Read Biatah Bidayuh EZEKIEL 4 Bible Online

EZEKIEL 4 - Biatah Bidayuh bible

EZEKIEL 4

¹Tapa nang, “Manusia, tambit ndi batuh batā, na-i di sirung jawin mu, ka nidi garis dieh bada nyuto kupo Jerusalem.

²Komŭnŭ, ngga nyuto pinyikapung anŭ, ndai parit, ndai tugung tana, bari bari, ka betang betang kayuh pinumbuk maning-i.

³Tambit ndi kuari basi ka piguru-i bada mun sindung di asah mu ngga kupo anŭ. Nura kupo anŭ. Kupo anŭ mbŭh dog nyikapung, ka kuu inŭh adi nyikapung-i. Anŭ re jadi tandā yŭn bangsa Israel.

⁴“Komŭnŭ guring siging ka bait, ka Aku[6] re mbas di kuu sarah bangsa Israel. Kuu re rŭŭ diginŭ 390 andu ka sangsara sabab sarah ngara. Aku miratak di tunduh mu barang andu ukum, yŭn barang sawa ukum ngara.

⁶Kan anŭ mbŭh kamas ndai mu, bigiring ka tauh mu ka sangsara sabab sarah Judah pat puru andu -- barang andu yŭn barang sawa ukum ngara.

⁷“Nŭtŭn tingga pinyikapung Jerusalem. Pakat tangan mu ka minyu-binabi pasar-i.

⁸Aku re mŭŭng kuu isa kuu dŭh dapŭd bigiring ndŭg ka pinyikapung anŭ mbŭh ripuan.

⁹“Madin tambit gandom, jeri, kasang, kasang bireh, gŭtŭm, ka gandom anŭk. Gaur-i ka ndai ruti. Anŭ re mu man sitŭkŭd 390 andu kuu guring siging ka bait.

¹⁰Kuu siŭn man 230 gram ruti ndi andu, ka dŭh siŭn dŭh sagar anŭ ndŭg andu andi.

¹¹Kuu re nok gŭh nisit piin, duwŭh saker ndi andu.

¹²Kuu re ndai apui pakai taki manusia adi mbŭh pisŭk, ndai ruti di tunduh apui anŭ, ka man-i di sirung jawin daya bagŭ.”

¹³TUHAN nang, “Anŭ nyuto munki daya Israel re man pinguman adi Ukum-adat nagah,[7] kan Aku bada ngara papar sasah di rais rais tami.”

¹⁴Pak aku nam, “Dŭh, TUHAN Raja! Aku bŭn nyembar adŭp ku. So aku gi-sŭ aku bŭn man dagin dāng adi mbŭh kabŭs sadi adŭp-i bait adi kabŭs dog siŭ dāng tarun. Aku bŭn man pinguman adi dog nyirundeng kais.”

¹⁵Jadi Tapa nam, “Bisa. Aku re bada kuu pakai taki sapi ngga gati taki manusia, ka kuu bisa ndai ruti mu di tunduh-i.”

¹⁶Ka Ayŭh minyu dinge, “Manusia, Aku re pirŭŭ pimandŭg ruti ka Jerusalem. Daya diginŭ re susah ka ngingen darŭm ngara nakar pinguman adi ngara man ka piin adi ngara nok.

¹⁷Ruti ngga piin ngara re abo; ngara re susah, ka pinŭbŭn-i ngara kabŭs sabab dosa ngara.”