Read Biatah Bidayuh EZEKIEL 25 Bible Online

EZEKIEL 25 - Biatah Bidayuh bible

EZEKIEL 25

¹ TUHAN minyu ngga aku.

²“Manusia,” Ayŭh nang, “Nyarah rais Ammon.

³Bada ngara dingah kayuh adi Aku, adi TUHAN Raja, nang: angān gaŭn kiris Ramin Ku dog nyembar, kiris tarun tana Israel dog pirabur, kiris daya Judah dog taran so rais adŭp ngara.

⁴Sabab angān gaŭn, Aku re tandah tibaran tibaran-asar so tarun tana-pajam timor ngarah angān. Ngara re pijog bari bari ngara di rais ngan ka rŭŭ diginŭ. Ngara re man buwa ka nok sisuh adi patut angān dapu.

⁵Aku re bada kupo Rabbah jadi tarun yŭn kudip onta, ka ndi tarun tarun tana rais Ammon jadi tarun yŭn kudip biri, isa angān puan nang Aku ati TUHAN.

⁶“Ati inŭh kayuh adi TUHAN Raja nang: angān nupap tangan ka mirupat darŭm gaŭn. Angān ngamun tarun tana Israel.

⁷Sabab angān ndai simŭnŭ, Aku re nyerah angān ka bangsa bangsa bŭkŭn adi re mirupak angān ka pirinda angān. Aku re pirarap angān isa angān dŭh tia jadi ndi bangsa adi dapu rais adŭp-i. Komŭnŭ angān re puan nang Aku ati TUHAN.”

⁸ TUHAN Raja nang, “Sabab Moab[55] mbŭh nang Judah mbŭh keya ka bangsa bangsa bŭkŭn,

⁹Aku re tandah kupo kupo adi ngibān baat Moab dog nyerang, samŭn kupo kupo adi dangŭn, mun: Beth Jeshimoth, Baal Meon, ka Kiriathaim.

¹⁰Aku re tandah tibaran tibaran-asar so tarun tana-pajam timor ngarah Moab, samŭn Ammon, isa Moab[56] dŭh tia jadi ndi bangsa.

¹¹Aku re ngukum Moab, ka ngara re puan nang Aku ati TUHAN.”

¹² TUHAN Raja nang, “Daya Edom maras dendam di Judah, ka baras dendam anŭ mbŭh bada Edom adu adu sarah.

¹³Madin Aku nggen puan nang Aku re ngukum Edom ka siŭ barang naan daya ngga dudu dāng diginŭ. Aku re pirabur tarun tana anŭ so kupo Teman ndŭg kupo Dedan, ka daya re dog siŭ darŭm biperang.

¹⁴Daya Ku Israel re maras dendam di Edom yŭn Ku, ka ngara re bada Edom kinyam bisā baji Ku. Edom re puan nyam ani bisā-i kan baji Ku nyatŭk ngara.” TUHAN Raja mbŭh minyu.

¹⁵ TUHAN Raja nang, “Daya Philistine mbŭh pari pari maras dendam di pinganyu jah ngara, ka mbŭh pirabur ngara ngga atin tiru ngara.

¹⁶Ngapŭi meh Aku kidaan nang adŭp Ku re nyerang bara daya Philistine ka pirabur ngara. Aku re pirabur barang naan adi babŭ udip diginŭ di tarun tana rabak Philistine.

¹⁷Aku re bandar ngukum ka re batur maras dendam di ngara. Ngara re kinyam baji Ku. Komŭnŭ ngara re puan nang Aku ati TUHAN.”