Read Biatah Bidayuh EZEKIEL 33 Bible Online

EZEKIEL 33 - Biatah Bidayuh bible

EZEKIEL 33

¹TUHAN minyu ngga aku.

²“Manusia,” Ayŭh nang, “kidaan di daya mu kayuh adi jadi kan Aku taban perang ka tadŭ tadŭ rais. Daya di rais anŭ mien ndi naan so dupan adŭp ngara bada jadi tukang jaga.

³Kan ayŭh kiris pinganyu mandŭg, ayŭh mambak trompet ngga nguga barang naan daya.

⁴Kambŭi daya dingah pak dŭh mbit piduri ka pinganyu mandŭg ka siŭ ayŭh, anŭ mbŭh adŭp-i dapu tanggong di pinyikabŭs adŭp-i.

⁵Pinyikabŭs-i anŭ inŭh so sarah adŭp-i, sabab ayŭh dŭh mbit piduri di jawŭn trompet anŭ. Kambŭi ayŭh mbit piduri, tatu ayŭh siramat.

⁶Pak nyamtadar-i, kambŭi tukang jaga anŭ kiris pinganyu mandŭg ka dŭh nguga daya ngga trompet-i, ka pinganyu mandŭg ka siŭ bara adi bidosa, Aku re nang tukang jaga anŭ dapu tanggong di pinyikabŭs ngara.

⁷“Madin, manusia, Aku bada kuu jadi tukang jaga yŭn bangsa Israel. Kuu dŭh siŭn dŭh nggen di ngara pinyibakan adi Aku nggen di kuu.

⁸Kambŭi Aku nggen puan nang daya adi arap re kabŭs pak kuu dŭh bakan ayŭh bada ngubah aran pimudip-i isa ayŭh dapŭd nyiramat adŭp-i, ka ayŭh kabŭs gibabŭ daya bidosa, Aku re bada kuu dapu tanggong di pinyikabŭs-i.

⁹Kambŭi kuu bakan daya adi arap ka ayŭh dŭh ko bidosa, ayŭh re kabŭs gibabŭ daya bidosa, pak kuu re siramat.”

¹⁰TUHAN minyu ngga aku. “Manusia,” Ayŭh nang, “pari nyabŭt di bara daya Israel kayuh adi ngara nang: ‘Kieh mbŭh sangsara gŭrŭng dosa ami ngga sarah adi kieh mbŭh ndai. Kieh keya ka mbŭh re kirarah. Simuki meh kieh re udip?’

¹¹Kidaan di ngara nang siragi Aku, adi TUHAN Raja, Tapa adi udip, Aku dŭh munos asŭng kiris daya adi bidosa kabŭs. Raan dŭ Aku kiris ngara ko bidosa ka udip. Israel, dŭh tia ndai dosa. Mani kuu raan kabŭs?

¹²“Manusia, kidaan di bara daya Israel nang kan daya adi kana bidosa, pinyikana-i adi dawŭ dŭh re nyiramat ayŭh. Kambŭi daya arap ko ndai arap, ayŭh dŭh re dog ukum, ka kambŭi daya adi kana piguru bidosa, ayŭh dŭh re dog nyiramat.

¹³Kambŭi Aku bijanji an nggen udip di daya adi kana, pak kambŭi ayŭh piguru pikir pinyikana-i adi dawŭ mbŭh sukup ka piguru ndai dosa, Aku dŭh re ingat tadŭ tadŭ pinyikana-i adi dawŭ. Ayŭh re kabŭs sabab dosa-i.

¹⁴Kambŭi Aku bakan daya adi arap nang ayŭh re kabŭs, pak kambŭi ayŭh ko bidosa ka ndai kayuh adi batur ka kana --

¹⁵nyamtadar-i, kambŭi ayŭh pari kayuh adi-i tambit ndu jamen kayuh adi dog nginjam bait nggen pari kayuh adi-i ko naku -- kambŭi ayŭh ko bidosa ka tunda ukum ukum-adat adi nggen udip, ayŭh re dŭh kabŭs pak re udip.

