Read Biatah Bidayuh EZEKIEL 37 Bible Online

EZEKIEL 37 - Biatah Bidayuh bible

EZEKIEL 37

¹Aku kinyam kuasa TUHAN, ka roh-I taban aku ka ndi rubān adi puno ngga turang.

²Ayŭh taban aku panu ndi tarun tarun di rubān anŭ, ka aku kiris raru bagŭ turang buang-i mbŭh raru pisŭk.

³Ayŭh nang di aku, “Manusia, bisa kah dudu turang ati pari udip?” Aku nam, “TUHAN Raja, Kaam sadi adŭ adi bisa nam anŭ!”

⁴Ayŭh nang, “Minyu-binabi di turang anŭ. Kidaan di turang turang anŭ bada dingah pinganang TUHAN.

⁵Kidaan di ngara nang Aku, adi TUHAN Raja, nang di ngara: Aku re ngasŭng ka darŭm angān ka bada angān pari udip.

⁶Aku re nggen di angān uat ngga isin, ka marut angān ngga kurit. Aku re nggen di angān asŭng isa angān pari udip. Nŭ angān re puan nang Aku ati TUHAN.”

⁷Jadi aku minyu-binabi nimun dog bada. Darŭm aku minyu, aku dingah prikarok kayuh jawŭn, ka turang turang anŭ piguru tubu adŭp-i.

⁸Darŭm aku tingga, turang turang anŭ dog marut ngga uat ka isin, ka komŭnŭ ngga kurit. Pak pŭrŭng pŭrŭng anŭ dŭh ngasŭng.

⁹Tapa nang di aku, “Manusia, minyu-binabi di sabak.[78] Kidaan di sabak nang TUHAN Raja pesan-i bada mandŭg so barang parad tarun, bada ngasŭng di pŭrŭng adi dŭh udip anŭ, isa-i pari udip.”

¹⁰ Jadi aku minyu-binabi nimun ko dog bada. Asŭng mŭrŭt pŭrŭng pŭrŭng anŭ, ka ngara udip ka mijog. Ngara raru bagŭ, sukup ngga pijadi ndi tibaran bara soldadu.

¹¹Tapa nang di aku, “Manusia, daya Israel inŭh keya ka turang turang anŭ. Ngara nang adŭp ngara mbŭh pisŭk, ngga mating pingarap ka dŭh biyŭn pimudip adi re.

¹²Ngapŭi minyu-binabi di daya Israel ka kidaan di ngara nang Aku, adi TUHAN Raja, re kuka kubur ngara. Aku re piruah ngara ka taban ngara ngga pari ka tarun tana Israel.

¹³Kan Aku kuka kubur adi yŭn daya Ku dog kubur ka taban ngara ngga ruah, ngara re puan nang Aku ati TUHAN.

¹⁴Aku re na asŭng Ku darŭm ngara, bada ngara pari udip, ka bada ngara udip di tarun tana adŭp ngara. Komŭnŭ ngara re puan nang Aku ati TUHAN. Aku bijanji Aku re ndai simŭnŭ -- ka Aku sawŭ re ndai-i. Aku, adi TUHAN, mbŭh minyu.”

¹⁵TUHAN minyu ngga aku dinge.

¹⁶“Manusia,” Ayŭh nang, “tambit ndi apŭg kayuh ka nuris dieh, ‘Pritah Judah’. Komŭnŭ tambit apŭg kayuh adi bŭkŭn ka nuris dieh, ‘Pritah Israel’.

¹⁷Komŭnŭ digŭng duwŭh apŭg kayuh anŭ bada tŭbŭn-i bidapŭd, isa-i mun ndi apŭg anak kayuh.

¹⁸Kan daya mu siken di kuu ani rati-i,

¹⁹kidaan di ngara nang Aku, adi TUHAN Raja, re tambit apŭg apŭg kayuh anŭ adi ngarun Israel ngga Judah. Aku re digŭng soduwŭh apŭg kayuh anŭ isa-i jadi ndi apŭg kayuh darŭm tangan Ku.

²⁰“Digŭng soduwŭh apŭg kayuh anŭ ka bada bara daya kiris-i.

²¹Komŭnŭ kidaan di ngara nang Aku, adi TUHAN Raja, re tambit sopŭrŭg daya Ku so bangsa bangsa adi ka ngara mbŭh bu, nguruk ngara, ka taban ngara ngga pari ka tarun tana adŭp ngara.

²²Aku re bada ngara jadi ndi bangsa di tarun tana anŭ, di tarun tana darŭd Israel. Ngara re dog mritah ndi naan raja ka ngara re dŭh tia pape jadi duwŭh bangsa bait pape jadi duwŭh pritah.

²³Ngara re dŭh tia nyembar adŭp ngara ngga tibudo tibudo adi sipŭ anŭ bait kinais adŭp ngara ngga dosa. Aku re pirupas ngara so sopŭrŭg aran pimudip adi bada ngara bidosa ka adi bada ngara dŭh tŭtŭd di Aku. Aku re pibisig ngara; ngara re jadi daya Ku, ka Aku re jadi Tapa ngara.

²⁴ Ndi naan raja mun urun Ku David re jadi raja ngara. Ngara re dog bada jadi ndi di ribo ndi naan pimritah ka re tunda ukum ukum-adat Ku ngga tŭtŭd.

²⁵Ngara re udip di tarun tana adi Aku nggen di urun Ku Jacob, tarun tana di yŭn tayung-babuk ngara rŭŭ. Ngara re rŭŭ diginŭ ndŭg situi tui, ka simŭnŭ gŭh bara anak ngara samŭn bara sesang ngara. Raja adi mun urun Ku David re mritah ngara ndŭg situi tui.

²⁶Aku re ndai ndi simanya ngga ngara adi natu pinyiramat ngara ndŭg situi tui. Aku re nyiberkat ngara ka nambah kiang ngara, ka pijog Ramin Ku di rais ngara, di yŭn-i re tan ndŭg situi tui.

²⁷ Aku re rŭŭ diginŭ ngga ngara; Aku re jadi Tapa ngara, ka ngara re jadi daya Ku.

²⁸Kan Aku pijog Ramin Ku diginŭ di ruang ngara ndŭg situi tui, nŭ bangsa bangsa re puan nang Aku, adi TUHAN, mbŭh mien Israel bada jadi daya Ku.”