Read Biatah Bidayuh EZEKIEL 36 Bible Online

EZEKIEL 36 - Biatah Bidayuh bible

EZEKIEL 36

¹TUHAN nang, “Manusia, minyu di darŭd darŭd Israel ka bada ngara dingah pinganang so Aku,

²adi TUHAN Raja, nang di ngara: pinganyu Israel ngga atin angan ngara nang, ‘Madin sandah amba anŭ re jadi jata!’

³“Minyu-binabi, ka komŭnŭ, nggen puan kayuh adi Aku, adi TUHAN Raja, nang. Kan bangsa bangsa adi sindŭk sirabut ka pirinda darŭd darŭd Israel, sopŭrŭg ngara ngamun Israel.

⁴Jadi dingah madin kayuh adi Aku, TUHAN Raja, nang di angān darŭd ngga sandah, di angān anak sungi ngga dau, di angān tarun adi mbŭh jadi tibawang, ka di angān kupo adi dog tagan ka adi dog pirinda ka dog ngamun bangsa bangsa adi sindŭk.

⁵“Aku, adi TUHAN Raja, mbŭh minyu so atin baji Ku pasar bangsa bangsa anŭ, ka rabis-i pasar Edom. Ngga pawŭn ka tiru, ngara sirabut tarun tana Ku ka tambit tarun tana kupai-i.

⁶“Ngapŭi meh minyu-binabi di tarun tana Israel; kidaan di darŭd, sandah, anak sungi, ka di dau kayuh adi Aku, adi TUHAN Raja, nang ngga baji sabab gaya bangsa bangsa anŭ ngamun ka pimangŭh ngara.

⁷Aku, adi TUHAN Raja, bipayu nang bangsa bangsa adi sindŭk anŭ re dog pimangŭh.

⁸Pak tŭngŭn tŭngŭn kayuh di darŭd darŭd Israel re pari pidawŭn ka buān yŭn ngan, daya Ku Israel. Angān re rikas mari.

⁹Aku re parad ka angān, ka Aku re natu tana ngan dog majak dinge ka bine bine dog purun dieh.

¹⁰Aku re bada daya ngan bitambah bagŭ. Angān re rŭŭ di kupo ka pari pijog sopŭrŭg kayuh adi mbŭh rubuh.

¹¹Aku re bada kiang daya ngga dāng kudip ngan bitambah. Angān re rabis bagŭ so adi mbŭh, ka angān re biyŭn bagŭ anak. Aku re bada angān rŭŭ diginŭ mun dawŭ-i, ka Aku re bada angān rabis mujur so adi mbŭh. Nŭ angān re puan nang Aku ati TUHAN.

¹²Aku re taban angān, daya Ku Israel, pari rŭŭ di tarun tana anŭ. Anŭ re jadi tana adŭp ngan, ka-i dŭh re tia bada anak ngan kabŭs sikirau.

¹³“Aku, adi TUHAN Raja, nang: sawŭ pinganang daya adi nang tarun tana ati man daya, ka kinanyap anak anak bangsa adi rŭŭ dieh.

¹⁴Pak so madin ayŭh re dŭh tia man daya bait kinanyap anak anak ngan. Aku, adi TUHAN Raja, mbŭh minyu.

¹⁵Tarun tana ati re dŭh tia dingah bangsa bangsa ngamun adŭp-i bait kiris daya nyirimbe adŭp-i. Tarun tana ati re dŭh tia kinanyap daya adi rŭŭ darŭm adŭp-i. Aku, adi TUHAN Raja, mbŭh minyu.”

¹⁶TUHAN minyu ngga aku.

¹⁷“Manusia,” Ayŭh nang, “kan bara daya Israel rŭŭ di tarun tana ngara, ngara nyembar-i ngga aran pimudip ngara. Di Aku urah rakah ngara inŭh kais nanyam ka adat, nimun dayung kais nandā buran-i.[77]

¹⁸Aku bada ngara kinyam bisā baji Ku sabab ngara muko siŭ daya di tarun tana anŭ ka sabab tibudo adi ngga ngara nyembar-i.

¹⁹Aku ngukum ngara amai aran pimudip ngara, ka Aku bada ngara papar sasah di rais rais tami.

