Read Biatah Bidayuh EZEKIEL 38 Bible Online

EZEKIEL 38 - Biatah Bidayuh bible

EZEKIEL 38

¹TUHAN minyu ngga aku.

² “Manusia,” Ayŭh nang, “nyarah Gog, pingubak pimritah bangsa Meshech ngga bangsa Tubal di tarun tana Magog. Nyarah ayŭh,

³ka kidaan di ayŭh nang Aku ati, adi TUHAN Raja, inŭh pinganyu-i.

⁴Aku re bada ayŭh dŭh bigaya, nyikait raang-i, ka batak ayŭh samŭn bara soldadu-i ngga bu. Tibaran bara soldadu-i, ngga kuda kuda ngara ka pinunggang pinunggang adi nēn piraka soldadu, inŭh raru bagŭ, ka barang naan ngara digen pinangin buang bisinyata pedang.

⁵Daya so Persia, Ethiopia, ka Libya agi ngga ayŭh, ka sopŭrŭg biyŭn pinangin ngga tupi basi.

⁶Sopŭrŭg daya adi pandai birawan so tarun tana Gomer ngga Beth Togarmah di utara agi ngga ayŭh, ka simŭnŭ gŭh bara daya so bagŭ bangsa bŭkŭn.

⁷Kidaan di ayŭh bada sidia ka bada sopŭrŭg bara soldadu-i sidia di ribo pritah-i.

⁸Kan kudu kudu sawa mbŭh ripas, Aku re nggen ukum di ayŭh bada nyerang ndi rais adi yŭn daya mbŭh dog taban pari so bagŭ bangsa ka mbŭh rŭŭ dŭh dog mito perang. Ayŭh re nyerang tarun tana darŭd Israel, adi mbŭh matung ka tui dog tagan, pak di yŭn bara daya Israel madin mbŭh rŭŭ ngga siramat.

⁹Ayŭh ngga tibaran bara soldadu-i samŭn dudu bangsa adi sua ngga ayŭh re nyerang mun sabak ribut ka ngisi tarun tana anŭ mun abun.”

¹⁰Ati inŭh kayuh adi TUHAN Raja nang di Gog: “Kan tika anŭ mandŭg, kuu re piguru bipikir akar adi arap.

¹¹Kuu re ndai pikir mu nyerang rais adi dŭh bigaya di yŭn daya rŭŭ darŭm damai ka siramat darŭm kupo kupo adi dŭh bikuta ka adi dŭh biyŭn pingakas ngga grindung adŭp ngara.

¹²Kuu re pirinda ka mirupak daya adi rŭŭ darŭm kupo kupo adi ko dawŭ-i rubuh. Ngara ko dog nguruk so rais rais bŭkŭn, ka madin ngara biyŭn dāng kudip ngga buat-rata ka rŭŭ di yun utung tarun tana bangsa adi yŭn bagŭ bangsa bidapŭd.

¹³Daya Sheba ngga daya Dedan ngga daya dagang so kupo kupo di Spain re siken kuu, ‘Mbŭh kah kuu nguruk tibaran bara soldadu mu ka nyerang yŭn mirupak ka pirinda? Dŭh kah kuu raan pirak ngga mas, dāng kudip ngga buat-rata, ka taban sopŭrŭg anŭ ngga bu?’ ”

¹⁴Jadi TUHAN Raja pait aku bada kidaan di Gog kayuh adi Ayŭh nang di ayŭh: “Madin sitadŭn daya Ku Israel udip ngga siramat, kuu re matak[79]

¹⁵so tarun yŭn mu di utara, taban tibaran bara soldadu pinunggang kuda adi bās bake so rais rais bŭkŭn,

¹⁶ka nyerang daya Ku Israel mun sabak ribut nyarab mutas tarun tana. Kan tika anŭ mandŭg, Aku re pait kuu bada nyerang tarun tana Ku ngga kiren di bangsa bangsa asi Aku ati, ngga kiren pinyikudus Ku so ka kayuh adi Aku ndai so kuu.

¹⁷Kuu inŭh daya adi Aku nyabŭt dawŭ-i, kan Aku nggen puan so urun urun Ku bara nabi Israel, nang di tipuh adi re mandŭg Aku re pait ndi naan daya bada nyerang Israel.” TUHAN Raja mbŭh minyu.

¹⁸TUHAN Raja nang, “Di andu adi ngga Gog nyerang Israel, Aku re jadi bangok.

¹⁹Aku re nang darŭm baji Ku nang di andu anŭ tana re bana bigugoh di tarun tana Israel.

²⁰Barang iken ngga manuk, barang dāng adi baga ngga adi sŭ, ka barang naan manusia di tunduh tana re kimŭtŭr amai taru di Aku. Darŭd darŭd re rabu, jenjang re tube, ka barang sindung re rubuh.

²¹Aku re pitaru Gog pakai barang masam pinyusah.[80] Aku, adi TUHAN Raja, mbŭh minyu. Bara daya-i re bisiŭ dupan adŭp ngara.

²²Aku re ngukum ayŭh ngga andam ka pinyikabŭs. Ujen bangat ngga ujen batuh, samŭn apui ngga mirirang, re nyatŭk ayŭh ngga tibaran bara soldadu-i ka di tunduh bangsa bangsa adi parad ka ayŭh.

²³Simŭnŭ inŭh Aku re kiren di sopŭrŭg bangsa nang Aku ati bās ka kudus. Ngara re puan nang Aku ati TUHAN.”