Read Biatah Bidayuh EZEKIEL 32 Bible Online

EZEKIEL 32 - Biatah Bidayuh bible

EZEKIEL 32

¹Di andu adi ndi darŭm buran simŭng duwŭh darŭm sawa adi simŭng duwŭh kieh dog taran, TUHAN minyu ngga aku.

²“Manusia,” Ayŭh nang, “nggen pinyibakan adi riang di raja Egypt. Nggen di ayŭh pinganang ati so Aku: kuu bada adŭp mu mun singah di dupan bangsa bangsa, pak kuu rabis dŭ keya ka buai prikarub di sungi. Kuu kinaruh piin ngga kaja mu ka kinais sungi sungi.

³Kan dudu bangsa tikuruk, Aku re nakap kuu ngga jaring Ku ka bada ngara batak jaring anŭ ka deyŭh.

⁴Aku re taran kuu ka tana ka taban sopŭrŭg manuk ngga dāng bada man kuu.

⁵Aku re nambun sandah sandah ka rubān ngga tadang mu adi madam.

⁶Aku re basen deya mu ndŭg ka-i misa sandah sandah ka ngisi anak anak sungi.

⁷ Kan Aku pirabur kuu, Aku re nutu rangit ka mura bitang bitang. Batŭh andu re dog nutu abun, ka buran re dŭh nyekar.

⁸Aku re mura sopŭrŭg jawa di rangit ka bada rais mu jadi karŭm patŭ'. Aku, adi TUHAN Raja, mbŭh minyu.

⁹“Bagŭ bangsa re susah kan Aku piagah pasar pinyirusag mu di rais rais adi kuu bŭn dingah.

¹⁰Kayuh adi Aku ndai di kuu re bada bagŭ bangsa gŭgŭh. Kan Aku pawing pedang Ku, raja raja re taru. Di andu kuu rabu, sopŭrŭg ngara re kimŭtŭr taru nyangŭd asŭng adŭp ngara.”

¹¹TUHAN Raja nang di raja Egypt, “Kuu re nura pedang raja Babylonia.

¹²Aku re bada bara soldadu so bangsa bangsa adi gaok nyitak pedang ngara ka siŭ sopŭrŭg daya mu. Sopŭrŭg daya mu ngga sopŭrŭg kayuh adi yŭn mu mingangŭn re dog pirabur.

¹³Aku re siŭ sapi sapi mu di barang rubang piin. Diginŭ re mating tia daya bait sapi kinaruh piin.

¹⁴Aku re bada piin mu tanang ka kining ka bada sungi sungi mu aman ngga tanang. Aku, adi TUHAN Raja, mbŭh minyu.

¹⁵Kan Aku bada Egypt matung ka pirabur sopŭrŭg adi rŭŭ diginŭ, ngara re puan nang Aku ati TUHAN.

¹⁶Pinyibakan riang ati re jadi ragu nyikubur. Bara dayung bangsa bangsa re nyiragu-i ngga muās Egypt ngga sopŭrŭg daya-i. Aku, adi TUHAN Raja, mbŭh minyu.”

¹⁷Di andu adi simŭng-rimŭh darŭm buran ndi[71] darŭm sawa adi simŭng duwŭh kieh dog taran, TUHAN minyu ngga aku.

¹⁸“Manusia,” Ayŭh nang, “muās sopŭrŭg daya Egypt. Pait ngara ngga bangsa bangsa bŭkŭn ka ong daya adi mbŭh kabŭs.

¹⁹Nang di ngara: “Kuu pikir adŭp mu ramus dŭ so daya bŭkŭn kah? Kuu re mūn ka ong daya adi mbŭh kabŭs ka guring diginŭ ngga bara daya adi dŭh puan Tapa.