²⁰Di tadŭ yŭn ngara bu, ngara nyembar adŭn kudus Ku, sabab daya nang, ‘Ngara inŭh daya TUHAN, pak ngara dŭh siŭn dŭh bu so tarun tana-I.’

²¹Anŭ bada Aku gapang pasar adŭn kudus Ku, adi dog nyembar bara daya Israel di barang ka yŭn ngara panu.

²²“Jadi madin, nggen di bara daya Israel pinganang adi Aku, TUHAN Raja, nang di ngara: kayuh adi Aku re ndai dŭh inŭh yŭn kana ngan bara daya Israel, pak yŭn kana adŭn kudus adŭp Ku, adi angān mbŭh nyembar di barang rais adi ka ngan panu.

²³Kan Aku kiren di bangsa bangsa pinyikudus adŭn Ku adi bās -- adŭn adi angān nyembar di dupan ngara -- nŭ angān re puan nang Aku ati TUHAN. Aku, adi TUHAN Raja, mbŭh minyu. Aku re pakai angān ngga kiren di bangsa bangsa anŭ nang Aku ati kudus.

²⁴Aku re tambit angān so barang bangsa ngga rais ka taban angān pari ka tarun tana adŭp ngan.

²⁵Aku re masik piin bisig di angān, angān adi sembar bada tibudo ka bada barang masam kayuh.

²⁶ Aku re nggen di angān atin adi bauh ka pikir adi bauh. Aku re tambit atin tangek ngan adi mun batuh so angān ka nggen di angān atin adi nundok.

²⁷Aku re na roh Ku di angān ka re bada angān dŭh siŭn dŭh tunda ukum ukum-adat Ku ka sita sopŭrŭg pesan adi Aku mbŭh nggen di angān.

²⁸Komŭnŭ angān re rŭŭ di tarun tana adi Aku mbŭh nggen di tayung-babuk ngan. Angān re jadi daya Ku, ka Aku re jadi Tapa ngan.

²⁹Aku re nyiramat angān so sopŭrŭg kayuh adi nyembar angān. Aku re nggen ukum bada gandom jadi bagŭ, isa angān dŭh tia dog apag.

³⁰Aku re nambah buwa buwa pimuruh ngan ka buwa buwa tana ngan, isa mating tia apag pimangŭh angān di dupan bangsa bangsa.

³¹Angān re ingat urah rakah ngan adi arap ka sarah adi angān mbŭh ndai, ka angān re sidot di adŭp ngan sabab dosa ngga pingandai kais ngan.

³²Israel, Aku raan angān puan nang Aku ndai sopŭrŭg anŭ dŭh yŭn kana ngan. Aku raan angān kinyam mangŭh sabab kraja pingandai ngan. Aku, adi TUHAN Raja, mbŭh minyu.”

³³TUHAN Raja nang, “Kan Aku pibisig angān so sopŭrŭg dosa ngan, Aku re bada angān rŭŭ di kupo kupo ngan anŭ dinge ka bada angān pari pijog kayuh adi mbŭh rubuh.

³⁴Barang naan daya adi ko ari panu murah tana ngan ka kiris munki raru jikut-i, pak Aku re bada angān biteya dieh dinge.

³⁵Barang naan daya re nang munki tana anŭ, adi muko jadi tarun tana-pajam, mbŭh jadi Teya Eden, ka munki kupo kupo adi muko rubuh, dog mirupak, ka jadi tibawang, madin mbŭh brisi ngga daya ka mbŭh bikuta.

³⁶Komŭnŭ bangsa bangsa adi sindŭk adi babŭ udip re puan nang Aku, adi TUHAN, pari pijog kupo kupo adi mbŭh rubuh ka pari kudip kayuh di tana matung. Aku, adi TUHAN, mbŭh bijanji nang Aku re ndai simŭnŭ -- ka Aku sawŭ re ndai-i.”

³⁷TUHAN Raja nang, “Aku re pari dinge bada bara daya Israel mite turung so Aku, ka Aku re bada ngara bitambah bagŭ mun kaban biri.

³⁸Kupo kupo adi rubuh madin re puno ngga dudu daya nimun Jerusalem ko dawŭ-i puno ngga biri biri adi dog jugan ndu sadis di tika gawai. Nŭ ngara re puan nang Aku ati TUHAN.”