Read Biatah Bidayuh EZEKIEL 3 Bible Online

EZEKIEL 3 - Biatah Bidayuh bible

EZEKIEL 3

¹ Tapa nang, “Manusia, man surat-barun ati; komŭnŭ panu di minyu di daya Israel.”

²Jadi aku kanga baba ku, ka Ayŭh nggen di aku surat-barun anŭ bada man.

³Ayŭh nang, “Manusia, man ka ngisi tain mu ngga surat-barun ati adi Aku nggen di kuu.” Aku man, ka sap-i nyibanyis nyam ju banyis.

⁴Komŭnŭ Tapa nang, “Manusia, di ka yŭn daya Israel ka nang di ngara tadŭ tadŭ kayuh adi Aku kidaan di kuu bada nang.

⁵Aku dŭh pait kuu ka bangsa adi minyu piminyu tami adi mbar dog mirati, pak ka bara daya Israel.

⁶Kambŭi Aku pait kuu ka bangsa bangsa adi bās adi minyu piminyu adi mbar kuu mirati, ngara an dingah kuu.

⁷Pak ndi naan daya Israel mating re an dingah; ngara dŭh gŭh an dingah Aku. Sopŭrŭg ngara inŭh baking ka an birawan.

⁸Madin Aku re bada kuu baking ka riang mun ngara.

⁹Aku re bada kuu pagŭng mun batuh, riang mun itan; dŭhnyah taru ngara anŭ adi an birawan.”

¹⁰Tapa pijuu minyu, “Manusia, nakit dingah ka ingat sopŭrŭg kayuh adi Aku nang di kuu.

¹¹Komŭnŭ di ka yŭn daya bangsa adŭp mu adi dog taran so rais adŭp-i ka kidaan di ngara kayuh adi Aku, adi TUHAN Raja, nang di ngara, bait-i ngara dingah kuu bait dŭh.”

¹²Komŭnŭ roh Tapa pakat aku, ka aku dingah di punok ku sirŭŭn adi bana nang, “Muji bragah TUHAN di shorga di sambu!”

¹³Aku dingah urad urad dāng dāng anŭ mikabap di au-tarun, ka jawŭn kaja kaja-krita anŭ, sak jawŭn tana-bigugoh adi bana.

¹⁴Kuasa TUHAN mandŭg ka aku ngga bake-i, ka darŭm roh-I taban aku, aku raru baji.

¹⁵Jadi aku mandŭg ka Tel Abib sindŭk Yang Chebar, di yŭn bara adi dog taran so rais adŭp-i rŭŭ, ka sitŭkŭd ju andu aku rŭŭ diginŭ, inga inga bada kayuh adi aku kiris ka dingah.

¹⁶Kan ju andu anŭ mbŭh ripuan, TUHAN minyu ngga aku.

¹⁷“Manusia,” Ayŭh nang, “Aku bada kuu jadi tukang jaga bangsa Israel. Kuu re nggen di ngara pinyibakan adi Aku nggen di kuu.

¹⁸Kambŭi Aku nggen puan nang ndi naan daya arap re kabŭs pak kuu dŭh bakan ayŭh bada ngubah aran pimudip-i ngga nyiramat adŭp-i, ayŭh re kabŭs babŭ daya bidosa, ka Aku re bada kuu dapu tanggong di pinyikabŭs-i anŭ.

¹⁹Kambŭi kuu bakan daya arap ka ayŭh dŭh ko bidosa, ayŭh re kabŭs babŭ daya bidosa, pak kuu re siramat.

²⁰“Kambŭi daya adi sawŭ kana piguru ndai arap ka Aku na ayŭh darŭm pimudip adi susah, ayŭh re kabŭs kambŭi kuu dŭh bakan ayŭh. Ayŭh re kabŭs sabab dosa-i -- Aku dŭh re ingat pingandai kana-i -- ka Aku re bada kuu dapu tanggong di pinyikabŭs-i.

²¹Kambŭi kuu bakan daya adi kana bada dŭh bidosa ka ayŭh dingah kuu ka dŭh bidosa, ayŭh re siramat ka kuu gŭh re siramat.”

²²Aku kinyam TUHAN nguasa aku ka nang di aku, “Makat ka panu di ka rubān. Aku re minyu ngga kuu diginŭ.”

²³Jadi aku di ka rubān, ka diginŭ aku kiris bragah TUHAN, nimun adi mbŭh aku kiris di pang Yang Chebar. Aku sidikang ka mŭŭb di tana,

²⁴pak roh Tapa mŭrŭt aku ka pakat aku bada mijog. TUHAN nang di aku, “Maad ka ngabŭt adŭp mu darŭm arŭn mu.

²⁵Kuu re dog mŭŭng ngga taris, manusia, ka kuu re dŭh dapŭd ruah di bidapŭd ngga daya bagŭ.

²⁶Aku re bada jura mu bagŭg isa kuu dŭh dapŭd bakan bara daya ati adi gagā birawan.

²⁷Komŭnŭ, kan Aku minyu ngga kuu dinge ka bada kuu dapŭd minyu dinge, kuu re kidaan di ngara kayuh adi Aku, adi TUHAN Raja, nang. Kada so ngara re dingah, pak kada re dŭh piduri kuu, amai ngara inŭh bangsa adi an birawan.”