Read Biatah Bidayuh EZEKIEL 28 Bible Online

EZEKIEL 28 - Biatah Bidayuh bible

EZEKIEL 28

¹TUHAN minyu ngga aku.

²“Manusia,” Ayŭh nang, “kidaan di pimritah Tyre kayuh adi Aku, TUHAN Raja, nang di ayŭh: kuu miruap buang nang adŭp mu tapa. Kuu nang adŭp mu mun tapa guru di takta di yun rawŭt. Kuu bada adŭp mu mun tapa, pak sibatur-i kuu manusia saja, dŭh tapa.

³Kuu pikir adŭp mu bijak dŭ so Danel,[62] ka mating kayuh dapŭd dog sukan so kuu.

⁴Pinyibijak ngga pimandai mu bada kuu kaya ngga mas ka pirak.

⁵Kuu pandai bidagang ka ari dapŭd utung. Munki masam mingangŭn meh kuu di pinyikaya mu!

⁶“Ngapŭi ati inŭh kayuh adi Aku, adi TUHAN Raja, nang: sabab kuu pikir adŭp mu bijak mun tapa,

⁷Aku re bada pinganyu adi dŭh puan masi nyerang kuu. Ngara re pirabur sopŭrŭg buat-rata adi kuu dapŭd so pimandai ngga pinyibijak mu.

⁸Ngara re siŭ kuu ka kubur kuu di rawŭt.

⁹Kan ngara mandŭg di siŭ kuu, re babŭ kah kuu nang adŭp mu tapa? Kan kuu situra jawin ngga bara pinyiŭ mu, kuu re tatŭng manusia saja.

¹⁰Kuu re kabŭs mun kasong di tangan daya tami adi dŭh puan tapa. Aku, adi TUHAN Raja, mbŭh pesan.”

¹¹TUHAN minyu ngga aku dinge.

¹²“Manusia,” Ayŭh nang, “ngurid meh amai nasip adi re nyatŭk raja Tyre. Kidaan di ayŭh kayuh adi Aku, TUHAN Raja, nang: kuu muko jadi suto danding daya adi sukup kana. Munki masam bijak ka ramus kuu dawŭ-i!

¹³Kuu rŭŭ di Eden, teya Tapa, ka pakai barang masam batuh brega: batuh mutiara ngga itan; batuh topaz, batuh beril, batuh akek bireh, ka batuh jasper, batuh nilam, batuh zamrud, ngga batuh garnet. Kuu biyŭn pimakai mas adi dog ndai yŭn mu[63] di andu kuu dog napa.

¹⁴Aku na ndi malaikat adi pitaru bada jaga kuu.[64] Kuu rŭŭ di darŭd kudus Ku ka panu di karu batuh batuh brega.

¹⁵Urah rakah mu sukup kana so andu mu dog napa ndŭg andu adi ngga mu piguru ndai arap.

¹⁶Kuu raru dŭh paya amai bibiris ngga bijua, ka anŭ bada kuu ganas ka bidosa. Jadi Aku pibu kuu so darŭd kudus Ku, ka malaikat adi jaga kuu kasig kuu so batuh batuh brega adi mikirib anŭ.

¹⁷Kuu mingangŭn di pinyiramus mu, ka kuu mun daya budo darŭm kuu timagah. Sabab anŭ Aku re taran kuu ka tana ka tandah kuu jadi pinyibakan yŭn raja raja adi bŭkŭn.

¹⁸Dagang mu puno ngga pingandai arap ndŭg ka tarun yŭn bisambah mu mbŭh sembar. Ngapŭi Aku sigot kupo mu ndŭg ka rŭpŭg. Madin sopŭrŭg daya kiris kuu mbŭh jadi apŭk.

¹⁹Kuu mbŭh mating, adu adu miyap, ka sopŭrŭg bangsa adi muko puan kuu mbŭh taru adŭp-i sua mun kuu.”

²⁰ TUHAN nang di aku,

²¹“Manusia, nyarah kupo Sidon.

²²Kidaan di daya-i kayuh adi Aku, TUHAN Raja, nang pasar ngara: Aku ati pinganyu mu, Sidon; daya re muji Aku amai kayuh adi Aku ndai di kuu. Daya re puan nang Aku ati TUHAN, kan Aku kiren munki masam kudus Aku darŭm Aku ngukum ngara adi rŭŭ darŭm kuu.

²³Aku re pait sesak-andam ka kuu ka bada deya aman di aran aran mu. Kuu re dog nyerang so barang parad, ka daya mu re dog siŭ. Komŭnŭ kuu re puan nang Aku ati TUHAN.”

²⁴TUHAN nang, “Sopŭrŭg rais adi maning Israel adi ko ngamun Israel re dŭh tia keya ka tŭngŭn reja ka bakah pireja adi kandam Israel. Ka ngara re puan nang Aku ati TUHAN Raja.”

²⁵TUHAN Raja nang, “Aku re taban ngga pari daya Israel so rais rais adi yŭn Ku ko bada ngara papar sasah, ka sopŭrŭg bangsa re puan nang Aku ati kudus. Daya Israel re rŭŭ di tana adŭp ngara, ka di tarun tana adi Aku mbŭh nggen di urun Ku Jacob.

²⁶Ngara re rŭŭ diginŭ ngga siramat. Ngara re pijog ramin ramin ka ndai teya anggor. Aku re ngukum sopŭrŭg rasū ngara adi ko ngamun ngara, ka Israel re udip darŭm pagŭng. Ka ngara meh re puan nang Aku ati TUHAN adi Tapa ngara.”