Read Biatah Bidayuh EZEKIEL 20 Bible Online

EZEKIEL 20 - Biatah Bidayuh bible

EZEKIEL 20

¹Di andu adi simŭng darŭm buran rimŭh darŭm sawa adi ju kieh dog taran, kada pinguru kaum Israel mandŭg ka bisiken ngga aku pasar pinyiraan TUHAN. Ngara guru situra jawin ngga aku.

²Komŭnŭ TUHAN minyu ngga aku.

³“Manusia,” Ayŭh nang, “minyu ngga bara pinguru ati ka kidaan di ngara TUHAN Raja nang: angān mbŭh mandŭg an siken pinyiraan Ku, dŭh kah? Siragi Aku ati Tapa adi udip, Aku dŭh re bada angān siken so Aku tadŭ tadŭ kayuh. Aku, adi TUHAN Raja, mbŭh minyu.

⁴“Mbŭh sidia kah kuu miratak ukum di tunduh ngara, manusia? Kambŭi mbŭh sidia, bada ngara ingat kayuh adi sipŭ tayung-babuk ngara mbŭh ndai.

⁵ Kidaan di ngara kayuh adi Aku nang. Kan Aku mien Israel, Aku bijanji ngga ngara. Aku pinandŭng adŭp Ku di ngara di Egypt ka kidaan di ngara: Aku ati TUHAN adi Tapa ngan.

⁶Di tipuh anŭ Aku bijanji an taban ngara ngga ruah so Egypt ka nguru ngara ka tarun tana adi Aku mbŭh mien yŭn ngara, tarun tana adi kaya ka damŭn ka adi siabo kana.

⁷Aku kidaan di ngara bada taran tibudo tibudo adi sipŭ anŭ adi ngara rindu ka dŭh kinais adŭp ngara ngga tapa tapa-kadong daya Egypt, sabab Aku ati TUHAN adi Tapa ngara.

⁸Pak ngara rawan Aku ka abah dingah pinganang. Ngara dŭh taran tibudo tibudo ngara adi sipŭ anŭ bait ko nyambah tapa tapa daya Egypt. Aku mbŭh sidia an bada ngara kinyam bisā baji Ku diginŭ di Egypt.

⁹Pak Aku dŭh jadi ndai simŭnŭ, amai anŭ bisa taban arap di Adŭn Ku, nambah gŭh dinge di sirung jawin daya adi bigaur udip ngga ngara Aku mbŭh kidaan di Israel nang Aku an nguru ngara ruah so Egypt.

¹⁰“Jadi Aku nguru ngara ruah so Egypt di ka tarun tana-pajam.

¹¹ Aku nggen di ngara pesan ka ngajar ngara ukum-adat Ku, adi nggen udip di ngara adi tunda-i.

¹² Aku bada pinyita andu Sabbath jadi tandā pekat-janji Ku ngga ngara, ngga bada ngara ingat Aku, adi TUHAN adi bada ngara kudus.

¹³Pak di tarun tana-pajam anŭ ngara rawan Aku. Ngara miranggar ukum-adat Ku ka tirawan pesan Ku, adi nggen udip di tadŭ daya adi tunda-i. Ngara bandar bandar nyembar andu Sabbath. Aku mbŭh sidia an bada ngara kinyam bisā baji Ku diginŭ di tarun tana-pajam ka pirabur ngara.

¹⁴Pak Aku dŭh jadi ndai simŭnŭ, amai anŭ bisa taban arap di Adŭn Ku, di dupan bangsa bangsa adi mbŭh kiris Aku nguru Israel ruah so Egypt.

¹⁵ Jadi Aku ndai janji di tarun tana-pajam nang Aku dŭh re taban ngara ka tarun tana adi Aku mbŭh nggen di ngara, tana adi kaya ka damŭn, tana adi siabo kana.

¹⁶Aku ndai janji anŭ sabab ngara tirawan pesan Ku, miranggar ukum-adat Ku, ka nyembar andu Sabbath. Ngara raan dŭ nyambah tibudo ngara.

