Read Biatah Bidayuh EZEKIEL 23 Bible Online

EZEKIEL 23 - Biatah Bidayuh bible

EZEKIEL 23

²“Manusia,” Ayŭh nang, “agi duwŭh madis dayung.

³Di tika ngara gibabŭ mara, rŭŭ di Egypt, ngara pirusak pinyitibŭn ngara ka jadi dayung sundar.

⁴Adi tuuh inŭh Oholah[48] (ayŭh ngarun Samaria), ka adi mara inŭh Oholibah[49] (ayŭh ngarun Jerusalem). Aku sawŭn soduwŭh ngara, ka dapŭd anak anak so soduwŭh ngara.

⁵Sunggu Oholah tung jaku, ayŭh babŭ nyundar ka mbŭh gira bara ambai-i so Assyria.

⁶Ngara anŭ bara soldadu adi nēn piraka soldadu adi bēng, daya bās ka bara pingubak adi bās pangkat; sopŭrŭg ngara bara soldadu pinunggang kuda buang ramus.

⁷Ayŭh inŭh dayung sundar yŭn sopŭrŭg pingubak rais Assyria, ka pinyiraan pŭrŭng-i bada ayŭh nyembar adŭp-i ngga tibudo tidubo Assyria adi-i nyambah.

⁸Ayŭh babŭ nyundar mun adŭp-i di Egypt, di yŭn-i kinanyap pinyitibŭn-i. So jaman-i gibabŭ mara, dari bŭŭs ngga ayŭh ka ndai ayŭh mun dayung sundar.

⁹Jadi Aku nyerah adŭ ayŭh ka bara ambai-i daya Assyria adi ayŭh ruai raan.

¹⁰Ngara pirukos piraka-i bada ayŭh sitabet, nakap bara anak dari ngga anak dayung-i, ka komŭnŭ siŭ ayŭh ngga pedang. Bara dayung di barang yŭn ngitong kirakar pasar ayŭh.

¹¹“Sunggu sude-i Oholibah kiris kayuh anŭ, ayŭh nyundar rabis arap so Oholah.

¹²Pinyiraan pŭrŭng-i gŭh di bara daya bās ngga bara pingubak -- soldadu adi nēn piraka adi jawa -- ka di bara soldadu pinunggang kuda adi mara buang ramus.

¹³Aku kiris urah-i mbŭh raru arap, arap mun kaka-i.

¹⁴“Ayŭh anŭ makin tui makin arap. Ayŭh ripong bada gambar pinurung pinurung Babylonia adi bās pangkat adi dog mŭŭt di sindung ka dog chat bireh, ngga bŭŭng kupong di kupong ngara ka bubok adi ramus di ubak ngara.

¹⁵

¹⁶Kan ayŭh kiris ngara, ayŭh mbŭh raru ripong ka pait pinyisung ka ngara di Babylonia.

¹⁷Daya Babylonia mandŭg di nyibŭŭs ngga ayŭh. Ngara pakai ayŭh ka nyembar ayŭh ndŭg ka ayŭh jadi sidot di ngara.

¹⁸Ayŭh kiren pŭrŭng-i di daya bagŭ ka bada barang naan daya puan adŭp-i dayung sundar. Aku mbŭh raru sidot di ayŭh mun Aku sidot di kaka-i.

¹⁹Ayŭh mbŭh bandar bandar nyundar, mun urah-i gi-mara dawŭ-i di Egypt.

²⁰Ayŭh ripong di dari adi mingaras mun kaldi ngga dari kuda adi mingaras.”

²¹(Oholibah, kuu raan pari ndai pingandai kais mu adi dawŭ-i darŭm kuu gi-mara di Egypt, di yŭn dari kaduk sudo mu ka kuu kinanyap pinyitibŭn mu.)

²²“Ngapŭi meh, Oholibah, ati inŭh kayuh adi Aku, TUHAN Raja, nang di kuu. Kuu mbŭh reju di bara ambai mu anŭ, pak Aku re bada ngara baji di kuu ka kirurung kuu.

²³Aku re taban sopŭrŭg daya Babylonia ngga daya Chaldea, daya so Pekod, Shoa, ka Koa, ka sopŭrŭg daya Assyria. Aku re nguruk sopŭrŭg ngara adi ramus anŭ adi bās ngga bara pingubak anŭ, sopŭrŭg pinurung ngga bara pingubak soldadu pinunggang kuda adi siabo bās pangkat.

²⁴Ngara re nyerang kuu so utara,[50] taban tibaran bara soldadu adi raru bagŭ ngga krita krita kuda ka krita-sapi adi ngga muat barang. Dog grindung ngga pinangin ka tupi basi, ngara re kirurung kuu. Aku re nyerah kuu ka darŭm tangan ngara, ka ngara re bisara kuu ngga ukum-adat adŭp ngara.

