Read Biatah Bidayuh EZEKIEL 34 Bible Online

EZEKIEL 34 - Biatah Bidayuh bible

EZEKIEL 34

¹TUHAN minyu ngga aku.

²“Manusia,” Ayŭh nang, “nyarah bara pimritah Israel. Minyu-binabi di ngara, ka kidaan di ngara kayuh adi Aku, TUHAN Raja, nang di ngara: mŭmbŭh inŭh angān, angān pingingat-biri Israel! Angān kingat adŭp ngan, pak bŭn mbit bat pasar biri biri.

³Angān nok sisuh, nēn piraka adi dog ndai so buruh biri, ka siŭ biri adi siabo kana. Pak angān bŭn mbit bat pasar biri biri anŭ.

⁴Angān bŭn kingat ngara adi ramah, pibua ngara adi mandam, marut ngara adi tawan, taban pari ngara adi miriseu, bait jiroh ngara adi manyap. Tibarik angān gaok ngga ngara.

⁵ Sabab biri biri dŭh biyŭn pingingat, ngara mbŭh mingare, ka dāng tarun siŭ ka man ngara.

⁶Jadi biri biri Ku bigandon di sandah adi bigatung ngga di darŭd. Ngara mingare di ong, ka mating daya jiroh ngara bait suba an dapŭd ngara.

⁷“Angān pingingat-biri, dingah kayuh adi Aku, TUHAN Raja, kidaan di angān.

⁸Siragi Aku ati Tapa adi udip, angān patut dingah Aku. Biri biri Ku mbŭh dog nyerang dāng tarun adi siŭ ka man ngara sabab pingingat-biri mating. Pingingat-biri Ku dŭh suba jiroh biri biri anŭ. Ngara kingat adŭp ngara pak dŭh kingat biri.

⁹Jadi dingah Aku, angān pingingat-biri.

¹⁰Aku, adi TUHAN Raja, kidaan Aku ati pinganyu ngan. Aku re tambit biri biri Ku so angān ka re dŭh tia bada angān jadi pingingat ngara; re dŭh tia Aku bada angān kingat adŭp ngan adŭ. Aku re nyiramat biri biri Ku so angān ka re dŭh bada angān man ngara.

¹¹“Aku, adi TUHAN Raja, kidaan di angān nang adŭp Ku re jiroh biri biri Ku ka kingat ngara

¹²nimun pingingat-biri kingat biri ngara adi mingare ka dog nguruk dinge. Aku re taban ngara ngga pari so barang yŭn di yŭn ngara mbŭh mingare di andu adi karŭm ka adi arap anŭ.

¹³Aku re tambit ngara so rais rais tami, nguruk ngara, ka taban ngara pari ka tarun tana adŭp ngara. Aku re nguru ngara pari ka darŭd darŭd ngga anak anak sungi di Israel ka re paan ngara di tarun tana kupai adi barŭm.

¹⁴Aku re bada ngara man kupai ngga siramat di darŭd, di rubān ngga di tarun tana kupai barŭm di Israel.

¹⁵Adŭp Ku re jadi pingingat-biri Ku, ka Aku re jiroh yŭn ngara tarun yŭn rŭŭ-paya. Aku, adi TUHAN Raja, mbŭh minyu.

¹⁶“Aku re jiroh ngara adi manyap, taban pari ngara adi miriseu, marut ngara adi tawan, pibua ngara adi mandam; pak ngara adi gamu buang bake Aku re pirabur, sabab Aku ati pingingat-biri adi ndai kayuh adi batur.

¹⁷“Angān adi kaban biri Ku, Aku, adi TUHAN Raja, kidaan di angān nang Aku re tingga arap kana ngan ka nyidŭrŭ angān so adi arap, biri so kambing.

¹⁸Agi so angān dŭh puas man kupai adi siabo kana; angān bidigang di anŭ adi angān dŭh man! Angān nok piin kining ka kinaruh piin adi angān dŭh nok!

¹⁹Biri Ku adi bŭkŭn mbŭh man kupai adi angān ko yŭn bidigang ka nok piin adi angān ko kinaruh.

²⁰“Jadi madin, Aku, adi TUHAN Raja, kidaan di angān nang Aku re jadi akim yŭn biri adi bake ngga biri adi ramah.

²¹Angān turak ka bŭngŭn ngara adi mandam ka ngara tikadi so ruang kaban biri.

²²Pak Aku re nyiramat biri Ku ka dŭh re bada ngara tia dog kinanyuh. Aku re tingga arap kana biri biri Ku ka nyidŭrŭ adi kana so adi arap.

²³ Aku re nggen di ngara raja mun David, adi urun Ku, bada jadi pingingat ngara, ka ayŭh re kingat ngara.

²⁴ Aku, adi TUHAN, re jadi Tapa ngara, ka ndi naan raja mun David, adi urun Ku, re jadi pinguasa ngara. Aku mbŭh minyu.

²⁵Aku re ndai simanya ngga ngara adi natu pinyiramat ngara. Aku re pibu sopŭrŭg dāng adi mangah so tarun tana anŭ, isa biri biri Ku dapŭd udip ngga siramat di pekan ka bŭŭs di tuān.

²⁶“Aku re nyiberkat ngara ka bada ngara udip maning sandah kudus Ku.[75] Diginŭ Aku re nyiberkat ngara ngga ujen kan ngara biguna dieh.

²⁷Tŭngŭn tŭngŭn kayuh re buān, ŭmŭh re piruah buwa pimuruh, ka barang naan daya re udip siramat di tarun tana adŭp-i. Kan Aku matŭd parik basi daya ka pirupas ngara so daya adi piurun ngara, nŭ ngara puan nang Aku ati TUHAN.

²⁸Bangsa bangsa adi dŭh puan Tapa re dŭh pirinda ngara tia, ka dāng tarun re dŭh siŭ ka man ngara. Ngara re udip siramat, ka mating daya re pitaru ngara.

²⁹Aku re nggen di ngara tarun tana adi damŭn ka pirŭŭ udip sikirau di tarun tana anŭ. Bangsa bangsa bŭkŭn re dŭh tia ngamun ngara.

³⁰Barang naan re puan nang Aku grindung Israel, ka ngara daya Ku. Aku, adi TUHAN Raja, mbŭh minyu.

³¹“Angān biri Ku, kaban biri adi Aku paan, inŭh daya Ku, ka Aku inŭh Tapa ngan,” nang TUHAN Raja.