Read Biatah Bidayuh EZEKIEL 40 Bible Online

EZEKIEL 40 - Biatah Bidayuh bible

EZEKIEL 40

¹Anŭ mbŭh andu adi simŭng darŭm sawa bauh, sawa adi duwŭh puru-rimŭh ripas kieh mbŭh dog taran, ka sawa adi simŭng pat ripas Jerusalem dog sirabut. Di andu anŭ aku kinyam kuasa TUHAN, ka Ayŭh tunduk aku ngga bu.

² Keya ka darŭm pŭmŭh Tapa taban aku di ka tarun tana Israel ka na aku di tibung darŭd adi bigatung. Aku kiris di sirung jawin ku[83] uruk uruk ramin ka rah-i mun ndi kupo.

³ Ayŭh taban aku bada sindŭk, ka aku kiris ndi naan daya adi nyirinyak mun timaga. Ayŭh digŭng ndi taris pingŭkŭd adi dog ndai so banang linen, ka ndi sikud pingŭkŭd. Ayŭh mijog di bŭngŭn tiban-bās kupo.

⁴Ayŭh nang di aku, “Nakit tingga, manusia. Dingah ka nakit pirati sopŭrŭg kayuh adi aku kiren di kuu, amai anŭ inŭh sabab kuu dog taban kamati. Kuu patut kidaan di daya Israel sopŭrŭg kayuh adi kuu kiris.”

⁵ Kayuh adi aku kiris inŭh Ramin TUHAN adi dog maning sindung. Daya anŭ tambit sikud pingŭkŭd-i, adi 3 mita ambu, ka ngŭkŭd sindung anŭ. Bigatung-i 3 mita ka tabar-i 3 mita.

⁶Komŭnŭ ayŭh di ka tiban-bās adi nura timor. Ayŭh maad tungoh tiban anŭ, ka di ubak tungoh anŭ ayŭh ngŭkŭd tŭrŭp tigurong tiban anŭ; ka-i 3 mita tŭrŭp.[84]

⁷Ripas anŭ agi ndi tiburong-aran, adi biyŭn taruh birit daya adi tukang jaga di barang parad-i. Barang birit agi misagi pat, 3 mita barang parad, ka sindung adi matŭn barang birit anŭ agi 2.5 mita tabar. Ripas birit daya adi tukang jaga anŭ agi tiburong-aran 3 mita ambu adi nuju ndi birit-mŭrŭt adi nura Ramin TUHAN.

⁸Ayŭh ngŭkŭd birit anŭ, ka-i 4 mita buka-i. Anŭ inŭh tŭbŭn aran mŭrŭt adi sindŭk Ramin TUHAN, ka di tŭbŭn raya-i, sindung sindung agi 1 mita tabar.

⁹

¹⁰(Birit birit daya adi tukang jaga di barang parad tiburong-aran anŭ nyimati sopŭrŭg-i, ka sindung sindung adi matŭn birit birit anŭ agi nyimati gŭh tabar-i.)

¹¹Komŭnŭ, daya anŭ ngŭkŭd buka tiburong-aran tiban-bās anŭ. Buka tiburong-aran anŭ agi 6.5 mita; ka buka tiban-bās anŭ agi 5 mita.

¹²Di jawin barang birit daya adi tukang jaga agi anak sindung adi 0.5 mita bigatung ka 0.5 mita tabar. (Birit birit anŭ 3 mita misagi.)

¹³Komŭnŭ ayŭh ngŭkŭd juan asah so sindung punok[85] ndi birit ndŭg sindung punok ndi birit adi bistatang ngga anŭ di pah mandi tiburong-aran anŭ, ka juan-i agi 12.5 mita.

¹⁴Birit adi di tŭbŭn tiburong-aran agi nuju ka badag. Ayŭh ngŭkŭd birit anŭ ka buka-i agi 10 mita.[86]

¹⁵Prungun ambu tiburong-aran anŭ so sindung sapa tiban-bās ndŭg sikasŭn birit anŭ agi 25 mita.

¹⁶Agi pinjan pinjan siit di sindung sapa sopŭrŭg birit anŭ ka agi gŭh di sindung sindung darŭm adi matŭn birit birit anŭ. Agi gambar gambar tŭngŭn kurma dog mŭŭt di sindung birit tura ka darŭm adi nura tiburong-aran.

