Read Biatah Bidayuh EZEKIEL 27 Bible Online

EZEKIEL 27 - Biatah Bidayuh bible

EZEKIEL 27

¹TUHAN nang di aku,

²“Manusia, nang ragu nyikubur yŭn Tyre,

³kupo anŭ adi di bŭngŭn rawŭt ka adi ndai dagang ngga daya adi rŭŭ di barang tabing rawŭt. Kidaan di kupo anŭ kayuh adi TUHAN Raja nang: Tyre, kuu ngangŭn adŭp mu sukup ramus.

⁴Arŭn mu inŭh rawŭt. Bara tukang mu pijog kuu mun kapar adi ramus.

⁵Betang kayuh adi ngara pakai inŭh tŭngŭn sipres so Darŭd Hermon, ka tiang rayar mu inŭh tŭngŭn sedar so Lebanon.

⁶Pingayuh mu dog ndai so tŭngŭn oak so Bashan. Ngara ndai dek mu so tŭngŭn pain so Cyprus ka ngabuh-i ngga bŭbŭt gajah.

⁷Rayar mu dog ndai so banang linen, banang linen so Egypt adi dog ngabuh ngga butik bunga jiit, adi sanang dog natŭng so jo. Sirambi mu dog ndai ngga banang adi siabo duduh, adi bēng so purau Cyprus.

⁸Tukang-bikayuh mu inŭh daya so kupo Sidon ngga kupo Arvad. Daya daya adŭp mu adi sukup pandai inŭh adi tukang pimanu kapar.

⁹Bara tukang kayuh di kapar inŭh daya adi sukup pandai so Byblos. Bara tukang pimanu kapar rawŭt ndai dagang di kade kade mu.

¹⁰“Soldadu so Persia, Lydia, ngga Libya mŭrŭt tibaran bara soldadu mu. Ngara tangid pinangin ngga tupi basi ngara di birit birit kuta mu. Ngara inŭh bara daya adi dapŭd bragah yŭn mu.

¹¹Bara soldadu so Arvad ngibān sindung mu, ka bara daya so Gamad ngibān tawā mu. Ngara tangid pinangin ngara di sindung mu. Ngara inŭh bara daya adi bada kuu ramus.

¹²“Kuu bidagang di Spain ka trima pirak, basi, timah buda, ka timah singŭt ndu rega dudu kayuh adi kuu jua.

¹³Kuu bidagang di Greece, Tubal, ka Meshech ka nyambi kayuh kayuh dagang mu ngga dapŭd daya urun ka ngga dapŭd kayuh kayuh adi dog ndai so timaga.

¹⁴Kuu jua kayuh kayuh mu ngga dapŭd kuda adi dog pakai di tipuh raga, di tipuh perang, samŭn kuda pinakan kaldi so Beth Togarmah.

¹⁵Daya Rhodes[59] bidagang ngga kuu; daya adi rŭŭ di bŭngŭn rawŭt nggen di kuu bŭbŭt gajah ngga betang betang kayuh adi singŭt ngga nyambi kayuh kayuh dagang mu.

¹⁶Daya Syria miris kayuh mu. Ngara nggen zamrud, banang adi bēng, banang adi biyŭn butik bunga jiit, banang linen adi jarŭh, batuh karang, ka batuh mutiara ngga bayar kuu.

¹⁷Judah ngga Israel bayar kuu ngga gandom,[60] ju banyis, inyo kanā, ka rapah, yŭn kayuh kayuh dagang mu.

¹⁸Daya Damascus miris kayuh mu, ka bayar kuu ngga wain so Hebron ka buruh biri so Sahar.[61] Ngara nggen di kuu basi adi dog maba ka rapah rapah ngga nyambi kayuh kayuh dagang mu.

²⁰Daya Dedan nggen di kuu banang banang tapas-pinyiguru pinunggang kuda ngga bayar kayuh kayuh dagang mu.

²¹Daya Arab ngga bara pimritah tarun tana Kedar nggen di kuu anak biri, dari biri, ka kambing, ngga bayar kayuh kayuh dagang mu.

²²Daya dagang so Sheba ngga Raamah nggen di kuu batuh batuh brega, mas, ka rapah adi siabo kana ngga bayar kayuh kayuh dagang mu.

²³Kupo Haran, kupo Canneh, ngga kupo Eden, daya daya dagang so Sheba, kupo Asshur ngga kupo Chilmad -- sopŭrŭg ngara bidagang ngga kuu.

²⁴Ngara jua piraka grua di kuu, banang adi bēng, ngga banang adi dog ngabuh ngga butik bunga jiit, idas idas adi jawa kala-i, ka taris taris adi nakit dog ndai.

²⁵ Kayuh kayuh dagang mu dog taban ngga kapar adi siabo baga. Kuu mbŭh keya ka kapar di rawŭt puno ngga barang barang adi bat.

²⁶Kan bara tukang-bikayuh mu taban kuu ka rawŭt, sabak timor mape kuu jeh di rawŭt.

²⁷Sopŭrŭg pinyikaya dagang mu, sopŭrŭg daya adi pimanu kapar mu samŭn daya daya bŭkŭn, bara tukang kayuh kapar mu ngga daya daya dagang mu, barang naan soldadu darŭm kapar -- sopŭrŭg ngara mbŭh manyap di rawŭt kan kapar mu pape.

²⁸Sirais bara adi pimanu kapar adi rŭnggŭd tungang dog dingah so tabing rawŭt.

²⁹“Madin sopŭrŭg kapar dog tagan, barang naan adi pimanu kapar mbŭh bu ka deyŭh.

³⁰Ngara bandar bandar muās kuu, taran dabu di ubak ngara ka bigurai di apŭk.

³¹Ngara nundo ubak ngara sabab kuu ka nēn piraka banang guni amai susah. Ngara ngurid ngga atin adi ruai susah.

³²Ngara nang ragu nyikubur yŭn mu: ‘Asi bisa dog danding ngga Tyre, adi madin mbŭh pajam di rawŭt?

³³Kan dagang mu mutas rawŭt, kuu pimunos bangsa bangsa bŭkŭn ngga kayuh adi ngara biguna. Raja raja jadi kaya bada kayuh adi grua so kuu.

³⁴Madin kuu mbŭh pape di rawŭt; kuu mbŭh timŭtŭm ka rasan rawŭt. Kayuh kayuh dagang mu ngga sopŭrŭg ngara adi nyiraja yŭn mu mbŭh miyap ngga kuu di rawŭt.’

³⁵“Barang naan daya adi udip di bŭngŭn rawŭt gŭgŭh dingah nasip mu. Ndŭg ka raja raja mbŭh taru, ka pinyitaru anŭ tatŭng di jawin ngara.

³⁶Kuu mbŭh miyap, re mating adu adu, ka bara daya dagang di ndi ong ong mbŭh raru taru, taru adŭp ngara sua mun kuu.”