Read Biatah Bidayuh EZEKIEL 26 Bible Online

EZEKIEL 26 - Biatah Bidayuh bible

EZEKIEL 26

¹ Ngga ndi andu buran[57] darŭm sawa adi simŭng ndi kieh dog taran so rais ami, TUHAN minyu ngga aku.

²“Manusia,” Ayŭh nang, “ati inŭh kayuh adi daya kupo Tyre tarā. Ngara nyirais nang, ‘Jerusalem mbŭh rabur! Kuasa dagang-i mbŭh mating tia! Jerusalem dŭh re tia jadi rawan ta!’

³“Madin, ati inŭh kayuh adi Aku, TUHAN Raja nang: Aku pinganyu mu, kupo Tyre. Aku re taban bagŭ bangsa bŭkŭn bada nyerang kuu, ka ngara re mandŭg mun girumbang di rawŭt.

⁴Ngara re nyirubuh sindung kupo mu ka pitumbang tawā mu. Komŭnŭ Aku re pisen sopŭrŭg dabu ndŭg ka batuh adŭ dŭm.

⁵Pinakap iken re dawan jara ngara di tunduh batuh anŭ di yun rawŭt. Aku, adi TUHAN Raja, mbŭh minyu. Bangsa bangsa re pirinda Tyre,

⁶ka re ngga pedang siŭ ngara adi rŭŭ di kupo kupo di tarun tana deyŭh rais Tyre. Komŭnŭ Tyre re puan nang Aku ati TUHAN.”

⁷TUHAN Raja nang, “Aku re bada raja adi siabo bās, anŭ inŭh Raja Nebuchadnezzar so Babylonia da nyerang Tyre. Ayŭh re mandŭg so utara ngga ndi tibande tibaran bara soldadu, ngga kuda kuda ka krita krita kuda ka ngga bara soldadu pinunggang kuda.

⁸Ngara adi rŭŭ di kupo kupo di tarun tana deyŭh rais anŭ re dog siŭ darŭm bisaad anŭ. Pinganyu re ndai parit, ndai tugung tana, ka ndai sindung adi tabar adi keya ka pinangin ngga rawan kuu.

⁹Ngara re mape sindung sindung mu ngga pinumbuk ka re nyirubuh tawā tawā mu ngga betang basi.

¹⁰Kuda ngara raru bagŭ ndŭg ka dabu mikabur ka nutu kuu. Jawŭn so kuda ngara, tarik krita barang ngga krita kuda re bada sindung mu bigagar darŭm ngara mŭrŭt tiban tiban-bās kupo adi rubuh anŭ.

¹¹Bara soldadu pinunggang kuda anŭ re mandŭg nyarab di aran aran mu, siŭ daya mu ngga pedang. Tiang tiang mu adi bās anŭ re tumbang.

¹²Pinganyu re sirapas pinyikaya mu samŭn kayuh dagang mu. Ngara re nyirubuh sindung sindung mu ka pirabur ramin ramin mu adi grua. Ngara re tambit batuh ngga kayuh ka sopŭrŭg batuh tibawang, ka taran-i ka darŭm rawŭt.

¹³ Aku re pirŭŭ sopŭrŭg ragu mu samŭn ragu kachapi mu.

¹⁴Aku re kidŭm ndi batuh adŭ di yŭn bara pinakap iken dawan jara ngara. Kupo re dŭh pari dog pijog. Aku, adi TUHAN Raja, mbŭh minyu.”

¹⁵TUHAN Raja minyu sakati di kupo Tyre: “Kan kuu dog ngarah, daya adi rŭŭ di arong bŭngŭn rawŭt re taru dingah sirais ngara adi dog siŭ.

¹⁶ Sopŭrŭg raja adi di bŭngŭn rawŭt re mūn so takta ngara. Ngara re kadi jipo-ambu ngara samŭn piraka adi dog ngabuh ngga butik bunga jiit ka guru di tana buang kimŭtŭr. Ngara re tikaran kiris nasip mu anŭ ndŭg ka ngara adu adu kimŭtŭr.

¹⁷Ngara re nang ragu nyikubur yŭn mu: Kupo adi timagah anŭ mbŭh rabur! Kapar kapar-i mbŭh dog pisen[58] so rawŭt. Daya di kupo anŭ mritah rawŭt ka pitaru sopŭrŭg adi rŭŭ di bŭngŭn rawŭt.

¹⁸Madin, di andu-i rabu, purau purau mbŭh bigagar, ka daya-i mbŭh gŭgŭh bada pinyirusag anŭ.”

¹⁹TUHAN Raja nang: “Aku re bada kuu jadi matung nimun tibawang kupo adi mating daya rŭŭ dieh. Aku re ngapuh kuu ngga piin so rasan rawŭt.

²⁰Aku re pait kuu ka ong daya adi mbŭh kabŭs bada sua ngga ngara adi ko udip ndun jah. Aku re bada kuu rŭŭ di ong di sagān anŭ di yŭn pinyirusag ruro, biayo ngga daya adi mbŭh kabŭs. Ngga simŭnŭ meh kuu re dŭh tia dog ngisi ka dŭh tia agi di tarun tana daya udip.

²¹ Aku re bada kuu jadi suto adi pitaru, ka simŭnŭ inŭh pimungan mu. Kadŭ daya re jiroh kuu, pak kuu re dŭh dog dapŭd.” TUHAN Raja mbŭh minyu.