¹⁷“Pak komŭnŭ Aku masi di ngara. Aku natu adŭp Ku dŭh siŭ ngara diginŭ di tarun tana-pajam;

¹⁸Aku bakan sinadan ngara adi mara: dŭhnyah sita ukum-adat adi tayung-babuk ngan ndai; dŭhnyah tunda adat ngara bait nyembar adŭp ngan ngga tibudo ngara.

¹⁹Aku ati TUHAN adi Tapa ngan. Sita ukum-adat Ku samŭn pesan Ku.

²⁰Sita andu Sabbath nimun andu adi kudus, isa-i jadi tandā yŭn simanya adi ata mbŭh ndai, ka re jadi kayuh ngga bada angān ingat Aku ati TUHAN adi Tapa ngan.

²¹“Pak turap anŭ gŭh rawan Aku. Ngara miranggar ukum-adat ka dŭh sita pesan Ku, adi nggen udip di tadŭ daya adi tunda-i. Ngara nyembar andu Sabbath. Aku mbŭh sidia an bada ngara kinyam bisā baji Ku diginŭ di tarun tana-pajam ka siŭ sopŭrŭg ngara.

²²Pak Aku dŭh jadi ndai simŭnŭ, amai anŭ bisa taban arap di adŭn Ku di dupan bangsa bangsa adi mbŭh kiris Aku taban Israel ruah so Egypt.

²³ Jadi Aku ndai janji adi bŭkŭn, di tarun tana-pajam. Aku bipayu Aku re bada ngara papar sasah di ndi ong ong.

²⁴Aku ndai simŭnŭ sabab ngara tirawan pesan Ku, miranggar ukum-adat Ku, nyembar andu Sabbath, ka nyambah tibudo anŭ adi yŭn tayung-babuk ngara bituan.

²⁵“Komŭnŭ Aku nggen di ngara ukum-adat adi dŭh kana ka pesan adi dŭh nggen udip.

²⁶Aku tandah ngara nyembar adŭp ngara ngga sadis ngara, ka Aku tandah ngara nyadis anak pinuai adŭp ngara. Anŭ inŭh ngga ngukum ngara ka kiren di ngara nang Aku ati TUHAN.

²⁷“Madin, manusia, kidaan di bara daya Israel kayuh adi Aku, TUHAN Raja, nang di ngara. Ati gŭh gaya adi bŭkŭn tayung-babuk ngara pimangŭh Aku ngga atin ngara adi dŭh tŭtŭd.

²⁸Aku taban ngara ka tarun tana adi Aku mbŭh bijanji an nggen di ngara. Kan ngara kiris sandah adi bigatung ka tŭngŭn kayuh adi barŭm, ngara jugan sadis di sopŭrŭg tarun yŭn anŭ. Ngara kinuas Aku ngga sadis adi ngara badang ka ngga wain adi ngara taban ndu pinganggen.

²⁹Aku siken ngara: ani tarun tarun anŭ adi bigatung adi angān ka? Jadi so nganŭ tarun tarun anŭ dog kadŭn ‘Yŭn Bigatung’.[38]

³⁰Ngapŭi kidaan di bara daya Israel kayuh adi Aku, TUHAN Raja, nang: mani angān sah ndai dosa adi tayung-babuk ngan ndai ka di tadak tibudo tibudo ngara?

³¹Ndŭg andu ati, angān jugan pinganggen anŭ, ka nyembar adŭp ngan ngga tibudo anŭ darŭm angān badang anak anak ngan ndu sadis ka tibudo. Komŭnŭ angān adi daya Israel babŭ mandŭg an siken pinyiraan Ku! Siragi Aku ati, adi TUHAN Raja, Tapa adi udip, Aku dŭh re nyibandar angān siken kayuh so Aku.

³²Angān mbŭh natu adŭp ngan an jadi mun bangsa bangsa bŭkŭn, mun daya di rais rais bŭkŭn ka adi nyambah tŭngŭn kayuh ngga batuh. Pak-i dŭh re jadi simŭnŭ.

