Read Biatah Bidayuh EZEKIEL 30 Bible Online

EZEKIEL 30 - Biatah Bidayuh bible

EZEKIEL 30

¹TUHAN minyu dinge.

²“Manusia,” Ayŭh nang, “minyu-binabi ka piagah kayuh adi Aku, TUHAN Raja, nang. Kuu an nyirais nang pinganang ati: Andu TUHAN mbŭh sindŭk!

³Andu anŭ re rikas mandŭg, andu adi ngga TUHAN ngukum. Andu anŭ karŭm buang susah bangsa bangsa kinyam.

⁴Re agi biperang di Egypt ka sangsara bās di Ethiopia. Bagŭ daya di Egypt re dog siŭ; rais re dog pirinda ka jadi tibawang.

⁵“Bara soldadu adi dog ngupah so Ethiopia, Lydia, Libya, Arabia, Kub, samŭn so dupan bara daya Ku, re dog siŭ.”

⁶TUHAN nang, “So Migdol di parad utara ndŭg Aswan di parad siratan, sopŭrŭg pingibān Egypt re dog siŭ darŭm perang. Tibaran bara soldadu Egypt adi sambuh anŭ re dog pirabur. Aku, adi TUHAN Raja, mbŭh minyu.

⁷Tarun tana Egypt re jadi siabo matung darŭm ong, ka kupo kupo-i re abo jadi tibawang.

⁸Kan Aku badang Egypt ka sopŭrŭg pingibān-i mbŭh dog siŭ, nŭ ngara re puan Aku ati TUHAN.

⁹“Kan andu anŭ mandŭg ka Egypt dog pirabur, Aku re pait pinyisung ngga kapar kapar bada nguga daya Ethiopia, adi dŭh sangka ani ani, ka re jadi raru taru. Andu anŭ re mandŭg!”

¹⁰TUHAN Raja nang, “Aku re pakai Raja Nebuchadnezzar so Babylonia bada mura pinyikaya Egypt.

¹¹Ayŭh ngga tibaran bara soldadu-i adi gaok re mandŭg di pirabur rais anŭ. Ngara re nyerang Egypt ngga pedang, ka tarun tana rais anŭ re puno ngga tadang.

¹²Aku re nyibadŭh Yang Nile ka na Egypt ka darŭm tangan daya adi arap. Daya daya saruh re pirabur ndi tarun tarun tana rais anŭ. Aku, adi TUHAN, mbŭh minyu.”

¹³TUHAN Raja nang, “Aku re pirabur tibudo tibudo ngga tapa tapa kadong di Memphis. Re mating daya mritah Egypt, ka Aku re pitaru sopŭrŭg daya diginŭ.

¹⁴Aku re bada siratan Egypt matung ka mating daya dieh, ka sigot kupo Zoan di utara. Aku re ngukum Thebes, sindŭ kupo anŭ.

¹⁵Aku re bada kupo Pelusium, kuta bās Egypt, kinyam baji Ku. Aku re pirabur pinyikaya Thebes.

¹⁶Aku re sigot Egypt, ka Pelusium re darŭm sangsara. Sindung sindung Thebes re dog nyirubuh, ka kupo re apuh bada uba.[67]

¹⁷Bara dari adi mara di kupo Heliopolis ngga kupo Bubastis re kabŭs darŭm perang, ka ngara adi bŭkŭn re jadi daya-takap.

¹⁸Kupo Tahpanhes re karŭm di andu Aku pirabur kuasa Egypt ka nyirubuh pinyibake adi ngara ngangŭn. Abun re nutu Egypt, ka bara daya so sopŭrŭg kupo-i re jadi daya-takap.

¹⁹Kan Aku ngukum Egypt simŭnŭ, ngara re puan nang Aku ati TUHAN.”

²⁰Di andu adi ju darŭm buran ndi darŭm sawa adi simŭng ndi kieh dog taran, TUHAN minyu ngga aku.

²¹“Manusia,” Ayŭh nang, “Aku mbŭh mata tangan raja Egypt. Mating daya marut-i bait makot-i ngga banang isa-i bisa bua ka sukup bake yŭn digen pedang dinge.

²²Ngapŭi meh, ati inŭh kayuh adi Aku, TUHAN Raja, nang: Aku ati pinganyu raja Egypt. Aku re mata soduwŭh tangan-i, anŭ adi pidanah ngga anŭ adi mbŭh pata, ka pedang re rabu so tangan-i.

²³Aku re bada bara daya Egypt papar sasah di ndi ong ong.

²⁴Komŭnŭ Aku re bada tangan raja Babylonia bake ka na pedang Ku di tangan-i. Pak Aku re mata tangan tangan raja Egypt, ka ayŭh re nyidaing ka kabŭs di sirung jawin bara pinganyu-i.

²⁵Sawŭ, Aku re piramah ayŭh ka nyibake raja Babylonia. Kan Aku nggen di ayŭh pedang Ku, ka ayŭh tiju Egypt ngga pedang anŭ, sopŭrŭg daya re puan nang Aku ati TUHAN.

²⁶Aku re bada daya Egypt papar sasah di ndi ong ong. Nŭ ngara puan nang Aku ati TUHAN.”