Read Biatah Bidayuh EZEKIEL 31 Bible Online

EZEKIEL 31 - Biatah Bidayuh bible

EZEKIEL 31

¹Di andu adi ndi darŭm buran taruh darŭm sawa adi simŭng ndi kieh dog taran, TUHAN minyu ngga aku.

²“Manusia,” Ayŭh nang, “nang di raja Egypt ngga di sopŭrŭg rayat-i: Kuu raru bikuasa! Ani bisa Ku ngga danding kuu?

³Kuu keya ka[68] tŭngŭn kayuh sedar di Lebanon, ngga daan adi ramus buang bagŭ sayung-i, tŭngŭn adi bigatung ka tijuk-i ndŭg abun.[69]

⁴Udip-i mujur amai piin-i sukup. Sungi sungi adi darŭm tana piranyah-i. Ngara misa tarun adi yŭn-i timbu ka pait anak anak sungi ka sopŭrŭg tŭngŭn kayuh di tuān.

⁵Sabab piin-i sukup, ayŭh timbu bigatung dŭ so tŭngŭn tŭngŭn kayuh adi bŭkŭn. Daan daan-i bitambah baga buang ambu.

⁶Barang masam manuk bisarin di daan-i; dāng tarun biranak di ribo-i; bangsa bangsa di ong rŭŭ-paya di sayung-i.

⁷Raru ramus tŭngŭn kayuh anŭ, raru bigatung, buang raru ambu daan-i. Uat-i ndŭg sungi adi darŭm tana.

⁸ Mating tŭngŭn sedar di teya Tapa bisa ngga danding-i. Bŭn tŭngŭn fir biyŭn daan mun anŭ, ka tŭngŭn kayuh saja dŭh gŭh mun anŭ. Di teya Tapa mating tŭngŭn kayuh adi raru ramus.

⁹Aku bada-i ramus, ngga daan daan-i adi bagŭ. Barang tŭngŭn kayuh di Eden, adi teya Tapa, ripong an jadi mun anŭ.

¹⁰“Ngapŭi meh, Aku, adi TUHAN Raja, re kidaan di kuu kayuh adi re jadi di tŭngŭn kayuh anŭ adi timbu bigatung ndŭg ka tijuk-i ndŭg abun. Buang-i timbu dŭ dŭ bigatung, ayŭh dŭ dŭ gŭh jadi gambung.

¹¹Jadi Aku abah dieh ka re bada pimritah daya tami dapu ayŭh. Ayŭh re nggen di tŭngŭn kayuh anŭ ani ani adi situgu ngga arap-i.

¹²Daya daya tami adi gaok re tabŭng-i ka tandah-i. Daan-i ngga sakap-i adi pata re rabu di tunduh barang darŭd ngga rubān darŭm rais. Sopŭrŭg bangsa adi muko rŭŭ di sayung-i re bu.

¹³Manuk re mandŭg ka mbap di tŭngŭn adi mbŭh tumbang, ka dāng tarun re bidigang di daan daan-i.

¹⁴Ngapŭi so madin, mating tŭngŭn kayuh, bait adi biyŭn sukup piin, re bigatung mun anŭ dinge puan kah re bada tijuk-i ndŭg abun. Sopŭrŭg-i re kabŭs mun manusia saja, adi taŭn re di ka ong daya adi mbŭh kabŭs.”

¹⁵Ati inŭh kayuh adi TUHAN Raja nang: “Di andu adi ngga tŭngŭn kayuh anŭ mūn ka ong daya adi mbŭh kabŭs, Aku re bada piin adi darŭm tana nutu-i jadi tandā ngurid. Aku re bitan sungi sungi ka re dŭh bada anak anak sungi aman. Sabab tŭngŭn kayuh anŭ mbŭh kabŭs, Aku re taban pinyikarŭm ka Darŭd Darŭd Lebanon ka bada sopŭrŭg tŭngŭn kayuh di tuān rayu.

¹⁶Kan Aku pait-i ka ong daya adi mbŭh kabŭs, jawŭn pinyirabu-i re bada bangsa bangsa bigugoh. Sopŭrŭg tŭngŭn kayuh di Eden adi siabo pimuah di Lebanon adi mbŭh mūn ka ong daya adi mbŭh kabŭs re angan pinyirabu-i.

¹⁷Ngara re mūn ayō-i ka ong daya adi mbŭh kabŭs sua ngga ngara adi muko diŭ rabu. Ka sopŭrŭg adi udip di sayung-i re papar sasah di ruang bangsa bangsa.[70]

¹⁸“Tŭngŭn kayuh anŭ inŭh raja Egypt ngga sopŭrŭg rayat-i. Mating tŭngŭn kayuh di Eden bigatung buang ramus mun anŭ. Pak madin, mun tŭngŭn tŭngŭn kayuh Eden, ayŭh re mūn ka ong daya adi mbŭh kabŭs ka sua ngga ngara adi dŭh puan Tapa ngga ngara adi dog siŭ darŭm perang. Aku mbŭh minyu,” nang TUHAN Raja.