²⁵Sabab Aku baji di kuu, Aku re tandah ngara ndai di tunduh mu nimun baji ngara. Ngara re nyaper undung ngga kajit mu ka siŭ anak anak mu. Sawŭ, ngara re tambit anak anak dari ngga anak anak dayung mu so kuu ka badang ngara udip udip.

²⁶Ngara re nyirigat piraka mu ka sirapas pimakai mas pirak mu.

²⁷Aku re pirŭŭ pinyiripong pŭrŭng mu ka pingandai kais adi kuu mbŭh ndai so jaman kuu di Egypt. Kuu re abah tingga tibudo bait pikir pasar Egypt tia.”

²⁸Ati inŭh kayuh adi TUHAN Raja nang: “Aku re nyerah kuu ka daya adi kuu tiru ka sidot dieh.

²⁹Ka sabab ngara tiru di kuu, ngara re tambit sopŭrŭg kayuh adi kuu dapŭd so turang udas adŭp mu ka tingge kuu sitabet mun dayung sundar. Pinyiraan pŭrŭng mu ngga kraja nyundar mu

³⁰mbŭh bada kayuh ati jadi di kuu. Kuu jadi sundar yŭn bangsa bangsa ka nyembar adŭp mu ngga tibudo ngara.

³¹Kuu tunda suto danding kaka mu, ngapŭi Aku re nggen di kuu saker ukum anŭ adi kaka mu muko nok.”

³²TUHAN Raja nang, “Kuu re nok so saker kaka mu; saker anŭ baga buang tŭrŭp. Barang naan daya re ngamun ka tawŭh kuu; saker anŭ puno.

³³Saker anŭ re bada kuu sangsara ka mabuk, saker pinyitaru ka pinyirusag, saker kaka mu Samaria.

³⁴Kuu re nok ndŭg ka-i badŭh, ka supek pape saker anŭ nading sudo mu. Aku, adi TUHAN Raja, mbŭh minyu.”

³⁵Jadi ati inŭh kayuh adi TUHAN Raja nang: “Sabab kuu kambŭt Aku ka mbŭh nyipunok Aku, kuu re sangsara amai pinyiripong pŭrŭng mu ngga kraja nyundar mu.”

³⁶TUHAN nang di aku, “Manusia, mbŭh sidia kah kuu bisara Oholah ngga Oholibah? Nyarah ngara di pingandai sipŭ anŭ adi ngara mbŭh ndai.

³⁷Ngara mbŭh tanggah ka siŭ daya -- tanggah ngga tibudo tibudo ka siŭ anak anak Ku adi ngara biranak. Ngara nyadis anak anak Ku ka tibudo ngara.

³⁸Pak dŭh-i anŭ adŭ adi ngara mbŭh ndai. Ngara nyembar Ramin Ku ngga andu Sabbath adi Aku mbŭh natu.

³⁹Andu adi ngga ngara siŭ anak anak Ku ndu sadis ka tibudo, ngara mandŭg ka Ramin Ku ka nyembar-i!

⁴⁰“Pari pari ngara pait pinyisung bada bagan dari da mandŭg so tarun adi jo, ka ngara mandŭg. Duwŭh madis dayung anŭ mamuh ka ngudat batŭh ngara ka pakai mas pirak.

⁴¹Ngara guru di pangō adi ramus, ka di jawin ngara ngara biyŭn mija adi puno ngga pinguman adi sidi, samŭn kimanyan ngga inyo kanā adi Aku mbŭh nggen di ngara.

⁴²Bara dari adi dog bagan so tarun tana-pajam tikuruk diginŭ ka dapŭd dog dingah sirŭŭn ngara pawŭn. Ngara kasŭk garang di tangan ngara duwŭh ka na makota adi ramus di ubak ngara.

⁴³Ka Aku nang darŭm asŭng Ku, ngara pakai dayung sundar adi mbŭh rayu ngga tanggah.[51]

⁴⁴Pari pari ngara tudu dayung dayung sundar anŭ, Oholah ngga Oholibah adi arap anŭ.

⁴⁵Daya tŭnggŭn re nunggu ngara amai kraja tanggah ngara ka amai ngara siŭ daya. Ngara tanggah ka tangan ngara mbŭh bitameg bada deya.”

⁴⁶Ati inŭh kayuh adi TUHAN Raja nang: “Taban bara daya bada pitaru ka mirupak ngara.

⁴⁷Tandah bara daya manjan ngara ngga batuh ka nyerang ngara ngga pedang, siŭ anak anak ngara, ka badang ramin ngara.

⁴⁸Di ndi tarun tana Aku re pirŭŭ pingandai kais, ndu pinyibakan di sopŭrŭg dayung bada dŭh tanggah mun ngara duwŭh madis anŭ.

⁴⁹Ka angān duwŭh madis -- Aku re ngukum angān duwŭh amai pingandai kais ngan ka amai dosa ngan adi nyambah tibudo. Ka angān re puan nang Aku ati TUHAN Raja.”