Read Biatah Bidayuh EZEKIEL 29 Bible Online

EZEKIEL 29 - Biatah Bidayuh bible

EZEKIEL 29

¹ Di andu adi simŭng duwŭh darŭm buran simŭng darŭm sawa adi simŭng kieh dog taran, TUHAN minyu ngga aku.

²“Manusia,” Ayŭh nang, “nyarah raja Egypt. Kidaan di ayŭh munki ayŭh ngga sopŭrŭg rayat-i di ndi tarun tana Egypt re dog ukum.

³Kidaan nang ati inŭh kayuh adi TUHAN Raja nang di raja Egypt: Aku ati pinganyu mu, kuu buai bās adi guring di sungi. Kuu nang Yang Nile tung jamu ka adŭp mu adi napa-i.[65]

⁴Aku re nyikait siraka mu ngga sikait ka bada iken iken di sungi mu rakat di kuu. Komŭnŭ Aku re tarik kuu so Yang Nile, ngga sopŭrŭg iken adi rakat di kuu.

⁵Aku re taran kuu ngga sopŭrŭg iken anŭ ka tarun tana-pajam. Pŭrŭng mu re rabu di tana ka dog tingge dŭh dog kubur. Aku re nggen-i ndu pinguman di manuk ngga dāng dāng.

⁶ Komŭnŭ sopŭrŭg daya di Egypt re puan nang Aku ati TUHAN.” TUHAN nang, “Bara daya Israel bisangan di angān bara daya Egypt yŭn pinurung, pak angān mbŭh keya ka sikud adi ramah.

⁷Kan ngara minyandis di kuu, kuu pata, tabŭk siap ngara, ka bada punok ngara tipŭrŭs.[66]

⁸Sabab anŭ meh, Aku, adi TUHAN Raja, kidaan di kuu nang Aku re bada tibaran soldadu nyerang kuu ngga pedang, ka ngara re siŭ daya mu ngga dāng dāng mu.

⁹Egypt re jadi rais adi matung. Komŭnŭ kuu re puan nang Aku ati TUHAN. “Sabab kuu nang Yang Nile jamu ka adŭp mu adi napa-i,

¹⁰Aku ati inŭh pinganyu mu ka pinganyu Yang Nile mu. Aku re bada ndi tarun tana Egypt matung, so kupo Migdol di utara ndŭg kupo Aswan di siratan, jeh ndŭg baat Ethiopia.

¹¹Mating manusia bait dāng re panu mutas tarun anŭ. Sitŭkŭd pat puru sawa mating kayuh re udip diginŭ.

¹²Aku re bada Egypt jadi rais adi siabo matung di ong. Sitŭkŭd pat puru sawa kupo kupo di Egypt re jadi tibawang, tibawang adi sipŭ so tadŭ tadŭ kupo adi bŭkŭn. Aku re bada daya Egypt jadi daya adi bu mangān rais adŭp-i. Ngara re bu ka barang rais ka udip bigaur ngga bangsa bŭkŭn.”

¹³TUHAN Raja nang, “Ripas pat puru sawa Aku re taban daya Egypt pari so rais rais adi yŭn Ku mbŭh bada ngara papar sasah,

¹⁴ka Aku re bada ngara rŭŭ di siratan Egypt, rais asar ngara. Diginŭ ngara re jadi rayat ndi pritah adi ramah,

¹⁵adi siabo ramah ka dŭh tia dapŭd mritah bangsa bangsa bŭkŭn. Aku re bada ngara raru dŭh biguna ndŭg ka ngara dŭh dapŭd bada tadŭ tadŭ bangsa bŭkŭn nundok di ngara.

¹⁶Israel re dŭh tia bisangan di ngara yŭn pinurung. Nasip Egypt re jadi pingingat yŭn Israel nang-i dŭh batur bisangan di ngara. Komŭnŭ Israel re puan nang Aku ati TUHAN Raja.”

¹⁷Di andu adi ndi darŭm buran ndi darŭm sawa adi duwŭh puru-ju kieh dog taran, TUHAN minyu ngga aku.

¹⁸“Manusia,” Ayŭh nang, “Raja Nebuchadnezzar so Babylonia mbŭh nyerang Tyre. Ayŭh bada bara soldadu-i kabis kayuh kayuh adi raru bat ndŭg ka ubok ngara abo ruruh ka ubak ngara badu, ka kawin ngara tikurab raus, pak adŭp-i ngga tibaran bara soldadu-i dŭh dapŭd ani ani so jera anŭ.

¹⁹Sabab anŭ meh, ati inŭh kayuh adi Aku, TUHAN Raja, nang: Aku nggen tarun tana Egypt di Raja Nebuchadnezzar. Ayŭh re mirupak ka pirinda rais anŭ ka taban ngga bu sopŭrŭg buat-rata Egypt ngga bayar gaji tibaran bara soldadu-i.

²⁰Aku nggen Egypt di ayŭh ngga bayar ayŭh sabab tibaran bara soldadu-i mbŭh ndai kayuh yŭn Ku. Aku, adi TUHAN Raja, mbŭh minyu.

²¹“Kan kayuh mbŭh jadi simŭnŭ, Aku re bada daya Israel bake ka bada kuu, Ezekiel, minyu di yŭn barang naan daya dapŭd dingah kuu, isa ngara puan nang Aku ati TUHAN.”