Read Biatah Bidayuh EZEKIEL 24 Bible Online

EZEKIEL 24 - Biatah Bidayuh bible

EZEKIEL 24

¹Di andu adi simŭng darŭm buran simŭng darŭm sawa adi prii kieh dog taran, TUHAN minyu ngga aku.

² “Manusia,” Ayŭh nang, “nuris andu buran ati, sabab ati inŭh andu adi ngga raja Babylonia piguru nyikapung Jerusalem.

³Kidaan di daya Ku, adi suka birawan, upama ati adi Aku, TUHAN Raja, biyŭn yŭn ngara: Na priok di tunduh apui ka ngisi-i bada puno ngga piin.

⁴Na dagin adi siabo kana di darŭm-i -- dagin kawin ngga dagin pŭŭh -- samŭn turang adi siabo kana.

⁵Pakai dagin biri adi siabo kana; nugung uwang[52] di ribo priok anŭ. Tandah piin nyigurak; tanŭk ngga piin turang ngga dagin anŭ.”

⁶Ati inŭh kayuh adi TUHAN Raja nang: “Mbŭh payah inŭh kupo bara pinyiŭ anŭ! Kupo anŭ mbŭh keya ka priok adi bitagar bŭn dog pibisig. Tatad tatad dagin nyanyis dog tambit so darŭm-i, ka ndi mating gŭh dŭm.

⁷Darŭm kupo anŭ agi daya dog siŭ, pak deya-i dŭh babas di tana di yŭn-i bisa dog sukan dapu; deya anŭ babas di tunduh batuh.

⁸Aku tandah deya anŭ diginŭ, di yŭn-i dŭh dapŭd dog sukan, di yŭn-i darŭm baji mite baras.”

⁹Ati inŭh kayuh adi TUHAN Raja nang: “Mbŭh payah inŭh kupo adi puno ngga pinyiŭ! Adŭp Ku re nugung uwang.

¹⁰Taban tambah uwang! Ngambui apui bada bijagu! Tanŭk dagin anŭ ndŭg ka ju-i badŭh![53] Badang turang-i!

¹¹Komŭnŭ na priok timaga adi engan di tunduh bam apui ndŭg ka-i bireh paras. Simŭnŭ priok anŭ re pari bisig nanyam ka adat, ripas tagar-i dog badang,

¹²sunggu dŭh sopŭrŭg tagar anŭ re bu dog badang apui.[54]

¹³Jerusalem, pingandai kais mu mbŭh nyembar kuu. Sunggu Aku mbŭh suba an pibisig kuu, kuu babŭ sembar. Kuu re dŭh bisig dinge ndŭg ka kuu mbŭh kinyam bisā baji Ku.

¹⁴Aku, adi TUHAN Raja, mbŭh minyu. Tika-i mbŭh mandŭg adi ngga Ku ngukum. Aku dŭh re tandah dosa mu bait kiren masi di kuu. Kuu re dog ukum amai kayuh adi kuu mbŭh ndai.” TUHAN Raja mbŭh minyu.

¹⁵TUHAN minyu ngga aku.

¹⁶“Manusia,” Ayŭh nang, “ngga ndi pukong Aku re tambit sianŭ adi kuu ruai rindu. Kuu dŭh siŭn mingungut bait sien puan kah ngurid.

¹⁷Dŭhnyah bada sakuk mu dog dingah daya. Dŭhnyah panu dŭh bibubok bait dŭh bikasut mun daya ngurid. Dŭhnyah nutu jawin mu bait man pinguman daya ngurid.”

¹⁸Awar isan isan aku minyu ngga daya. Singumi andu anŭ sawŭn ku kabŭs, ka andu jawa ndi aku bada adŭp ku mun anŭ adi aku mbŭh dog bada.

¹⁹Daya siken aku, “Mani kaam mun anŭ?”

²⁰Jadi aku nang di ngara, “TUHAN mbŭh minyu ngga aku ka bada aku

²¹taban agah ati ka angān adi daya Israel: angān mingangŭn di pinyitagap Ramin TUHAN. Angān gagā tingga-i ka muah tudu-i, pak TUHAN re nyembar-i. Ka ngara adi mara darŭm rawang ngan adi dog tingge di Jerusalem re dog siŭ darŭm perang.

²²Komŭnŭ angān ndai anŭ adi aku mbŭh ndai. Angān dŭh re nutu jawin ngan bait man pinguman daya ngurid.

²³Angān re dŭh panu dŭh bibubok bait dŭh bikasut bait ngurid puan kah sien. Dosa ngan re kirŭpŭt angān, ka angān re nyidaing di dingan ngan.

²⁴Komŭnŭ aku re jadi tandā yŭn ngan; angān re ndai sopŭrŭg anŭ adi aku mbŭh ndai. TUHAN nang kan kayuh anŭ jadi, angān re puan Ayŭh anŭ TUHAN Raja.”

²⁵TUHAN nang, “Madin, manusia, Aku re tambit Ramin Ku adi tagap anŭ so ngara adi yŭn ngara mingangŭn ka gaŭn, adi ngara gagā tingga ka muah tudu. Ka Aku re tambit anak anak ngara ani.

²⁶Di andu Aku ndai simŭnŭ, agi daya adi siramat so pinyirusag anŭ re mandŭg ka kidaan di kuu pasar kayuh anŭ.

²⁷Di andu anŭ gŭh kuu re pari bisa minyu, ka kuu re minyu ngga ayŭh. Ngga simŭnŭ kuu re jadi tandā yŭn bara daya, ka ngara re puan nang Aku ati TUHAN.”