Read Biatah Bidayuh EZEKIEL 2 Bible Online

EZEKIEL 2 - Biatah Bidayuh bible

EZEKIEL 2

¹Kan aku kiris kayuh anŭ, aku sidikang ka mŭŭb di tana. Komŭnŭ aku dingah sirŭŭn nang, “Manusia, mijog. Aku raan minyu ngga kuu.”

²Sitadŭn sirŭŭn anŭ minyu, roh Tapa mŭrŭt aku ka pakat aku bada mijog, ka aku dingah sirŭŭn anŭ pijuu nang,

³“Manusia, Aku pait kuu ka daya Israel. Ngara rawan Aku mun tayung-babuk ngara jah. Ndŭg madin ngara babŭ an birawan.

⁴Ngara baking ka dŭh stabi di Aku, ngapŭi Aku pait kuu bada kidaan di ngara kayuh adi Aku, adi TUHAN Raja, nang di ngara.

⁵Bait-i ngara dingah bait dŭh pinganang mu, ngara re puan nang nabi agi di ruang ngara.

⁶“Pak kuu, manusia, dŭh siŭn taru ngara bait ani ani adi ngara nang. Ngara re nyakar ka ngamun kuu; anŭ re keya ka udip di yun dudu rikara. Pak, dŭhnyah taru ngara bait tadŭ tadŭ kayuh adi ngara nang.

⁷Kuu re kidaan di ngara tadŭ kayuh adi Aku kidaan di kuu bada nang, bait-i ngara dingah bait dŭh. Ingat nŭh sopŭrŭg ngara inŭh daya adi an birawan.

⁸“Manusia, dingah kayuh adi Aku kidaan di kuu. Dŭhnyah an birawan mun ngara. Kanga baba mu ka man kayuh ati adi Aku nggen di kuu.”

⁹ Aku kiris tangan tudu aku, digŭng surat-barun.

¹⁰Tangan anŭ kuka surat-barun anŭ, ka aku kiris agi turis di soduwŭh parad-i. Sien susah agi dog nuris dieh, samŭn puās ngga sidaing.