Read Biatah Bidayuh EZEKIEL 22 Bible Online

EZEKIEL 22 - Biatah Bidayuh bible

EZEKIEL 22

¹TUHAN minyu ngga aku.

²“Manusia,” Ayŭh nang, “mbŭh sidia kah kuu re ngukum kupo anŭ adi puno ngga bara pinyiŭ? Kidaan di kupo anŭ sopŭrŭg kayuh sipŭ adi-i mbŭh ndai.

³Kidaan di kupo anŭ kayuh adi Aku, TUHAN Raja, nang: sabab kuu mbŭh siŭ raru bagŭ daya adŭp mu ka mbŭh nyembar adŭp mu ngga tibudo adi kuu nyambah, tipuh mu mbŭh sindŭk.

⁴Kuu mbŭh sarah amai mbŭh siŭ daya ka mbŭh sembar bada tibudo tibudo anŭ, ngapŭi meh tipuh yŭn mu dog ukum mbŭh sindŭk. Anŭ sabab Aku tandah bangsa bangsa ngga sopŭrŭg rais tawŭh ka ngamun kuu.

⁵Rais rais adi sindŭk ngga rais rais adi jo ngamun kuu sabab pimudip mu adi miranggar ukum-adat.

⁶Sopŭrŭg pinguru daya Israel sabah di pinyibake adŭp ngara ka siŭ daya.

⁷ Angān daya adi darŭm kupo dŭh stabi di pimas ngan. Angān nipu daya tami ka nyibudo dayung uban ngga anak tumang.

⁸ Angān dŭh stabi di tarun tarun kudus, ka angān dŭh sita andu Sabbath.

⁹Agi kada so daya mu mbŭh nggen taksi kadong pasar daya bŭkŭn isa ngara dog nggen ukum kabŭs. Agi adi man sadis adi muko dog jugan ka tibudo. Agi adi ari nurut pinyiraan pŭrŭng ngara.

¹⁰ Agi kada so ngara bŭŭs ngga sawŭn sama ngara. Agi adi takan dayung adi kais nandā buran-i nyibŭŭs ngga ngara.

¹¹Agi adi tanggah, agi adi nyibudo iban dayung ngara bait sude dayung tiri ngara.

¹² Agi kada so daya mu siŭ daya sabab an dog ngupah. Agi adi sun anak duit so duit adi ngara nginjam di daya adi samah daya Israel ka jadi kaya darŭm ngara ndai simŭnŭ. Ngara mbŭh kambŭt Aku.” TUHAN Raja mbŭh minyu.

¹³“Aku re na tangan Ku di bara pirupak ngga bara pinyiŭ mu.

¹⁴Kuu pikir kuu re babŭ pagan ka re sukup bake pakat tangan mu kan Aku muko ngukum kuu? Aku, adi TUHAN, mbŭh minyu, ka Aku re sawŭ ndai simŭnŭ.

¹⁵Aku re bada daya mu papar sasah di barang rais ngga bangsa ka re pirŭŭ pingandai arap mu.

¹⁶Bangsa bangsa adi bŭkŭn re ngamun kuu, ka kuu re puan nang Aku ati TUHAN.”

¹⁷TUHAN nang di aku,

¹⁸“Manusia, bara daya Israel dŭh biguna yŭn Ku. Ngara keya ka sapok basi -- timaga, timah buda, basi, ka timah singŭt -- adi dog kadi ripas pirak ko dog pibisig ngga apui.

¹⁹Jadi madin Aku, adi TUHAN Raja, kidaan di ngara nang ngara mbŭh dŭh biguna mun anŭ. Aku re taban ka nguruk sopŭrŭg ngara di Jerusalem

²⁰mun batuh pirak, timaga, basi, timah singŭt, ngga timah buda dog na darŭm buwang apui. Baji Ku ngga magā Ku re dog ngara nimun apui piriris batuh.

²¹Sawŭ, Aku re nguruk ngara di Jerusalem, tung apui di ribo ngara, ka piriris ngara ngga baji Ku.

²²Ngara re dog piriris di Jerusalem mun pirak dog piriris di buwang apui, ka ngara meh re puan nang adŭp ngara mbŭh kinyam sarang baji TUHAN.”

²³TUHAN minyu ngga aku dinge.

²⁴“Manusia,” Ayŭh nang, “kidaan di bara daya Israel nang tarun tana ngara dŭh kudus, ka Aku meh mbŭh baji ka ngukum ngara.

²⁵Bara pinguru[47] mbŭh keya ka dudu singah nyidaong ripas-i mbŭh siŭ dangah-i. Ngara siŭ daya, tambit sopŭrŭg duit ngga buat-rata adi ngara dapŭd, ka bada bagŭ dayung jadi dayung uban.

²⁶ Bara imam miranggar ukum-adat ka dŭh stabi di kayuh adi kudus. Ngara dŭh puan ani adi kudus ngga ani adi dŭh kudus. Ngara dŭh ngajar ani bŭkŭn-i kayuh adi bisig ngga kayuh adi dŭh bisig, ka ngara dŭh mbit piduri di andu Sabbath. Anŭ meh sabab daya Israel dŭh stabi di Aku.

²⁷Bara pinurung pritah mbŭh keya ka kasong tarun nyirigat dāng dāng adi ngara mbŭh siŭ. Ngara siŭ daya ngga pikaya adŭp-i.

²⁸Bara nabi sukan dosa dosa anŭ keya ka daya sukan kais sindung ngga chat buda. Ngara kiris kayuh keya ka darŭm pŭmŭh pak adi dŭh sawŭ ka nggen pininjau adi dŭh sawŭ. Ngara nang adŭp-i minyu pinganang so TUHAN Raja, pak Aku, adi TUHAN, mating minyu ngga ngara.

²⁹Ngara adi kaya nipu ka mirupak. Ngara kinanyuh daya sirata ka nyibudo daya tami.

³⁰Aku jiroh daya adi pandai pijog sindung, adi dapŭd mijog di yŭn sindung adi mbŭh rubuh ka ngibān tarun tana rais kan baji Ku mbŭh re pirabur-i, pak mating dapŭd Ku.

³¹Jadi Aku re ren baji Ku di ngara, ka mun apui Aku re pirabur ngara amai kayuh adi ngara mbŭh ndai.” TUHAN Raja mbŭh minyu.