¹⁷Daya anŭ taban aku mŭrŭt so tiban-bās anŭ ka darŭm badag anŭ. Agi 30 birit dog ndai sinyadi ngga sindung sapa, ka di jawin biri birit anŭ agi pekan adi dog nunduh ngga batuh batuh,

¹⁸adi bayah-i ndŭg badag anŭ. Badag sapa anŭ agi rapat dŭ so badag darŭm.

¹⁹Agi tiban-bās adi bigatung dŭ adi nuju badag darŭm. Daya anŭ ngŭkŭd juan asah duwŭh tiban-bās anŭ, ka juan-i agi 50 mita.[87]

²⁰Komŭnŭ daya anŭ ngŭkŭd tiban-bās adi tura ka utara adi nuju badag sapa.

²¹Taruh birit daya adi tukang jaga di soduwŭh parad tiburong-aran anŭ, sindung sindung adi matŭn-i, ngga birit-mŭrŭt, sopŭrŭg anŭ nyimati ngga anŭ di tiban-bās tura ka timor. Prungun ambu tiburong-aran tiban-bās anŭ agi 25 mita ka buka-i agi 12.5 mita.

²²Birit-mŭrŭt, pinjan pinjan, ka gambar gambar tŭngŭn kurma adi dog mŭŭt agi brimun ngga anŭ di tiban-bās timor. Diginŭ agi ju subang tungoh adi maad ka tiban-bās, ka birit-mŭrŭt agi di tŭbŭn tiburong-aran nura badag.

²³Mutas badag so tiban-bās utara anŭ agi tiban-bās adi bŭkŭn adi nuju badag darŭm, nimun anŭ adi tura ka timor. Daya anŭ ngŭkŭd juan asah duwŭh tiban-bās anŭ, ka juan-i agi 50 mita.

²⁴Ko anŭ, daya anŭ taban aku ka parad ka siratan, ka diginŭ kieh kiris tiban-bās adi bŭkŭn. Ayŭh ngŭkŭd sindung-i adi tura ka darŭm samŭn birit-mŭrŭt, ka sopŭrŭg-i samah mati-i ngga anŭ adi di tiban-bās adi bŭkŭn.

²⁵Birit birit tiban-bās anŭ biyŭn pinjan mun anŭ adi di tiban-bās adi bŭkŭn. Prungun ambu tiburong-aran tiban-bās anŭ agi 25 mita, ka buka-i 12.5 mita.

²⁶Ju subang tungoh maad ka tiban-bās anŭ, ka birit-mŭrŭt agi gŭh di tŭbŭn tiburong-aran nura badag. Diginŭ agi gambar gambar tŭngŭn kurma dog mŭŭt di sindung tura ka darŭm nura tiburong-aran anŭ.

²⁷Diginŭ, gŭh, agi tiban-bās adi nuju badag darŭm. Daya anŭ ngŭkŭd juan-i ngga tiban-bās anŭ ndi, ka juan-i agi 50 mita.

²⁸Daya anŭ taban aku mŭrŭt so tiban-bās anŭ ka darŭm badag anŭ. Ayŭh ngŭkŭd tiban-bās anŭ, ka-i nyimati ngga tiban tiban-bās adi bŭkŭn di sindung sapa.

²⁹Birit birit daya adi tukang jaga, birit-mŭrŭt, ngga sindung sindung adi tura ka darŭm samah mati-i ngga anŭ adi di tiban-bās adi bŭkŭn. Agi gŭh pinjan di birit birit tiban-bās anŭ. Prungun ambu tiburong-aran tiban-bās anŭ agi 25 mita, ka buka-i agi 12.5 mita.

³⁰

³¹Birit mŭrŭt-i nura badag adi bŭkŭn, ka gambar gambar tŭngŭn kurma agi dog mŭŭt di sindung tiburong-aran anŭ. Mai subang tungoh maad ka tiban-bās anŭ.

³²Daya anŭ taban aku mŭrŭt so tiban-bās anŭ ka darŭm badag anŭ. Ayŭh ngŭkŭd tiban-bās anŭ, ka-i samah mati-i ngga tiban-bās adi bŭkŭn.

³³Birit birit daya adi tukang jaga, birit-mŭrŭt, ngga sindung sindung adi tura ka darŭm agi samah mati-i ngga anŭ adi di tiban-bās adi bŭkŭn. Agi dudu pinjan, samŭn di birit-mŭrŭt. Prungun ambu tiburong-aran tiban-bās anŭ agi 25 mita, ka buka-i agi 12.5 mita.

