Read Biatah Bidayuh EZEKIEL 17 Bible Online

EZEKIEL 17 - Biatah Bidayuh bible

EZEKIEL 17

¹TUHAN minyu ngga aku.

²“Manusia,” Ayŭh nang, “kidaan di bara daya Israel upama ati

³ngga bada ngara puan kayuh adi Aku, TUHAN Raja, nang di ngara: agi ndi raja manuk beuh adi biyŭn buruh adi ramus ka urad adi ramba, tiburai bayah. Beuh anŭ mikabur ka Darŭd Lebanon ka mata tijuk tŭngŭn sedar,

⁴adi-i taban ka tarun tana daya dagang, ka tingge-i di kupo ngara.

⁵Komŭnŭ beuh anŭ taban ndi anak kayuh-udip so tarun tana Israel ka purun-i di tana adi damŭn,[32] di yŭn agi piin ngga bada-i udip.

⁶Anak kayuh anŭ udip ka bidaan pidawŭn ka jadi tŭngŭn anggor adi bayah ka rapat atuh-i. Daan-i minŭgŭr ka sambu nuju beuh anŭ, ka uat uat-i tŭrŭp ka darŭm tana. Tŭngŭn anggor anŭ biyŭn raru bagŭ daan ngga dawŭn.

⁷“Agi ndi dinge raja manuk beuh adi baga urad-i ka tabar buruh-i. Ka madin uat tŭngŭn anggor anŭ timbu nuju parad ka beuh anŭ ka dawŭn dawŭn-i tipawŭt kamanŭ gŭh, harap adŭp-i dapŭd bagŭ dŭ piin so beuh anŭ so anŭ adi agi di teya di yŭn-i mbŭh udip.[33]

⁸Pak tŭngŭn anggor anŭ mbŭh dog purun di tana adi damŭn, sukup piin dieh isa-i pidawŭn ka buān buwa ka jadi tŭngŭn anggor adi sukup ramus.

⁹“Jadi Aku, adi TUHAN Raja, siken: dapŭd kah tŭngŭn anggor ati udip? Dŭh kah beuh anŭ adi diŭ dimbut-i ndŭg uat uat-i, nyirugut buwa buwa-i, ka mata daan daan-i ka tandah-i rayu? Beuh anŭ sanang dimbut-i, dŭh so dog turung bangsa adi raru bake bait kani.

¹⁰Sawŭ, tŭngŭn anggor anŭ dog purun, pak dapŭd kah-i udip ka timbu bigatung? Re rayu kah dŭh ayŭh kambŭi sabak timor poh maka-i? Re rayu kah dŭh ayŭh diginŭ di yŭn-i timbu?”

¹¹TUHAN nang di aku,

¹² “Siken bara adi an birawan anŭ kambŭi ngara puan rati upama anŭ. Kidaan di ngara nang raja Babylonia mandŭg ka Jerusalem ka taban raja ngga bara pinurung-i pari ka Babylonia.

¹³Ayŭh tambit ndi naan so rawang raja, ndai pekat-damai ngga ayŭh, ka bada ayŭh bipayu adŭp-i an nundok di ayŭh. Ayŭh nakap kudu kudu naan daya adi bās ndu daya-tubos

¹⁴isa bangsa anŭ dŭh makat birawan, ka ngga simŭnŭ bada pekat-damai anŭ pagŭng.

¹⁵Pak raja Judah rawan ka pait pingarun ka Egypt bada tambit kuda ngga tibaran bara soldadu adi raru bagŭ. Re mujur kah dŭh ayŭh? Dapŭd kah ayŭh pirupas adŭp-i so pingandai-i anŭ? Ayŭh dŭh dapŭd miranggar pekat-damai anŭ; ka dŭh ayŭh dapŭd pirupas adŭp-i so dog ukum!”

¹⁶“Siragi Aku ati Tapa adi udip,” nang TUHAN Raja, “raja anŭ re kabŭs di Babylonia sabab ayŭh miranggar payu ngga pekat-damai adi ayŭh mbŭh ndai ngga raja Babylonia, adi piguru ayŭh di takta.

¹⁷Tibaran bara soldadu raja Egypt, adi raru bake re dŭh gŭh tungang turung ayŭh darŭm biperang kan bara daya Babylonia ndai tugung tana ka ndai parit parit ngga re siŭ bagŭ daya.

¹⁸Ayŭh miranggar payu ngga pekat-damai adi ayŭh mbŭh ndai. Ngapŭi meh madin ayŭh re dŭh dapŭd pirupas adŭp-i.”

¹⁹TUHAN Raja nang, “Siragi Aku ati TUHAN adi udip, Aku re ngukum ayŭh amai miranggar pekat-damai adi ayŭh mbŭh bipayu pakai adŭn Ku an sita.

²⁰Aku re tŭŭn jaring adi dog pakai ngga ngasū ngga nakap ayŭh. Aku re taban ayŭh ka Babylonia ka ngukum ayŭh diginŭ, sabab ayŭh dŭh tŭtŭd di Aku.

²¹Bara soldadu-i adi siabo pandai birawan re dog siŭ darŭm biperang, ka adi gibabŭ udip re papar sasah ka barang yŭn. Ka angān meh re puan nang Aku, adi TUHAN, mbŭh minyu.”

²²Ati inŭh kayuh adi TUHAN Raja nang: “Aku re mŭpŭd tijuk adi mara so tŭngŭn kayuh sedar adi bigatung; Aku re purun-i di darŭd adi bigatung,

²³di darŭd Israel adi siabo bigatung. Ka-i re bidaan ka buān ka jadi tŭngŭn sedar adi sukup ramus. Barang masam manuk re bisarin dieh ka rŭŭ di sayung-i.

²⁴Sopŭrŭg tŭngŭn kayuh di tarun tana anŭ re puan nang Aku ati TUHAN. Aku tabŭng tŭngŭn tŭngŭn kayuh ka bada anak anak kayuh bigatung. Aku re bada tŭngŭn tŭngŭn kayuh barŭm rayu. ka bada tŭngŭn kayuh adi pisŭk barŭm. Aku, adi TUHAN, mbŭh minyu. Aku re ndai kayuh adi Aku mbŭh nang adŭp Ku re ndai.”