Read Biatah Bidayuh EZEKIEL 35 Bible Online

EZEKIEL 35 - Biatah Bidayuh bible

EZEKIEL 35

¹ TUHAN minyu ngga aku.

²“Manusia,” Ayŭh nang, “nyarah rais Edom.

³Kidaan kayuh adi Aku, adi TUHAN Raja, nang: Aku ati pinganyu ngan, sandah sandah Edom! Aku re bada tana mu matung.

⁴Aku re bada kupo kupo mu jadi tibawang ka rais mu matung; nŭ kuu re puan nang Aku ati TUHAN.

⁵“Kuu ari jadi pinganyu Israel ka bada ayŭh dog siŭ di tika ayŭh dog pinyirusag, di tika sikasŭn ukum yŭn dosa-i.

⁶Ngapŭi meh, siragi Aku ati, adi TUHAN Raja, Tapa adi udip, pinyikabŭs inŭh nasip mu, ka kuu dŭh dapŭd pirupas adŭp mu so pinyikabŭs. Kuu muko siŭ daya,[76] ka kuu gŭh re dog siŭ daya.

⁷Aku re bada rais tarun tana sandah Edom matung ka re siŭ barang naan daya adi panu mutas-i.

⁸Darŭd darŭd re puno ngga tadang, ka sandah sandah ngga rubān re puno ngga tadang ngara adi dog siŭ darŭm perang.

⁹Aku re bada kuu adu adu matung, ka mating daya re rŭŭ di kupo mu dinge. Nŭ kuu re puan nang Aku ati TUHAN.

¹⁰“Kuu nang duwŭh bangsa anŭ, Judah ngga Israel, samŭn tarun tana ngara, mbŭh tung jamu ka kuu nang adŭp mu an dapu-i, sunggu Aku, adi TUHAN, inŭh Tapa ngara.

¹¹Ngapŭi meh, siragi Aku ati, adi TUHAN Raja, Tapa adi udip, Aku re maras kuu amai baji mu, atin sina mu, ka atin tiru mu di daya Ku. Ngara re puan Aku ngukum kuu amai kayuh adi kuu ndai di tunduh ngara.

¹²Nŭ kuu re puan nang Aku, adi TUHAN, dingah kuu nang ngga atin tiru mu nang darŭd darŭd Israel mbŭh matung ka mbŭh jadi dangah mu.

¹³Aku mbŭh dingah pinganang uap-sambuh adi kuu piruah rawan Aku.”

¹⁴TUHAN Raja nang, “Aku re bada kuu matung ka ndi ong ong re gaŭn di pinyirabu mu,

¹⁵nimun kuu gaŭn di pinyirusag Israel, adi Aku dapu. Darŭd darŭd Seir, sawŭ, sopŭrŭg tarun tana Edom, re matung. Nŭ barang naan daya re puan nang Aku ati TUHAN.”