Read Biatah Bidayuh EZEKIEL 18 Bible Online

EZEKIEL 18 - Biatah Bidayuh bible

EZEKIEL 18

¹TUHAN minyu ngga aku

² ka nang, “Pitas ani ati adi daya pari pari nang di tarun tana Israel? ‘Pimas man anggor adi masŭm, pak anak adi kinyam sap masŭm-i.’

³“Siragi Aku ati Tapa adi udip,” nang TUHAN Raja, “angān re dŭh tia pari pari nang pitas anŭ di Israel.

⁴Asŭng barang naan daya Aku dapu, asŭng pimas samŭn asŭng anak daya. Daya adi bidosa inŭh adi re kabŭs.

⁵“Nyamtadar-i agi ndi naan daya adi sawŭ kana, tŭnggŭn buang jujur.

⁶Ayŭh dŭh nyambah tibudo daya Israel bait man sadis adi dog jugan di bari-sambah adi dog nagah. Ayŭh dŭh nyibudo sawŭn daya bait nyibŭŭs ngga dayung adi dog buran-i.

⁷Ayŭh dŭh nipu bait mirupak daya. Ayŭh pari kayuh adi daya nggen di ayŭh ndu jamen kayuh adi dog nginjam; ayŭh paan daya adi sibŭrŭk ka nggen piraka di daya adi dŭh biyŭn.

⁸Ayŭh nginjam duit di daya dŭh ngga dapŭd utung. Ayŭh abah ndai arap pak nggen pikir-kira adi jujur darŭm ngatur har daya.

⁹ Daya adi mun anŭ tunda pesan Ku ka nakit sita ukum-adat Ku. Ayŭh tŭnggŭn, ka ayŭh re udip,” nang TUHAN Raja.

¹⁰“Ka nyamtadar-i daya anŭ biyŭn ndi anak dari adi mirupak ka siŭ daya, adi ndai bagŭ pingandai arap

¹¹adi sama-i bŭn ndai. Ayŭh man sadis adi dog jugan di bari-sambah adi dog nagah ka nyibudo sawŭn daya.

¹²Ayŭh nipu daya sirata, ayŭh mirupak, ayŭh dŭh pari kayuh adi daya nggen di ayŭh ndu jamen kayuh adi dog nginjam. Ayŭh di ka bari-sambah adat karŭm, nyambah tibudo adi sipŭ anŭ,

¹³ka nginjam duit ngga dapŭd utung. Re udip kah daya adi mun anŭ? Ayŭh mbŭh ndai sopŭrŭg pingandai sipŭ anŭ, ka ayŭh sawŭ re kabŭs amai sarah-i anŭ.

¹⁴“Madin nyamtadar-i daya anŭ biyŭn ndi anak dari. Ayŭh kiris sopŭrŭg dosa adi sama-i ndai, pak dŭh tunda urah sama-i.

¹⁵Ayŭh dŭh nyambah tibudo daya Israel bait man sadis adi dog jugan di bari-sambah adi dog nagah. Ayŭh dŭh nyibudo sawŭn daya

¹⁶bait kinanyuh tadŭ daya bait mirupak daya. Ayŭh pari kayuh adi daya nggen di ayŭh ndu jamen kayuh adi dog nginjam. Ayŭh nggen pinguman di daya adi sirata ka nggen piraka di daya adi dŭh biyŭn.

¹⁷Ayŭh abah ndai arap[34] ka dŭh nginjam duit di daya ngga dapŭd utung. Ayŭh sita ukum-adat ka tunda pesan Ku. Ayŭh re dŭh kabŭs sabab dosa sama-i, pak manŭn re udip.

¹⁸Tibarik, sama-i adi nipu ka adi mirupak,[35] ka ari ndai arap di daya. Ngapŭi ayŭh kabŭs sabab dosa adi adŭp-i mbŭh ndai.

¹⁹“Pak angān siken, ‘Mani anak dŭh dapu tanggong dosa sama-i?’ Pinyinam-i inŭh anak ndai kayuh adi batur ka adi kana. Ayŭh sita ukum-adat Ku ka tunda-i ngga nakit, ngapŭi meh ayŭh manŭn re udip.

²⁰ Sianŭ adi bidosa inŭh adi re kabŭs. Anak dŭhsah dapu tanggong dosa sama-i, ka sama-i dŭhsah dapu tanggong dosa anak-i. Daya adi kana re dog ngupah amai pingandai kana, ka daya adi arap re dapu tanggong pingandai arap-i.

²¹“Kambŭi daya adi arap ko bidosa ka sita ukum-adat Ku, buang ndai kayuh adi batur ka adi kana, ayŭh re dŭh kabŭs; ayŭh manŭn re udip.

²²Sopŭrŭg dosa-i re dog apun, ka ayŭh re udip, sabab ayŭh ndai kayuh adi batur.

²³Angān pikir Aku gaŭn kiris daya arap kabŭs kah?” TUHAN Raja siken. “Dŭh, Aku raan dŭ kiris ayŭh marik pimudip-i pari ka Aku ka udip.

²⁴“Pak kambŭi daya tŭnggŭn ko ndai kayuh kana ka piguru ndai sopŭrŭg pingandai arap, pingandai sipŭ adi daya arap ndai, re adu adu udip kah ayŭh? Dŭh! Pingandai kana-i re abo dog kambŭt. Ayŭh re kabŭs sabab dŭh tŭtŭd di Aku ka sabab dosa-i.

²⁵“Pak angān nang, ‘Kayuh adi TUHAN ndai dŭh batur.’ Dingah Aku, angān daya Israel. Angān pikir Aku dŭh batur darŭm pingandai Ku kah? Angān inŭh adi dŭh batur darŭm pingandai ngan.

²⁶Kan daya adi tŭnggŭn ko ndai kana ka piguru ndai arap ka komŭnŭ ayŭh kabŭs, ayŭh kabŭs sabab arap adi ayŭh mbŭh ndai.

²⁷Kan daya arap ko bidosa ka ndai kayuh adi kana ka adi batur, ayŭh nyiramat asŭng-i.

²⁸Ayŭh rada kayuh adi-i ndai ka ko bidosa, jadi ayŭh manŭn re dŭh kabŭs, pak adu adu udip.

²⁹Ka angān daya Israel nang, ‘Kayuh adi TUHAN ndai dŭh batur.’ Angān pikir Aku dŭh batur darŭm pingandai Ku kah? Angān inŭh adi dŭh batur darŭm pingandai ngan.

³⁰“Madin Aku, adi TUHAN Raja, kidaan di angān daya Israel nang Aku re tingga arap kana barang naan ngan ngga kayuh adi angān mbŭh ndai. Marik pimudip ngan so sopŭrŭg kayuh arap adi angān mbŭh ndai, ka dŭhnyah bada dosa ngan pirabur angān.

³¹Pasan sopŭrŭg arap adi angān mbŭh ndai, ka bada pikir ngga atin ngan jadi bauh. Mani angān daya Israel raan kabŭs?

³²Aku abah bada daya kabŭs,” nang TUHAN Raja. “Marik pimudip ngan pari ka Tapa ka udip meh.”