Read Biatah Bidayuh EZEKIEL 39 Bible Online

EZEKIEL 39 - Biatah Bidayuh bible

EZEKIEL 39

¹TUHAN Raja nang, “Manusia, nyarah Gog, pingubak pimritah bangsa Meshech ngga bangsa Tubal, ka kidaan di ayŭh nang Aku ati inŭh pinganyu-i.

²Aku re nguit ayŭh ka pinijū adi bŭkŭn ka nguru ayŭh ruah so tarun yŭn adi jo di utara ndŭg ka ayŭh mandŭg ka tarun tana darŭd Israel.

³Komŭnŭ Aku re taper bawŭh so tangan bait-i ka reja-panah so tangan tauh-i.

⁴Gog ngga tibaran bara soldadu-i samŭn bara pambit-i re kabŭs di darŭd darŭd Israel, ka Aku re bada tadang ngara jadi pinguman yŭn sopŭrŭg manuk ngga dāng dāng tarun.

⁵Ngara re kabŭs di sapa tarun adi tawas. Aku, adi TUHAN Raja, mbŭh minyu.

⁶Aku re pisakŭt apui di tarun tana Magog ka di ndi tabing tabing rawŭt di yŭn daya udip darŭm damai, ka barang naan re puan nang Aku ati TUHAN.

⁷Aku mbŭh natu re bada daya Ku Israel puan adŭn kudus Ku, ka Aku dŭh re bada adŭn Ku dog nyembar tia. Komŭnŭ bangsa bangsa re puan nang Aku, adi TUHAN, inŭh Tapa Kudus Israel.”

⁸TUHAN Raja nang, “Andu adi Aku nang re sawŭ mandŭg.

⁹Daya adi rŭŭ di kupo kupo Israel re ruah ka nguruk raru bagŭ sinyata ndu uwang. Ngara re ndai apui ngga dudu pinangin, bawŭh, reja-panah, jarok, ka pukong, ka sopŭrŭg anŭ re sukup yŭn ju sawa.

¹⁰Ngara re dŭhsah ndu uwang di teya teya bait tabŭng tŭngŭn kayuh di tuān, sabab ngara re biyŭn sukup sinyata re ngara badang. Ngara mirupak ka pirinda ngara adi ko mirupak ka pirinda ngara.” TUHAN Raja mbŭh minyu.

¹¹TUHAN nang, “Kan sopŭrŭg kayuh anŭ jadi, Aku re nggen di Gog tana kubur di Israel, di Rubān Daya Bingandon, parad ka timor Rawŭt Pide.[81] Gog ngga sopŭrŭg tibaran bara soldadu-i re dog kubur diginŭ, ka rubān anŭ re dog kadŭn ‘Rubān Tibaran Bara Soldadu Gog’.

¹²Ju buran bara daya Israel kubur sopŭrŭg tadang anŭ ka sayan tarun tana bada pari bisig.

¹³Barang naan daya di tarun tana anŭ re turung kubur tadang, ka ngara re dog nggen stabi di andu pimanang Ku. Aku, adi TUHAN Raja, mbŭh minyu.

¹⁴Kan ju buran anŭ mbŭh ripuan, kudu kudu naan daya re dog mien bada kudak ndi tarun tana da jiroh ka kubur tadang tadang[82] adi dŭm di tunduh tana, isa tarun tana ngara jadi bisig.

¹⁵Buang ngara panu mūn maad tarun tana rais, ka tiap kari ngara dapŭd turang manusia, ngara na tandā di bŭngŭn-i isa ngara adi tukang kareh kubur dapŭd mandŭg ka kubur-i di Rubān Tibaran Bara Soldadu Gog.

¹⁶(Sindŭk anŭ re agi anak kupo dog kadŭn ngga dŭn tibaran bara soldadu.) Ngga simŭnŭ meh tarun tana anŭ re pari jadi bisig.”

¹⁷ TUHAN Raja nang di aku, “Manusia, bagan sopŭrŭg manuk ngga dāng dāng bada mandŭg so sopŭrŭg yŭn bada man sadis adi aku mbŭh sidia yŭn ngara. Anŭ re jadi gawai bās di darŭd darŭd Israel, di yŭn ngara dapŭd man dagin ka nok deya.

¹⁸Ngara re man tadang bara soldadu ka nok deya bara pimritah ong, adi re sopŭrŭg dog siŭ mun dari dari biri ngga anak anak biri, kambing bait kah sapi adi gamu.

¹⁹Kan Aku siŭ bara daya anŭ mun sadis, dudu manuk ngga dudu dāng re man sopŭrŭg ramak ngga situngang tungang ngara ka nok deya ndŭg ka ngara mabuk.

²⁰Di mija Ku ngara re man sopŭrŭg kuda ngga bara pinunggang kuda ngga bara soldadu adi barang masam. Aku, adi TUHAN Raja, mbŭh minyu.”

²¹TUHAN nang, “Aku re bada bangsa bangsa kiris bragah Ku ka kiren di ngara munki Aku pakai kuasa Ku ngga ndai kayuh nanyam ka pimatŭd pikir-kira Ku adi batur.

²²Bara daya Israel re puan nang so nganŭ Aku ati TUHAN adi Tapa ngara.

²³Ka bangsa bangsa re puan nang bara daya Israel dog taran ka rais daya sabab dosa adi ngara mbŭh ndai rawan Aku. Aku tagan ngara ka bada pinganyu ngara ngarah ngara ka siŭ ngara darŭm perang.

²⁴Aku nggen di ngara kayuh adi ngara patut trima amai udip kais ngga udip ginaka ngara, ka Aku tagan ngara.”

²⁵TUHAN Raja nang, “Pak madin Aku re masi di sesang Jacob, adi daya Israel, ka bada ngara pari mujur. Aku re grindung adŭn kudus Ku.

²⁶Kan ngara mbŭh pari rŭŭ di tarun tana ngara ngga siramat, ka mating daya nyusah ngara, ngara re tungang kambŭt munki ngara dog pimangŭh amai nyipunok Aku.

²⁷Ngga kiren di bagŭ bangsa nang Aku ati kudus, Aku re taban daya Ku pari so sopŭrŭg rais adi yŭn pinganyu ngara rŭŭ.

²⁸Komŭnŭ daya Ku re puan nang Aku ati TUHAN adi Tapa ngara. Ngara re puan anŭ, sabab Aku bada ngara dog taran ka jadi daya-takap ka madin nguruk ngara ka taban ngara ngga pari ka tarun tana adŭp ngara; ndi naan mating gŭh dog tingge.

²⁹Aku re ren roh Ku di daya Israel ka dŭh re tia tagan ngara. Aku, adi TUHAN Raja, mbŭh minyu.”