³³“Siragi Aku ati, TUHAN Raja, Tapa adi udip, Aku bakan angān nang darŭm baji Ku Aku re mritah angān ngga karas, ka ngga siabo kuasa Ku.

³⁴Aku re kiren di angān kuasa ngga baji Ku kan Aku nguruk angān ka taban angān pari so sopŭrŭg rais di yŭn ngan mbŭh papar sasah.

³⁵Aku re taban angān ka ‘Tarun tana-pajam Bangsa Bangsa’, ka diginŭ Aku re nunggu angān di jawin ngan.

³⁶Aku re nunggu angān mun Aku nunggu tayung-babuk ngan di Tarun tana-pajam Sinai,” nang TUHAN Raja.

³⁷“Aku re karas ngga angān ka bada angān tunda simanya Ku.

³⁸Aku re kadi so ruang ngan sinadan daya adi an birawan ka adi bidosa. Aku re kadi ngara so tarun tana adi yŭn ngara rŭŭ madin, pak Aku dŭh re bada ngara pari ka tarun tana Israel. Ka angān re puan nang Aku ati TUHAN.”

³⁹TUHAN Raja nang, “Ka madin, sopŭrŭg ngan daya Israel, ndai adŭ nanyam pinyiraan adŭp ngan! Nyambah tibudo ngan! Pak Aku bakan angān nang ripas anŭ angān re dŭh siŭn dŭh nundok di Aku ka dŭh tia nyembar adŭn kudus Ku ngga kraja ngan adi dŭh stabi di Aku, anŭ inŭh jugan pinganggen ngan ka tibudo ngan.

⁴⁰Diginŭ di tarun tana Israel, di sandah kudus Ku,[39] sandah bigatung Israel, sopŭrŭg ngan daya Israel re nyambah Aku. Aku re munos asŭng di angān ka re kajŭn angān taban ka Aku sadis ngan, sadis ngan adi siabo kana, ngga pinganggen kudus ngan.

⁴¹Ripas Aku taban angān ngga ruah so rais rais di yŭn ngan papar sasah ka nguruk angān, Aku re trima sadis adi angān badang, ka bangsa bangsa re kiris Aku ati kudus.

⁴²Kan Aku taban angān pari ka Israel, tarun tana adi Aku bijanji an nggen di tayung-babuk ngan, ka angān re puan nang Aku ati TUHAN.

⁴³Angān re ingat sopŭrŭg pingandai ngan adi sipŭ anŭ adi nyembar adŭp ngan. Angān re sidot di adŭp ngan sabab sopŭrŭg arap adi angān mbŭh ndai.

⁴⁴Kan Aku makat re grindung adŭn kana Ku, angān daya Israel re puan nang Aku ati TUHAN, sabab Aku dŭh re ndai di tunduh ngan nanyam patut angān trima yŭn pingandai arap ngan.” TUHAN Raja mbŭh minyu.

⁴⁵TUHAN minyu ngga aku.

⁴⁶“Manusia,” Ayŭh nang, “tingga ka siratan. Matah siratan ka minyu-binabi rawan tuān siratan.

⁴⁷Kidaan di tuān siratan bada dingah kayuh adi TUHAN Raja nang: Tingga! Aku re pisakŭt apui, ka-i re nyau barang tŭngŭn kayuh darŭm kuu, adi barŭm ngga adi pisŭk. Mating kayuh re dapŭd mura-i. Apui anŭ re mukap so siratan ndŭg utara, ka barang naan re kinyam paras-i.

⁴⁸Sopŭrŭg daya re puan nang Aku ati, adi TUHAN, adi pisakŭt-i ka mating daya re dapŭd mura-i.”

⁴⁹Pak aku matah, “TUHAN Raja, dŭhnyah bada aku ndai simŭnŭ! Barang naan daya mbŭh mingungut nang aku marar minyu pakai pinganang adi mbar daya mirati.”