²⁰“Daya Egypt re rabu ngga ngara adi dog siŭ darŭm perang. Pedang mbŭh sidia ngga siŭ sopŭrŭg ngara.[72]

²¹Pimagan adi siabo bās ngga ngara adi birawan parad ka Egypt re kambat bara daya Egypt di ong daya adi mbŭh kabŭs. Ngara nyirais nang: ‘Bara adi dŭh puan Tapa adi dog siŭ darŭm perang mbŭh mandŭg kamati, ka digiti inŭh ngara guring!’

²²“Assyria agi diginŭ, dog kirurung kubur kubur bara soldadu-i. Ngara dog siŭ darŭm perang,

²³ka kubur ngara inŭh di parad adi siabo tŭrŭp darŭm ong daya adi mbŭh kabŭs. Sopŭrŭg soldadu Assyria kabŭs darŭm perang, ka kubur ngara kirurung kubur-i. Pŭn ka ngara inŭh adi ko nimbur pinyitaru di tarun tana daya adi udip.

²⁴“Elam agi diginŭ, dog kirurung kubur kubur bara soldadu-i. Ngara dog siŭ darŭm perang ka mūn ka ong daya adi mbŭh kabŭs, buang dŭh puan Tapa. Darŭm ngara udip ngara nimbur pinyitaru di barang yŭn, pak madin ngara kabŭs buang gŭrŭng mangŭh.

²⁵Elam guring ngga ngara adi dog siŭ darŭm perang, ka kubur bara soldadu-i kirurung ayŭh. Sopŭrŭg ngara dŭh puan Tapa ka sopŭrŭg dog siŭ darŭm perang. Darŭm ngara udip, ngara nimbur pinyitaru di barang yŭn, pak madin ngara kabŭs buang gŭrŭng mangŭh, sua dapu nasip ngara adi dog siŭ darŭm perang.

²⁶“Meshech ngga Tubal agi diginŭ, ka kubur kubur bara soldadu-i kirurung ayŭh. Sopŭrŭg ngara dŭh puan Tapa ka sopŭrŭg dog siŭ darŭm perang. Pŭn ka ngara adi ko dawŭ-i pitaru daya adi udip.

²⁷Ngara dŭh dog nggen pinyikubur daya pimagan mun adi jah,[73] adi dog kubur ngga pedang ngara dog na di ribo ubak ngara ka pinangin[74] ngara di tunduh sudo ngara. Bara pimagan anŭ ko dawŭ-i sukup bake ngga pitaru daya adi udip.

²⁸“Simŭnŭ inŭh bara daya Egypt re asur di dupan daya adi dŭh puan Tapa adi kabŭs darŭm perang.

²⁹“Edom agi diginŭ ngga raja raja-i ka ngga bara pimritah-i. Ngara ko dawŭ-i bara soldadu adi bake, pak madin ngara guring di ong daya adi mbŭh kabŭs ngga ngara adi dŭh puan Tapa adi dog siŭ darŭm perang.

³⁰“Sopŭrŭg pinguasa di rais rais di utara agi diginŭ, ka simŭnŭ gŭh bara daya Sidon. Kuasa ngara ko dawŭ-i nimbur pinyitaru, pak madin ngara kabŭs gŭrŭng mangŭh ngga ngara adi dog siŭ darŭm perang. Ngara dog kubur samah ngara adi dŭh puan Tapa. Ngara samah dapu mangŭh ngara adi mūn ka ong daya adi mbŭh kabŭs.

³¹“Pinyikabŭs sopŭrŭg ngara anŭ adi dog siŭ darŭm perang re jadi saduh di raja Egypt ngga tibaran bara soldadu-i,” nang TUHAN Raja.

³²“Aku bada raja Egypt pitaru daya adi udip, pak ayŭh ngga sopŭrŭg tibaran bara soldadu-i re dog siŭ. Ngara re dog kubur ngga sopŭrŭg daya adi dŭh puan Tapa adi kabŭs darŭm perang.” TUHAN Raja mbŭh minyu.