³⁶Ati inŭh kayuh adi TUHAN Raja nang: “Kuu pirukos piraka mu, ka mun dayung sundar kuu nggen adŭp mu di bara ambai mu ka di sopŭrŭg tibudo mu adi sipŭ anŭ, ka kuu siŭ anak anak adŭp mu ndu sadis ka tibudo.

³⁷Sabab anŭ Aku re taban sopŭrŭg ambai mu bada mandŭg tikuruk -- ngara adi kuu rindu ngga adi kuu tiru. Aku re taban ngara bada kirurung kuu, ka komŭnŭ Aku re pirukos piraka mu ka bada ngara kiris kuu sitabet.

³⁸Aku re nunggu kuu amai tanggah mu ka amai kuu mbŭh siŭ daya, ka darŭm baji Ku Aku re ngukum kuu ngga pinyikabŭs.

³⁹Aku re na kuu ka darŭm tangan ngara, ka ngara re nyirubuh tarun yŭn mu nyundar ka tarun yŭn mu nyambah tibudo. Ngara re tambit piraka ngga pimakai mas pirak mu ndŭg ka kuu mbŭh sitabet.

⁴⁰“Ngara re ngasu bara daya bagŭ bada manjan kuu ngga batuh, ka ngara re nŭtŭb kuu ngga pedang.

⁴¹Ngara re badang ramin ramin mu ka bada bara dayung kiris ukum mu. Aku re bada kuu dŭh tia jadi dayung sundar ka bada kuu dŭh tia nggen pinganggen di bara ambai mu.

⁴²Ka-i meh baji Ku ngga magā Ku ko. Aku re dŭh tia baji bait sina.

⁴³Kuu mbŭh kambŭt simuki Aku ngga kuu di andu kuu gibabŭ sŭ, ka kuu mbŭh kinuas Aku ngga sopŭrŭg pingandai mu. Anŭ sabab kuu dŭh siŭn dŭh trima ukum yŭn sopŭrŭg anŭ. Mani kuu ndai pingandai kais ngga nambah pingandai sipŭ mu anŭ adi bŭkŭn?” TUHAN Raja mbŭh minyu.

⁴⁴TUHAN nang, “Daya re pakai pinganang pitas pasar kuu, Jerusalem: ‘Mun sindŭ, mun anak.’

⁴⁵Kuu sawŭ anak sindŭ mu. Sindŭ mu tiru di banŭh-i ngga di anak-i. Kuu mun jurud jurud dayung mu, adi tiru di banŭh banŭh ngara ngga di anak anak ngara. Sindŭ mu ngga jurud jurud dayung kupo mu inŭh daya Hitti; ka sama ngara inŭh daya Amor[31]

⁴⁶“Kaka dayung mu inŭh Samaria, di utara, ngga anak anak kupo-i. Sude dayung mu, ngga anak anak kupo-i, inŭh Sodom, di siratan.

⁴⁷Kuu dŭh puas tunda suto danding pingandai sipŭ anŭ so ngara. Dŭh tui urah mu mbŭh rabis arap so tung ngara darŭm sopŭrŭg pingandai mu.

⁴⁸“Siragi Aku ati Tapa adi udip,” TUHAN Raja nang, “Sude mu, Sodom ngga anak anak kupo-i bŭn ndai arap adi kuu ngga anak anak mu mbŭh ndai.

⁴⁹Ayŭh ngga anak anak dayung-i sambuh amai ngara biyŭn raru bagŭ kayuh man ka rŭŭ darŭm damai ngga siramat, pak ngara dŭh turung daya adi sirata ngga adi susah.

⁵⁰Ngara sambuh ka baking ka ndai kayuh adi Aku tiru, jadi Aku pirabur ngara, nimun adi mbŭh mu puan.

⁵¹“Dosa Samaria dŭh tungang sitangah dosa mu. Pingandai mu mbŭh rabis sipŭ so adi mbŭh-i ndai. Sabab kuu mbŭh raru arap, Samaria ngga Sodom mbŭh mun adi dŭh biyŭn sarah kambŭi danding ngga kuu.

⁵²Ka madin kuu re nyijŭn mangŭh mu. Dosa mu mbŭh rabis arap so dosa jurud jurud dayung mu, adi bada ngara mun adi dŭh sarah kambŭi danding ngga kuu. Madin marui bireh meh jawin mu nyijŭn mangŭh mu, sabab jurud jurud dayung adŭp mu mbŭh mun adi bisig.”

⁵³TUHAN nang di Jerusalem, “Aku re bada ngara pari mujur -- Sodom ngga anak anak kupo-i ka Samaria ngga anak anak kupo-i. Sawŭ, Aku re bada kuu pari mujur gŭh.

⁵⁴Kuu re mangŭh ngarun adŭp mu, ka mangŭh mu re kiren di jurud jurud dayung mu nang munki masam kana dŭ inŭh ngara.

⁵⁵Ngara re pari mujur, ka kuu ngga anak anak kupo mu re pari kana mun adi dawŭ-i.

⁵⁶Agi kah kuu bitapat pasar Sodom darŭm tipuh kuu babŭ sambuh dawŭ-i

⁵⁷ka diŭ so arap adi kuu mbŭh ndai dog kiren? Madin kuu mbŭh mun ayŭh; kuu mbŭh jadi buwa tapat daya Edom, daya Philistine, ka rasū rasū mu adi bŭkŭn adi tiru di kuu.

⁵⁸Kuu dŭh siŭn dŭh sangsara amai pingandai kais ka sipŭ anŭ adi kuu mbŭh ndai.” TUHAN mbŭh minyu.

⁵⁹TUHAN Raja nang, “Aku re ndai di tunduh mu nanyam patut kuu kinyam, sabab kuu nyipunok janji mu ka miranggar simanya adi Aku ndai ngga kuu.

⁶⁰Pak Aku re ingat simanya adi Aku mbŭh ndai ngga kuu di andu kuu gibabŭ mara, ka Aku re ndai ngga kuu simanya adi tan adu adu.

⁶¹Kuu re ingat urah adŭp mu, ka re mangŭh ngarun-i kan kaka dayung mu ngga sude dayung mu pari ka kuu. Aku re bada ngara jadi keya ka anak anak dayung di kuu, sunggu anŭ dŭh ndi so simanya Ku ngga kuu.

⁶²Aku re pibauh simanya Ku ngga kuu, ka kuu re puan Aku ati TUHAN.

⁶³Aku re apun sopŭrŭg sarah adi kuu mbŭh ndai, pak kuu re ingat-i ka re raru mangŭh kanga baba mu.” TUHAN Raja mbŭh minyu.