³⁴Birit-mŭrŭt anŭ nura badag sapa. Gambar gambar tŭngŭn kurma agi dog mŭŭt di sindung tiburong-aran. Mai subang tungoh maad ka tiban-bās anŭ.

³⁵Komŭnŭ daya anŭ taban aku ka tiban-bās adi tura ka utara. Ayŭh ngŭkŭd-i, ka-i samah mati-i ngga tiban-bās adi bŭkŭn.

³⁶Mun adi bŭkŭn, tiban-bās anŭ biyŭn birit birit daya adi tukang jaga, sindung sindung adi tura ka darŭm adi dog ngabuh, birit-mŭrŭt, ka dudu pinjan. Prungun ambu tiburong-aran tiban-bās anŭ agi 25 mita ka buka-i agi 12.5 mita.

³⁷Birit-mŭrŭt[88] nura badag sapa. Gambar gambar tŭngŭn kurma agi dog mŭŭt di sindung tiburong-aran. Mai subang tungoh maad ka tiban-bās anŭ.

³⁸Di badag sapa agi ndi birit tambah adi dog tubu tura ka darŭm tiban-bās adi tura ka utara. Birit anŭ agi tiban adi nuju birit-mŭrŭt adi nura badag, ka diginŭ daya ngu dāng dāng adi muko dog ninong adi re dog mŭrŭng badang ndu sadis.

³⁹Darŭm birit-mŭrŭt anŭ agi pat mija, duwŭh di barang parad birit anŭ. Di tunduh mija anŭ daya siŭ dāng dāng adi re dog jugan ndu sadis, bait-i adi re dog mŭrŭng badang, puan kah ndu sadis ngga taran dosa, puan kah ndu sadis bayar gati rugi.

⁴⁰Di sapa birit anŭ agi pat mija adi mun anŭ adi tejah, duwŭh di parad ka bait ka duwŭh di parad ka tauh aran mŭrŭt tiban-bās utara.

⁴¹Prungun-i mai mija di yŭn dāng dāng adi re dog nyadis dog siŭ: pat darŭm birit anŭ ka pat di badag sapa.

⁴²Pat mija adi darŭm birit tambah anŭ, adi ngga sidia sadis adi re mŭrŭng dog badang, dog ndai so batuh. Mija anŭ 50 sentimita bigatung, ka tunduh-i 75 sentimita misagi. Sopŭrŭg pingakas adi ngga siŭ dāng dāng sadis dog nyikŭn di tunduh mija mija anŭ.

⁴³Pingŭnggŭng adi 75 milimita ramba-i maning bŭngŭn mija mija anŭ. Sopŭrŭg dagin adi re dog nyadis dog na di tunduh mija mija anŭ.[89]

⁴⁴Komŭnŭ ayŭh taban aku ka darŭm badag darŭm. Diginŭ agi duwŭh birit tikuka di badag darŭm, ndi nura siratan ngapid tiban-bās utara ka anŭ ndi nura utara ngapid tiban-bās siratan.[90]

⁴⁵Daya anŭ kidaan di aku nang birit adi nura siratan inŭh yŭn imam imam adi nyiraja di Ramin TUHAN,

⁴⁶ka birit adi nura utara inŭh yŭn imam imam adi nyiraja di bŭngŭn mija-sambah. Sopŭrŭg imam anŭ inŭh sesang Zadok; kaŭs ngara anŭ so tibaran-asar Levi adi dog nyibandar mŭrŭt ka sirung jawin TUHAN ka bituan di Ayŭh.

⁴⁷Daya anŭ ngŭkŭd badag darŭm, ka-i agi 50 mita misagi. Ramin TUHAN dog pijog di tura ka barat, ka di jawin-i agi mija-sambah.

⁴⁸Komŭnŭ ayŭh taban aku ka darŭm birit-mŭrŭt Ramin TUHAN. Ayŭh ngŭkŭd tigurong tiban anŭ: tŭrŭp-i agi 2.5 mita ka buka-i agi 7 mita,[91] ngga sindung sindung di parad ka bait ngga di parad ka tauh agi 1.5 mita tabar.

⁴⁹Subang tungoh adi maad ka birit-mŭrŭt agi 10 mita bayah ka 6 mita tŭrŭp. Diginŭ agi duwŭh tiang bās, ndi di barang parad aran mŭrŭt.