Read Biatah Bidayuh EZEKIEL 21 Bible Online

EZEKIEL 21 - Biatah Bidayuh bible

EZEKIEL 21

¹TUHAN minyu ngga aku.

²“Manusia,” Ayŭh nang, “nyarah Jerusalem. Nyarah tarun tarun yŭn daya bisambah. Bakan tarun tana Israel

³nang Aku, adi TUHAN, nang: Aku ati pinganyu ngan. Aku re tarik pedang Ku ka siŭ sopŭrŭg ngan, adi kana ngga adi arap.

⁴Aku re pakai pedang Ku rawan barang naan daya so siratan ngga so utara.

⁵Barang naan daya re puan nang Aku, adi TUHAN, mbŭh tarik pedang Ku ka Aku dŭh re kasŭk-i ka darŭm sibong-i.

⁶“Manusia, nyidaing meh mun daya adi mbŭh keya ka pŭmŭs atin-i bada pinyusah. Nyidaing di yŭn daya bagŭ dapŭd kiris kuu.

⁷Kan ngara siken mani kuu nyidaing, kidaan di ngara kuu nyidaing sabab agah adi re mandŭg. Agah anŭ re bada ngara raru taru, tangan ngara re ramah ka pinyibirani ngara re manyap, ka karŭb ngara re kimŭtŭr. Tika-i mbŭh mandŭg, ka sopŭrŭg-i mbŭh tambus.” TUHAN Raja mbŭh minyu.

⁸TUHAN nang di aku,

⁹“Manusia, minyu-binabi. Kidaan di bara daya kayuh adi Aku, adi TUHAN, nang: Agi ndi pedang, pedang adi muko dog ngasa ka dog ngusu.

¹⁰Pedang anŭ mbŭh dog ngasa ngga siŭ daya, dog ngusu bada mikirab mun kijat. Diginŭ re mating tia pawŭn, amai daya Ku dŭh mbit piduri di barang pinyibakan ngga ukum.[40]

¹¹Pedang anŭ mbŭh dog ngusu, yŭn re dog pakai. Pedang anŭ reja ka dog ngusu, yŭn re dog nggen di pinyiŭ.

¹²Nyikaong meh darŭm susah, manusia; pedang anŭ inŭh ngga rawan daya Ku ka ngga rawan bara pinguru Israel. Ngara re dog siŭ samŭn sopŭrŭg daya Ku adi bŭkŭn. Nupap sudo mu darŭm susah!

¹³Aku aŭn suba daya Ku, ka kambŭi ngara abah marik pimudip ngara pari ka Aku, sopŭrŭg kayuh ati re nyatŭk ngara.[41]

¹⁴“Madin, manusia, minyu-binabi. Nupap tangan, ka pedang anŭ re pari pari japa. Anŭ pedang adi siŭ, pedang adi pitaru[42] ka adi japa daya.

¹⁵Pedang anŭ bada pinyipagan daya Ku manyap ka bada ngara tiparak rabu. Aku natang kupo ngara ngga pedang[43] adi mikirab mun kijat ka sidia re siŭ.

¹⁶Japa ka tauh, japa ka bait, kuu pedang adi reja! Japa ka barang yŭn kuu bigiring.[44]

¹⁷Aku gŭh re nupap tangan Ku, ka baji Ku re ko. Aku, adi TUHAN, mbŭh minyu.”

¹⁸TUHAN minyu ngga aku.

¹⁹“Manusia,” Ayŭh nang, “nandā duwŭh aran adi re raja Babylonia dapŭd kadŭg kan ayŭh mandŭg taban pedang-i. Soduwŭh aran anŭ an adi piguru so ndi rais. Pijog tiang ka na papan papan-piniju dieh di aran adi bisakap.[45]

²⁰Ndi papan-piniju re tiju yŭn raja aran di ka kupo daya Ammon di Rabbah, ka papan-piniju anŭ ndi re tiju aran di ka Jerusalem, kupo adi bikuta di Judah.

²¹Raja Babylonia mijog sindŭk tiang papan-piniju di sakap aran. An puan aki ndi re-i kadŭg, ayŭh kusok reja reja-panah;[46] ayŭh bisiken ngga tibudo-i; ayŭh piruh atin tipareng dāng adi muko dog nyadis.

²²Tangan tauh-i digŭng reja-panah adi bitandā ‘Jerusalem’! Anŭ kidaan di ayŭh bada sidia betang betang kayuh ndu pinumbuk, ka ngāb, ka na betang betang pinumbuk di sapa tiban tiban-bās kuta, ka nugung tana, ka ndai parit.

²³Daya Jerusalem dŭh re sabah kayuh re jadi simŭnŭ sabab pekat-damai adi ngara muko ndai. Pak pininjau ati inŭh ngga bada ngara rada dosa ngara ka ngga bakan ngara nang ngara re dog nakap.

²⁴Ngapŭi ati meh kayuh adi Aku, TUHAN Raja, nang: dosa ngan mbŭh tatŭng. Sopŭrŭg daya puan nang munki masam sarah angān. Angān kiren dosa ngan darŭm barang masam pingandai ngan. Angān mbŭh dog nunggu, ka Aku re nggen angān di pinganyu ngan.

²⁵“Angān ginaka, pimritah Israel adi dŭh kudus, andu ngan, andu adi ngga angān dog ukum mbŭh sindŭk.

²⁶Aku, adi TUHAN Raja, mbŭh minyu. Kadi makota ngan samŭn bubok ngan. Mating kayuh re mun adi mbŭh tia. Pakat daya adi sirata bada bikuasa! Pirabu ngara adi mritah!

²⁷Pirabur, pirabur! Sawŭ, Aku re bada kupo anŭ rabur. Pak ati dŭh re jadi sibayuh sianŭ adi Aku mbŭh mien bada ngukum kupo ati mbŭh mandŭg. Di tika anŭ Aku re nggen-i di ayŭh.

²⁸ “Manusia, minyu-binabi. Piagah kayuh adi Aku, TUHAN Raja, nang di daya Ammon, adi ngamun daya Israel. Nang di ngara: ‘Pedang mbŭh agi sidia re ngga pirabur; mbŭh dog ngusu re ngga siŭ ka mikirab mun kijat.

²⁹Kayuh adi angān kiris keya ka darŭm pŭmŭh inŭh kayuh adi dŭh sawŭ. Angān ginaka buang arap, ka andu ngan mbŭh sindŭk, andu sikasŭn ukum ngan. Pedang anŭ re japa tungo ngan.

³⁰“ ‘Pari kasŭk pedang anŭ di sibong-i! Aku re ngukum angān di tarun yŭn ngan dog napa, ka di tarun tana adi yŭn ngan dog biranak.

³¹Angān re kinyam baji Ku kan Aku piruah-i di angān mun apui adi bijireb. Ka Aku re nggen angān di daya adi gaok, daya adi sukup pandai pirabur.

³²Angān re dog pirabur ngga apui. Deya ngan re babas di rais adŭp ngan, ka mating daya re ingat angān tia.’ ” TUHAN mbŭh minyu.