¹⁶Aku re apun dosa adi muko-i ndai, ka ayŭh re udip sabab ayŭh mbŭh ndai kayuh adi batur ka kana.

¹⁷“Ka daya mu nang kayuh adi Aku ndai dŭh batur! Dŭh, pingandai ngara inŭh adi dŭh batur.

¹⁸Kan daya tŭnggŭn ko ndai kana ka piguru ndai arap, ayŭh re kabŭs amai pingandai arap anŭ.

¹⁹Kan daya arap dŭh tia bidosa ka ndai kayuh adi batur ka kana, ayŭh mbŭh nyiramat adŭp-i.

²⁰Pak Israel, kuu nang kayuh adi Aku ndai dŭh batur. Aku re ngukum kuu nanyam ka pingandai mu.”

²¹ Di andu adi rimŭh darŭm buran simŭng darŭm sawa adi simŭng duwŭh kieh dog taran, daya adi pirupas adŭp-i so Jerusalem mandŭg ka kidaan di aku nang kupo anŭ mbŭh rabu.

²²Ngga singumi andu diŭ so ayŭh mandŭg, aku kinyam kuasa TUHAN. Kan daya anŭ mandŭg andu jawa ndi, TUHAN pari nggen ka aku kuasa ngga minyu.

²³TUHAN minyu ngga aku.

²⁴“Manusia,” Ayŭh nang, “daya adi rŭŭ di kupo kupo adi mbŭh rubuh di tarun tana Israel nang: ‘Abraham inŭh ndi naan daya, ka ayŭh dog nggen ndi tarun tarun tana. Ata ati bagŭ, jadi madin tarun tana ati jadi tung jata.’

²⁵“Kidaan kayuh adi Aku, TUHAN Raja, nang: Angān man dagin adi gibabŭ bideya. Angān nyambah tibudo. Angān siŭ daya. Ani anŭ adi bada angān pikir tana anŭ tung jangān?

²⁶Angān bisangan di pedang ngan. Kraja pingandai ngan sembar. Barang naan angān tanggah. Ani anŭ adi bada angān pikir tana anŭ tung jangān?

²⁷“Kidaan di ngara Aku, adi TUHAN Raja, bakan ngara nang siragi Aku ati Tapa adi udip, daya adi rŭŭ di kupo kupo adi rubuh anŭ re dog siŭ. Ngara adi rŭŭ di sapa rais re dog man dāng tarun. Ngara adi bisukan di darŭd darŭd ka di tāng re kabŭs bada sesak-andam.

²⁸Aku re bada rais anŭ matung, ka kuasa ngara adi ngara ngangŭn re mungan. Darŭd darŭd Israel re jadi tarun pajam ndŭg ka daya mating tungang panu mutas-i.

²⁹Kan Aku ngukum daya amai dosa ngara ka bada rais ngara matung, nŭ ngara puan nang Aku ati TUHAN.”

³⁰TUHAN nang, “Manusia, daya mu minyu pasar kuu kan ngara tikuruk sindŭk sindung kupo bait di rawa tiban ramin ngara. Ngara nang dupan adŭp-i, ‘Ja di dingah pinganang adi mbŭh mandŭg madin so TUHAN.’

³¹Jadi daya Ku tikuruk an dingah kayuh adi kuu nang, pak ngara dŭh ndai kayuh adi kuu bada ngara ndai. Pinganang adi kana ruah so baba ngara, pak ngara babŭ udip tama.

³²Di ngara kuu keya ka daya adi tukang nyiramŭn nang ragu pinyiawang puan kah daya adi main kachapi. Ngara dingah sopŭrŭg kayuh adi kuu nang pak ndi bang mating ngara tunda.

³³Pak kan sopŭrŭg kayuh nang mu jadi bitŭtŭk -- ka sawŭ re jadi bitŭtŭk -- nŭ ngara puan nang nabi agi di ruang ngara.”